ମୁମ୍ବାଇ,୨୫/୧୦: ବଲିଉଡ ଏବଂ ଟିଭି ଜଗତର ଜଣେ ଜଣାଶୁଣା ଅଭିନେତା ସତୀଶ ଶାହଙ୍କ ଦେହାନ୍ତ ହୋଇଛି। ସେ ଅକ୍ଟୋବର ୨୫ ତାରିଖ ଦିନ ଅପରାହ୍ନ ୨:୩୦ ରେ ଶେଷ ନିଶ୍ୱାସ ତ୍ୟାଗ କରିଥିଲେ। ରିପୋର୍ଟ ଅନୁଯାୟୀ, ସତୀଶ କିଡନୀ ସମ୍ବନ୍ଧୀୟ ରୋଗରେ ପୀଡ଼ିତ ଥିଲେ। ତାଙ୍କ ପରିଚାଳକ ଜାତୀୟ ଗଣମାଧ୍ୟମକୁ ଅଭିନେତାଙ୍କ ମୃତ୍ୟୁର ସୂଚନା ଦେଇଛନ୍ତି। ଅକ୍ଟୋବର ୨୬ ତାରିଖରେ ତାଙ୍କର ଅନ୍ତିମ ସଂସ୍କାର କରାଯିବ। ତାଙ୍କ ପାର୍ଥିବଶରୀର ବର୍ତ୍ତମାନ ହସ୍ପିଟାଲରେ ଅଛି।
ବଲିଉଡ୍ରେ ସତୀଶଙ୍କ ସଫଳତା:
୭୪ ବର୍ଷ ବୟସରେ ଶେଷ ନିଃଶ୍ବାସ ତ୍ୟାଗ କରିଛନ୍ତି ବଲିଉଡ୍ର ଏହି ଲୋକପ୍ରିୟ ଅଭିନେତା। ନିକଟରେ ବଲିଉଡ୍ ହାସ୍ୟ ଅଭିନେତା ଅସ୍ରାନୀ ଏବଂ ବିଜ୍ଞାପନ ଜଗତର ବାଦଶାହ ପୀୟୁଷ ପାଣ୍ଡେଙ୍କ ମୃତ୍ୟୁ ଖବର ବଲିଉଡ୍କୁ ମର୍ମାହତ କରିଥିବା ବେଳେ ଏବେ ସତୀଶଙ୍କ ହଠାତ୍ ମୃତ୍ୟୁ ସିନେମା ଶିଳ୍ପକୁ ଆଉ ଏକ ବଡ଼ ଧକ୍କା ଦେଇଛି। ଚଳଚ୍ଚିତ୍ର ଏବଂ ଟିଭି ଶିଳ୍ପ ଶୋକରେ ବୁଡ଼ି ରହିଛି। ସତୀଶ ଶାହ ତାଙ୍କ କ୍ୟାରିଅର ସାରା ଅନେକ ଚଳଚ୍ଚିତ୍ରରେ ଅଭିନୟ କରିଥିଲେ। ତଥାପି, ସେ ଟିଭି ଶୋ "ସାରାଭାଇ ବନାମ ସାରାଭାଇ"ରେ ଇନ୍ଦ୍ରବଦନ ସାରାଭାଇ ଓରଫ୍ ଇନ୍ଦୁ ଭୁମିକାରେ ସେ ଘରେ ଘରେ ଲୋକପ୍ରିୟ ହୋଇଯାଇଥିଲେ। ଏହି କମେଡି ଶୋ'ରେ ସତୀଶଙ୍କ ଅଭିନୟ ଆକର୍ଷଣୀୟ ଥିଲା। ଆଜି ମଧ୍ୟ, ଶୋ'ର କ୍ଲିପ୍ ଇନଷ୍ଟାଗ୍ରାମରେ ଭାଇରାଲ ହେଉଛି।
ସତୀଶ ଗୁଜୁରାଟର ମାଣ୍ଡଭିରେ ଜନ୍ମଗ୍ରହଣ କରିଥିଲେ। ଜାଭିୟର୍ କଲେଜରେ ପଢ଼ିବା ପରେ ସେ ଫିଲ୍ମ ଆଣ୍ଡ ଟେଲିଭିଜନ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆରେ ଅଧ୍ୟୟନ କରିବାକୁ ଯାଇଥିଲେ। ୧୯୭୨ ମସିହାରେ, ସତୀଶ ଡିଜାଇନର୍ ମଧୁ ଶାହାଙ୍କୁ ବିବାହ କରିଥିଲେ। କୋଭିଡ୍ ମହାମାରୀ ସମୟରେ ସେ ମଧ୍ୟ କୋଭିଡ୍ର ସମ୍ମୁଖୀନ ହୋଇଥିଲେ। ସତୀଶ ଶାହା ବଲିଉଡ ଫିଲ୍ମରୁ କ୍ୟାରିୟର ଆରମ୍ଭ କରିଥିଲେ। ତାଙ୍କର ପ୍ରଥମ ଚଳଚ୍ଚିତ୍ର ଥିଲା "ଭଗବାନ୍ ପର୍ଶୁରାମ"। ପରବର୍ତ୍ତୀ ସମୟରେ ସେ "ଅରବିନ୍ଦ ଦେଶାଇ କି ଅଜିବ ଦସ୍ତାନ", "ଗମାନ", "ଉମ୍ରାଓ ଜାନ", "ଶକ୍ତି", "ଜାନେ ଭୀ ଦୋ ୟାରୋନ", "ବିକ୍ରମ ବେତାଲ" ଏବଂ "ହାମ୍ ସାଥ୍ ସାଥ୍ ହେ" ଭଳି ଚଳଚ୍ଚିତ୍ରରେ ଅଭିନୟ କରିଥିଲେ।
ଟେଲିଭିଜନରେ ମଧ୍ୟ ସଫଳ ରହିିଚି ସତୀଶଙ୍କ କ୍ୟାରିୟର:
ସତୀଶ ଶାହ ବଲିଉଡରେ ଅନେକ ଭିନ୍ନ ଭିନ୍ନ ଚଳଚ୍ଚିତ୍ରରେ ଅଭିନୟ କରିଥିଲେ। କିନ୍ତୁ ଟେଲିଭିଜନ ଶିଳ୍ପରେ ସେ ଯେଉଁ ଛାପ ଛାଡ଼ିଥିଲେ, ତାହା ସମ୍ପୂର୍ଣ୍ଣ ଭିନ୍ନ ଥିଲା। ତାଙ୍କର ୧୯୮୪ ସିଟ୍କମ୍ "ୟେ ଜୋ ହୈ ଜିନ୍ଦେଗି" ଏବେ ବି ମନେ ଅଛି। ସତୀଶ ଶୋ'ର ୫୫ ଏପିସୋଡ୍ରେ ୫୫ଟି ଭିନ୍ନ ଭିନ୍ନ ଚରିତ୍ରରେ ଅଭିନୟ କରିଥିଲେ। ତା'ପରେ ସେ ୧୯୯୫ ଶୋ' "ଫିଲ୍ମି ଚକ୍କର"ରେ ପ୍ରକାଶ ଭୂମିକାରେ ଅଭିନୟ କରିଥିଲେ। ତା'ପରେ ସେ "ସାରାଭାଇ ଭର୍ସେସ୍ ସାରାଭାଇ"ରେ କାମ କରିଥିଲେ। "ଫିଲ୍ମି ଚକ୍କର" ଏବଂ "ସାରାଭାଇ ଭର୍ସେସ୍ ସାରାଭାଇ" ଉଭୟରେ ସେ ଅଭିନେତ୍ରୀ ରତ୍ନା ପାଠକ ଶାହଙ୍କ ସହ ଯୋଡ଼ି ହୋଇଥିଲେ। ମାୟା ସାରାଭାଇ ଏବଂ ଇନ୍ଦ୍ରବଦନ ସାରାଭାଇଙ୍କ ମଧ୍ୟରେ ମଜାମସ୍ତି ଏବଂ ହାସ୍ୟରସକୁ ଦର୍ଶକ ମହଲରେ ବେଶ୍ ଗ୍ରହଣ କରାଯାଇଥିଲା।
