ଭୁବନେଶ୍ବର, ୨୬।୫ : ସାବିତ୍ରୀ ବ୍ରତ ହେଉଛି ସ୍ୱାମୀଙ୍କ ପାଇଁ । ସ୍ୱାମୀଙ୍କ ଦୀର୍ଘ ଜୀବନ କାମନା କରି ସଧବା ପାଳନ୍ତି ସାବିତ୍ରୀ ବ୍ରତ । ତେବେ ଏମିତି ବି ପାଳନ ହୁଏ ସାବିତ୍ରୀ ବ୍ରତ । ଯେଉଁଠି କିନ୍ନରମାନେ ଗୁରୁଙ୍କ ପାଇଁ ଶଙ୍ଖା , ସିନ୍ଦୁର , ଅଳତା ଓ ବ୍ରତ ପିନ୍ଧନ୍ତି । ମା’ ସାବିତ୍ରୀ ଓ ମୁର୍ଗୀ ମାତାଙ୍କ ନିକଟରେ ତାଙ୍କର ଦୀର୍ଘ ଜୀବନ କାମନା କରନ୍ତି । ଭଦ୍ରକ ସହରର ଚରମ୍ପା ଠାରେ କିନ୍ନରମାନେ ପାଳନ କରିଛନ୍ତି ଏଭଳି ସାବିତ୍ରୀ ବ୍ରତ।
ସମସ୍ତଙ୍କର ଗୋଟିଏ ବିଶ୍ୱାସ ଯେ ସ୍ୱାମୀଙ୍କ ପାଇଁ ସାବିତ୍ରୀ ବ୍ରତ । କିନ୍ତୁ ଏଠି ପରମ୍ପରା ଓ ସଂସ୍କୃତି ନିଆରା । ଏଠି ସାବିତ୍ରୀଙ୍କ ସହ ମା’ ମୂର୍ଗୀମାତାଙ୍କର ପୂଜା ହେଉଛି। କିନ୍ତୁ ସ୍ୱାମୀଙ୍କ ପାଇଁ ନୁହେଁ ପୂଜା ହେଉଛି ଗୁରୁ ଙ୍କ ପାଇଁ । ମଥାରେ ସିନ୍ଦୁର , ପାଦ ର ଅଳତା ଓ ହାତର ବ୍ରତ କେବଳ ଗୁରୁଙ୍କ ନାଁ ରେ ପିନ୍ଧିଛନ୍ତି କିନ୍ନର ମାନେ । ଭଦ୍ରକ ସହର ର ଚରମ୍ପା ଠାରେ କିନ୍ନର ମାନେ ପାଳନ କରିଛନ୍ତି ସାବିତ୍ରୀ ବ୍ରତ । ରୀତି ନୀତି ଅନୁସାରେ ଫଳମୂଳ ନେଇ ନୂଆ ଲୁଗା , ସଙ୍ଖା , ସିନ୍ଦୁର ଓ ଅଳତା କୁ ନେଇ ଠାକୁର ଙ୍କ ନିକଟ ରେ ରଖି ପୂଜା କରିଛନ୍ତି ।
ପୂଜକ କହିଛନ୍ତି ଯେ ପୂଜା ବିଧି ସମାନ କିନ୍ତୁ ପରମ୍ପରା ଅଲଗା । ଏଠାରେ ଗୁରୁଙ୍କ ପାଇଁ ପାଳନ ହେଉଛି ସାବିତ୍ରୀ ବ୍ରତ । କିନ୍ନରଙ୍କ ଶିଷ୍ୟ ବା ଚେଲାମାନେ ଏକାଠି ହୋଇ ଗୁରୁଙ୍କ ପାଇଁ ବ୍ରତ ରଖନ୍ତି । ନିର୍ଜଳ ଉପବାସ କରି ନୂଆ ଲୁଗା ପିନ୍ଧି ପୂଜାରେ ବସନ୍ତି କିନ୍ନର ଶିଷ୍ୟ । ମା’ ସାବିତ୍ରୀ ଙ୍କ ପୂଜା ହୋମ ପରେ ଏକାଠି ହୋଇ କିନ୍ନର ମାନେ ହୁଳହୁଳି ଦେଇ ଗୁରୁଙ୍କ ପାଦ ଧୋଇ ବନ୍ଦାପନା କରନ୍ତି । ପରେ ଗୁରୁ ଶିଷ୍ୟଙ୍କୁ ନୂଆ ଲୁଗା ପିନ୍ଧାଇବା ସହ ତାଙ୍କ ମଥାରେ ସିନ୍ଦୁର ପିନ୍ଧାଇଦିଅନ୍ତି । ପରେ ଗୁରୁଙ୍କ ପାଦୁକା ପାଇବା ପରେ ବ୍ରତ ସଫଳ ହୁଏ ବୋଲି କିନ୍ନରଙ୍କ ବିଶ୍ୱାସ ରହିଛି ।
