ନୂଆଦିଲ୍ଲୀ: ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ (ଏସବିଆଇ) ନିକଟରେ ତା’ର ହୋମ ଲୋନ ସୁଧ ହାରରେ ୨୫ ବେସିସ ପଏଣ୍ଟ (୦.୨୫%) ବୃଦ୍ଧି କରିଛି। ଯାହା ନୂଆ ଋଣଗ୍ରହୀତାଙ୍କ ମାସିକ କିସ୍ତି (ଇଏମଆଇ) ଉପରେ ପ୍ରଭାବ ପକାଇବ। ଏହି ବୃଦ୍ଧି ରିଜର୍ଭ ବ୍ୟାଙ୍କ ଅଫ ଇଣ୍ଡିଆ (ଆରବିଆଇ)ର ରେପୋ ରେଟ ଅପରିବର୍ତ୍ତିତ ରହିଥିବା ସତ୍ତ୍ୱେ କରାଯାଇଛି, ଯାହା ବର୍ତ୍ତମାନ ୫.୫%ରେ ରହିଛି।
ଆପଣଙ୍କୁ ଜଣାଇରଖୁ ଯେ, ଏସବିଆଇର ହୋମ ଲୋନ ସୁଧ ହାର ବର୍ତ୍ତମାନ ୮.୭୫%ରୁ ଆରମ୍ଭ ହୋଇ ୯.୧୫% ପର୍ଯ୍ୟନ୍ତ ରହିଛି। ଋଣଗ୍ରହୀତାଙ୍କ କ୍ରେଡିଟ ସ୍କୋର ଏବଂ ଋଣର ପ୍ରକାର ଉପରେ ନିର୍ଭର କରି ଏହି ହାର ସ୍ଥିର ହୋଇଥାଏ। ଏହି ବୃଦ୍ଧି ମୁଖ୍ୟତଃ ବ୍ୟାଙ୍କର ଅପରେସନାଲ ଖର୍ଚ୍ଚ ଏବଂ ବଜାର ଅବସ୍ଥାକୁ ଦୃଷ୍ଟିରେ ରଖି ନିଆଯାଇଥିବା ଜଣାପଡିଛି।
ତେବେ ଏହି ବୃଦ୍ଧିର ପ୍ରଭାବ ସବୁଠୁ ଅଧିକ ନୂଆ ଋଣଗ୍ରହୀତାଙ୍କ ଉପରେ ପଡିବାକୁ ଯାଉଛି। ଉଦାହରଣ ସ୍ୱରୂପ, ୫୦ ଲକ୍ଷ ଟଙ୍କାର ହୋମ ଲୋନ ପାଇଁ (୨୦ ବର୍ଷ ମିଆଦ), ସୁଧ ହାର ୮.୭୫%ରୁ ୯% ହେଲେ ମାସିକ ଇଏମଆଇ ପ୍ରାୟ ୪୫,୫୦୦ ଟଙ୍କାରୁ ୪୬,୨୦୦ ଟଙ୍କାକୁ ବୃଦ୍ଧି ପାଇବ। ଅର୍ଥାତ୍ ଋଣଗ୍ରହିତା ମାନଙ୍କୁ ମାସିକ ୭୦୦ ଟଙ୍କା ଅଧିକ ଦେୟ ରାଶି ପ୍ରଦାନ କରିବାକୁ ପଡିବ।
ସେହିଭଳି, ୧ କୋଟି ଟଙ୍କାର ଋଣ ପାଇଁ, ଏହି ୦.୨୫% ବୃଦ୍ଧି ମୋଟ ସୁଧ ଖର୍ଚ୍ଚକୁ ୨-୩ ଲକ୍ଷ ଟଙ୍କା ପର୍ଯ୍ୟନ୍ତ ବୃଦ୍ଧି କରିପାରେ। ଯାହା ଋଣର ମିଆଦ ଉପରେ ନିର୍ଭର କରିବ।
ପୁରୁଣା ଋଣଗ୍ରହୀଙ୍କ ଭିତରେ ଯେଉଁମାନେ ଫ୍ଲୋଟିଂ ରେଟ ଋଣ ନେଇଛନ୍ତି, ସେମାନଙ୍କ ଇଏମଆଇ ବର୍ତ୍ତମାନ ଅପରିବର୍ତ୍ତିତ ରହିବ। କିନ୍ତୁ ବ୍ୟାଙ୍କ ଋଣର ମିଆଦ ବୃଦ୍ଧି କରିପାରେ। ଆରବିଆଇର ନୂଆ ନିୟମ ଅନୁଯାୟୀ, ବ୍ୟାଙ୍କମାନେ ଋଣଗ୍ରହୀଙ୍କୁ ଇଏମଆଇ ବୃଦ୍ଧି, ମିଆଦ ବୃଦ୍ଧି କିମ୍ବା ଉଭୟର ବିକଳ୍ପ ପ୍ରଦାନ କରିବାର ଆବଶ୍ୟକତା ରହିଛି।
ଏସବିଆଇ ଜାରି କରିୱଥିବା ତଥ୍ୟ ଅନୁଯାୟୀ, ବଜାରରେ ଅର୍ଥନୈତିକ ଅସ୍ଥିରତା, ମୁଦ୍ରାସ୍ଫୀତି ଚାପ ଏବଂ ବ୍ୟାଙ୍କର ଫଣ୍ଡ ଖର୍ଚ୍ଚ ବୃଦ୍ଧି ଏହି ସୁଧ ହାର ବୃଦ୍ଧିର ପ୍ରମୁଖ କାରଣ। ଏହା ସତ୍ତ୍ୱେ, ଆରବିଆଇ ରେପୋ ରେଟକୁ ୫.୫%ରେ ଅପରିବର୍ତ୍ତିତ ରଖିଛି, ଯାହା ସୂଚାଇଛି ଯେ ଏହି ବୃଦ୍ଧି ବ୍ୟାଙ୍କର ନିଜସ୍ୱ ନୀତିଗତ ନିଷ୍ପତ୍ତି।
ଯେଉଁମାନେ ବର୍ତ୍ତମାନ ଏସବିଆଇର ଅତିରିକ୍ତ ସୁଧ ହାରରୁ ବଞ୍ଚି ଏକ ହାଉସ ଲୋନ ନେବାକୁ ଚାହୁଁଛନ୍ତି ସେମାନେ ଅନ୍ୟ ବ୍ୟାଙ୍କ ଏବଂ ଆର୍ଥିକ ଅନୁଷ୍ଠାନମାନଙ୍କର ସୁଧ ହାର ତୁଳନା କରନ୍ତୁ। କେତେକ ବ୍ୟାଙ୍କ ଏବେ ମଧ୍ୟ ୮.୫%ରୁ କମ ହାରରେ ଋଣ ପ୍ରଦାନ କରୁଛନ୍ତି। ସେହିଭଳି ଆଉ ଏକ ଉପାୟ ହେଲା ଫିକ୍ସଡ ରେଟ ଋଣ ନେବା ଦ୍ୱାରା ଭବିଷ୍ୟତ ସୁଧ ହାର ବୃଦ୍ଧିରୁ ସୁରକ୍ଷା ମିଳିପାରେ। ଯଦିଓ ଏହାର ହାର ସାଧାରଣତଃ ଅଧିକ ହୋଇଥାଏ। ଅନ୍ୟାନ୍ୟ ବିକଳ୍ପ ଭାବେ ଯଦି ଆପଣଙ୍କୁ ସୁଧ ହାର ଅଧିକ ମନେହୁଏ, ଋଣଗ୍ରହୀମାନେ କମ ସୁଧ ହାର ଥିବା ଅନ୍ୟ ବ୍ୟାଙ୍କକୁ ଋଣ ଟ୍ରାନ୍ସଫର କରିବା ବିଷୟରେ ଚିନ୍ତା କରିପାରନ୍ତି।
ଏସବିଆଇ ଭାରତର ସବୁଠାରୁ ବଡ଼ ହୋମ ଲୋନ ପ୍ରଦାନକାରୀ ବ୍ୟାଙ୍କ, ଯାହାର ବଜାର ଅଂଶ ପ୍ରାୟ ୩୫%। ଏହାର ସୁଧ ହାର ବୃଦ୍ଧି ଅନ୍ୟ ବ୍ୟାଙ୍କମାନଙ୍କୁ ମଧ୍ୟ ସମାନ ପଦକ୍ଷେପ ନେବାକୁ ପ୍ରେରିତ କରିପାରେ। ଏହା ପୂର୍ବରୁ, ୨୦୨୫ ଜୁନରେ ଆରବିଆଇର ୨୫ ବେସିସ ପଏଣ୍ଟ ରେପୋ ରେଟ ହ୍ରାସ ପରେ ଏସବିଆଇ ସମେତ ଅନେକ ବ୍ୟାଙ୍କ ଋଣ ସୁଧ ହାର ହ୍ରାସ କରିଥିଲେ। ଯାହା ଋଣଗ୍ରହୀତାଙ୍କ ପାଇଁ ସାମାନ୍ୟ ଆଶ୍ୱସ୍ତି ଆଣି ଦେଇଥିଲା।
ଏହି ସୁଧ ହାର ବୃଦ୍ଧି ନୂଆ ଋଣଗ୍ରହୀତାଙ୍କ ପାଇଁ ଘର କିଣିବାକୁ ଅଧିକ ମହଙ୍ଗା କରିବ। ବିଶେଷତଃ ମହାନଗରୀରେ ଯେଉଁଠାରେ ସମ୍ପତ୍ତି ମୂଲ୍ୟ ପୂର୍ବରୁ ବହୁ ଅଧିକ ରହିଛି। ଆର୍ଥିକ ବିଶେଷଜ୍ଞମାନେ ପରାମର୍ଶ ଦେଉଛନ୍ତି ଯେ ଋଣଗ୍ରହୀତାମାନେ ନିଜର ଆର୍ଥିକ ଯୋଜନା ଉପରେ ପୁନର୍ବିଚାର କରନ୍ତୁ ଏବଂ ଅଧିକ ସୁଧ ହାରକୁ ସାମନା କରିବା ପାଇଁ ପ୍ରସ୍ତୁତ ରୁହନ୍ତୁ।
