ନୂଆଦିଲ୍ଲୀ,୦୬/୦୬: ଫି ଦେଇପାରି ନଥିବାରୁ ୩୧ ଜଣ ଛାତ୍ରଛାତ୍ରୀଙ୍କୁ ସସ୍ପେଣ୍ଡ କରିଥିବା ଦ୍ୱାରାକ ଦିଲ୍ଲୀ ପବ୍ଲିକ ସ୍କୁଲକୁ କଡା ସମାଲୋଚନା କରିଛନ୍ତି ହାଇକୋର୍ଟ । ଜଷ୍ଟିସ ସଚିନ ଦତ୍ତାଙ୍କୁ ନେଇ ଗଠିତ ଜଣକିଆ ବେଞ୍ଚ କହିଛନ୍ତି ସ୍କୁଲ ଫି ଦେଇ ନ ପାରିବାରୁ ଛାତ୍ରଛାତ୍ରୀଙ୍କୁ ଧମକ ଦିଆଯାଇପାରିବ ନାହିଁ । ସ୍କୁଲ କର୍ତ୍ତୃପକ୍ଷଙ୍କ ଏଭଳି ହରକତ ମାନସିକ ନିର୍ଯାତନା ସହ ସମାନ ଏବଂ ଏହା ଛାତ୍ରଛାତ୍ରୀଙ୍କ ଆତ୍ମସମ୍ମାନ ପ୍ରତି ଆଘାତ ପହଞ୍ଚାଇଥାଏ ।
ହାଇକୋର୍ଟ କହିଛନ୍ତି ଯେ, ସ୍କୁଲ କେବଳ ଅର୍ଥ ଉପାର୍ଜନର ମାଧ୍ୟମ ନୁହେଁ । ସ୍କୁଲର ପ୍ରଥମ ଉଦ୍ଦେଶ୍ୟ ହେଉଛି ପିଲାମାନଙ୍କୁ ଶିକ୍ଷା ପ୍ରଦାନ କରିବା ଓ ସେମାନଙ୍କ ନୈତିକ ମୂଲ୍ୟବୋଧର ବିକାଶ ଘଟାଇବା । କେବଳ ଏକ ବ୍ୟବସାୟିକ ସଂସ୍ଥା ଭାବେ କାମ କରିବା ସ୍କୁଲର ଉଦ୍ଦେଶ୍ୟ ନୁହେଁ । ନିଜର ସେବା ପ୍ରଦାନ ଲାଗି ସ୍କୁଲ ଅବଶ୍ୟ ଫି ନେଇଥାଏ, କିନ୍ତୁ ଏହାକୁ ଏକ ବ୍ୟବସାୟିକ ସଂସ୍ଥା ଭାବେ ବିବେଚନା କରାଯାଇ ପାରିବ ନାହିଁ । ତେବେ ସ୍କୁଲ କର୍ତ୍ତୃପକ୍ଷ ଓ ଅଭିଭାକମାନେ ବିବାଦର ଆପୋସ ସମାଧାନ କିରବାକୁ ହାଇକୋର୍ଟ ପରାମର୍ଶ ଦେଇଛନ୍ତି । ତେବେ ହାଇକୋର୍ଟଙ୍କ ଏହି ଟିପ୍ପଣୀ ପରେ ସ୍କୁଲ କର୍ତ୍ତୃପକ୍ଷ ପିଲାମାନଙ୍କ ଉପରୁ ନିଲମ୍ବନ ପ୍ରତ୍ୟାହାର କରିନେଇଛି ।
ସୂଚନାଯୋଗ୍ୟ ଯେ ଏହି ମାମଲା ଦ୍ୱାରକା ଡିପିଏସ୍ ସହ ଜଡିତ । ଗତ ମେ ୯ ତାରିଖରେ ଫି ଦେଇ ନଥିବାରୁ ଡିପିଏସ୍ ପକ୍ଷରୁ ୩୨ ଜଣ ଛାତ୍ରଛାତ୍ରୀଙ୍କ ନାଁ କାଟି ଦିଆଯାଇଥିଲା । ମେ ୧୩ ତାରିଖରେ ଏହି ପିଲାମାନେ ସ୍କୁଲରେ ପହଞ୍ଚିବା ପରେ ଗେଟରେ ଉପସ୍ଥିତ ୪ ଜଣ ପୁରୁଷ ଓ ୨ ଜଣ ମହିଳା ବାଉନ୍ସର ସେମାନଙ୍କ ପରିଚୟପତ୍ର ଯାଞ୍ଚ କରିଥିଲେ । ପରେ ସେମାନଙ୍କୁ ସ୍କୁଲ ଭିତରକୁ ନ ପୂରାଇ ଫେରାଇ ଦେଇଥିଲେ । ଏପରିକି ସେମାନଙ୍କୁ ଘରକୁ ପଠାଇ ଦିଆଯିବା ସମ୍ପର୍କରେ ମଧ୍ୟ ଅଭିଭାବକମାନଙ୍କୁ ସୂଚନା ଦିଆଯାଇ ନଥିଲା । ଫଳରେ ୧୦୨ ଜଣ ଅଭିଭାବକ ସ୍କୁଲ କର୍ତ୍ତୃପକ୍ଷଙ୍କ ଏଭଳି ନିଷ୍ପତ୍ତି ବିରୋଧରେ ହାଇକୋର୍ଟରେ ପିଟିସନ ଦାଖଲ କରିଥିଲେ ।
