କୋଷାଗୁମୁଡା,୨୧।୦୬(ଆପ୍ର): ନବରଙ୍ଗପୁର ଜିଲ୍ଲା କୃଷି ବିଭାଗ ପକ୍ଷରୁ ଶନିବାର ବ୍ଲକର କୋଡିଙ୍ଗାଠାରେ ଅଣସ୍ୱୀକୃତି ପ୍ରାପ୍ତ ବିହନ ବିକ୍ରି ଉପରେ ଚଢାଉ କରାଯାଇଛି । ବିନା ଲାଇସେନ୍ସରେ ବିହନ ବିକ୍ରି ଓ କୀଟନାଶକ ବିକ୍ରି ଅଭିଯୋଗରେ ୫ଲକ୍ଷ ଟଙ୍କାର ବିହନ ଓ କୀଟନାଶକ ଜବତ କରିବା ସହ ଗୋଦାମ ସିଲ କରିଛି କୃଷି ବିଭାଗ । କୋଡିଙ୍ଗାଠାରେ ଆଜି ସଞ୍ଜୟ ଅଗ୍ରବାଲ, ଦୟା ମେହେତା ଓ ଧର୍ମରାଜ ଦୋରାଙ୍କ ଦୋକାନରେ ଚଢାଉ କରି ଷ୍ଟକ ସହ ବିହନ ଯାଞ୍ଚ କରି ଷ୍ଟକ ସେଲ ନୋଟିସ ୭ଦିନ ମଧ୍ୟରେ ପଠାଇବାକୁ ବିଭାଗ ପକ୍ଷରୁ କାରଣ ଦର୍ଶାଅ ନୋଟିସ ଜାରି କରାଯାଇଛି ।
ସୂଚନା ମୁତାବକ, ଶନିବାର ଅପରାହ୍ନ ସମୟରେ କୀର୍ତ୍ତନ ବିଶ୍ଵାଳଙ୍କ ଘରେ ଓ ଗୋଦାମ ଉପରେ ଚଢାଉ କରି ଶଙ୍କର କିସମ ଧାନ ଓ କୀଟନାଶକ ସାମଗ୍ରୀ ଜବତ କରାଯାଇଛି । ବ୍ୟବସାୟୀ ଜଣକ ବେଆଇନ ଭାବେ ବିନା ଲାଇସେନ୍ସରେ ଗୋଦାମ କରି ବିହନ ଓ କୀଟନାଶକ ଆଦି ବିକ୍ରି କରୁଥିଲେ । ଯାହାର ଆନୁମାନିକ ବଜାର ମୂଲ୍ୟ ୬ ଲକ୍ଷ୯୧ ହଜାର ଟଙ୍କା ବୋଲି କୃଷି ବିଭାଗ ପକ୍ଷରୁ ସୂଚନା ମିଳିଛି । ଜବତ ବିହନ ରାଜ୍ୟରେ ବିକ୍ରି କରିବାକୁ ଓଡିଶା ସରକାର ପକ୍ଷରୁ ସ୍ୱୀକୃତି ମିଳିଛି କି ନାହିଁ ସେ ନେଇ ସାମ୍ପଲ ପଠାଯାଇଥିବା ବିଭାଗ ସୂଚନା ପକ୍ଷରୁ ସୂଚନା ମିଳିଅଛି ।
ଜିଲ୍ଲା ମୁଖ୍ୟ କୃଷି ଅଧିକାରୀ ରାମ ଚନ୍ଦ୍ର ମୁଦୁଲିଙ୍କର ନେତୃତ୍ଵରେ ଆଜିର ଚଢାଉରେ କୋଡିଙ୍ଗା ଅତିରିକ୍ତ ତହସିଲଦାର ରାଜେନ୍ଦ୍ର ପ୍ରସାଦ ଭୂୟାଁ, ନବରଙ୍ଗପୁର ଅତିରିକ୍ତ ଜିଲ୍ଲା କୃଷି ଅଧିକାରୀ ଅନିଲ କୁମାର ପ୍ରହରାଜ, ପାପଡାହାଣ୍ଡି ଅତିରିକ୍ତ ଜିଲ୍ଲା କୃଷି ଅଧିକାରୀ ବିଶ୍ଵଜିତ ସାହୁ, କୋଷାଗୁମୁଡା ବ୍ଲକ କୃଷି ଅଧିକାରୀ ଦୁର୍ଯଧନ ଜାନି, ଅତିରିକ୍ତ ବ୍ଲକ କୃଷି ଅଧିକାରୀ ଲୋପାମୁଦ୍ରା ସାହୁ, କୋଡିଙ୍ଗା ଓଏଚଜି କାଳୁ ଚରଣ ସାହୁ ପ୍ରମୁଖ ସାମିଲ ରହିଥିଲେ ।
ଚଳିତ ବର୍ଷ ବ୍ଲକରେ ସରକାରଙ୍କ ଦ୍ଵାରା ଲାଇସେନ୍ସ ପ୍ରାପ୍ତ ୪୪ଟି ବିହନ ବିକ୍ରେତା ଓ ୪୪ଟି ଫେର୍ଟିଲାଇଜର ବିକ୍ରେତା ବିହନ ବିକ୍ରୟ ଦୋକାନ ଖୋଲିଥିବା ସରକାରୀ ରିପୋର୍ଟରେ ସୂଚନା ମିଳିଥିବା ବେଳେ ବିନା ଲାଇସେନ୍ସରେ ଗାଁ ଗାଁ ରେ ଛତୁ ଫୁଟିଲା ପରି ବିହନ ବିକ୍ରୟ ପ୍ରତି କୌଣସି ତାଲିମ କିମ୍ଭା ଅଭିଜ୍ଞତା ନଥିବା ବ୍ୟକ୍ତି ମାନେ ବେଆଇନ ଭାବେ ବିହନ ବିକ୍ରୟ କରୁଥିବା ସବୁବେଳେ ଅଭିଯୋଗ ହୋଇ ଆସୁଅଛି । କର୍ମଚାରୀ ଅଭାବ ଥିବା ଯୋଗୁଁ ବ୍ଲକ କୃଷି ବିଭାଗ କୌଣସି ଉପଯୁକ୍ତ ସମୟରେ କାର୍ଯ୍ୟନୁଷ୍ଠାନ ଗ୍ରହଣ କରୁନଥିବା ସାଧାରଣରେ ଚର୍ଚ୍ଚାର ବିଷୟ ପାଲଟିଛି ।
