ଚନ୍ଦନେଶ୍ୱର, ୦୫/୦୫ : ପଶ୍ଚିମବଙ୍ଗର ଦୀଘାରେ ନବ ପ୍ରତିଷ୍ଠିତ ଜଗନ୍ନାଥ ମନ୍ଦିରକୁ ନେଇ ବିବାଦ ଅଧିକ ଜଟିଳ ହେଉଛି । ପୁରୀ ମନ୍ଦିରରେ ନବକଳେବର ସମୟରେ ବଳିଥିବା ଦାରୁରୁ ଏଠାରେ ମୂର୍ତ୍ତି ନିର୍ମାଣ ପ୍ରସଙ୍ଗ ଜଗନ୍ନାଥପ୍ରେମୀଙ୍କ ମଧ୍ୟରେ ଅସନ୍ତୋଷ ବଢ଼ାଇଥିବା ବେଳେ ପୁଣି ଏକ ପରମ୍ପରା ବିରୋଧୀ ଘଟଣା ସାମ୍ନାକୁ ଆସିଛି । ଏଠାରେ ଗ୍ୟାସ୍ ଚୁଲାରେ ପ୍ରସାଦ ରନ୍ଧନ କରାଯାଉଥିବା ଦେଖାଯାଇଛି । ପୁରୀ ଜଗନ୍ନାଥ ମନ୍ଦିରରେ ମହାପ୍ରଭୁଙ୍କ ପାଇଁ କେବଳ କାଠ ଚୁଲାରେ ରୋଷେଇ କରାଯାଏ । ଗ୍ୟାସ୍ରେ ପ୍ରସ୍ତୁତ ଭୋଗ ମହାପ୍ରଭୁଙ୍କୁ ଲାଗି କରାଯିବା ନେଇ ଅନେକ ନାପସନ୍ଦ କରିଛନ୍ତି । ଏଠାରେ ମନ୍ଦିରରେ ସେବାପୂଜା ଦାୟିତ୍ୱ ଇସ୍କନ୍ ସେବାୟତଙ୍କୁ ଦିଆଯାଇଛି । ସେମାନେ ଗ୍ୟାସ୍ ଚୁଲାରେ ଭୋଗ ପ୍ରସ୍ତୁତ କରୁଛନ୍ତି । ଇସ୍କନ୍ ସଂସ୍ଥା ଢାଞ୍ଚାରେ ମହାପ୍ରଭୁଙ୍କ ନୀତିକାନ୍ତି କରାଯାଉଥିବା ଦେଖାଯାଇଛି । ପୁରୀର ଶ୍ରୀମନ୍ଦିର ପରମ୍ପରାର କାଣିଚାଏ ବି ନାହିଁ । ଯାହାକୁ ନେଇ ବିଭିନ୍ନ ମହଲରୁ ପ୍ରତିକ୍ରିୟା ପ୍ରକାଶ ପାଇଛି ।
ଅନ୍ୟପଟେ ରତ୍ନବେଦିରେ ପୂଜା ପାଉଥିବା ମୂର୍ତ୍ତି ପାଷାଣରେ ନିର୍ମିତ । ପଥରରେ ତିଆରି ଚତୁର୍ଦ୍ଧାମୂର୍ତ୍ତିଙ୍କ ପୂଜାକୁ ନେଇ ମଧ୍ୟ ବିବାଦ ଦେଖାଦେଇଛି । ତେବେ ସ୍ନାନଯାତ୍ରା ଓ ରଥଯାତ୍ରା ପାଇଁ ଅନ୍ୟ ବିଗ୍ରହ ନିର୍ମାଣ ହୋଇଛି । ଯାହା ନିମ୍ବ କାଠରେ ତିଆରି ହୋଇଥିବା କୁହାଯାଉଛି । ବିଶ୍ୱରେ ଶ୍ରୀଜଗନ୍ନାଥ ଏକମାତ୍ର ଏମିତି ଦିଅଁ, ଯିଏ ପ୍ରତ୍ୟକ୍ଷ ଭାବେ ରତ୍ନବେଦିରୁ ସ୍ନାନ ମଣ୍ଡପ ଓ ରଥକୁ ବିଜେ କରନ୍ତି । କିନ୍ତୁ ଏଠାରେ ମୂଳ ବିଗ୍ରହ ପଥରରେ ହୋଇଥିବାରୁ ବିକଳ୍ପ ଭାବେ ଚତୁର୍ଦ୍ଧାମୂର୍ତ୍ତିଙ୍କ ଅନ୍ୟ ବିଗ୍ରହ ନିର୍ମାଣ ହୋଇଛି । ଯାହାର ଉଚ୍ଚତା ଅଢ଼େଇରୁ ତିନି ଫୁଟ୍ ହେବ । ଏହି ମୂର୍ତ୍ତି ପୁରୀରେ ନବକଳେବର ବେଳେ ବଳକା ଦାରୁରୁ ନିର୍ମାଣ ହୋଇଥିବା ନେଇ ବିବାଦ ଉଠିଛି । ଯାହାକୁ ନେଇ ଅସନ୍ତୋଷ ପ୍ରକାଶ କରୁଛନ୍ତି ଜଗନ୍ନାଥ ପ୍ରେମୀ ।
କୋଟି କୋଟି ଓଡ଼ିଆଙ୍କ ମଉଡ଼ମଣି ତଥା ବିଶ୍ୱର ଠାକୁର ଶ୍ରୀଜଗନ୍ନାଥଙ୍କ ସେବାପୂଜାରେ ନୀତି ନିୟମକୁ ବେଖାତିର କରିବାକୁ ସହଜରେ ଗ୍ରହଣ କରୁନାହାନ୍ତି ଜଗନ୍ନାଥପ୍ରେମୀ । ଏଥିସହ ଭାରତ ବର୍ଷରେ ୪ଟି ଧାମ ମଧ୍ୟରୁ ପୁରୀରେ ରହିଛି ଶ୍ରୀଜଗନ୍ନାଥ ଧାମ । ଦୀଘା ମନ୍ଦିରକୁ ଜଗନ୍ନାଥ ଧାମ ନାମକରଣକୁ ନେଇ ମଧ୍ୟ ଅସନ୍ତୋଷ ବଢ଼ିଛି । ସୂଚନାଥାଉକି, ପବିତ୍ର ଅକ୍ଷୟ ତୃତୀୟାରେ ପଶ୍ଚିମବଙ୍ଗ ଦୀଘାରେ ନିର୍ମିତ ନୂତନ ଜଗନ୍ନାଥ ମନ୍ଦିର ପ୍ରତିଷ୍ଠା ହୋଇଥିଲା । ମନ୍ଦିର ପ୍ରତିଷ୍ଠା ପାଇଁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ପୁରୀର କେତେକ ଦଇତାପତିଙ୍କୁ ନିମନ୍ତ୍ରଣ କରିଥିଲେ । ଦଇତାପତି ନିଯୋଗ ସମ୍ପାଦକ ରାମକୃଷ୍ଣ ଦାସମହାପାତ୍ର ୭୦ରୁ ଅଧିକ ସେବାୟତଙ୍କୁ ନେଇ ସାମିଲ ହୋଇଥିଲେ । ସେହି ସମୟରେ ପଶ୍ଚିମ ବଙ୍ଗ ଗଣମାଧ୍ୟମକୁ ସାକ୍ଷାତକାରରେ ରାମକୃଷ୍ଣ ଦାସମହାପାତ୍ର କହିଥିଲେ, ପୁରୀର ନବକଳେବର ସମୟରେ ବଳକା ଦାରୁରୁ ଦୀଘା ମନ୍ଦିର ପାଇଁ ବିଗ୍ରହ ନିର୍ମାଣ କରି ସେ ଆଣିଛନ୍ତି । ପରେ ଏହାକୁ ନେଇ ବିବାଦ ଦେଖାଦେଇଥିଲା ।
ଏହି ଖବରଟିକୁ ପଢନ୍ତୁ-ଦୀଘା ଜଗନ୍ନାଥ ମନ୍ଦିର ବିବାଦ : ସାମାଜିକ ଗଣମାଧ୍ୟମରେ ଶ୍ରୀକ୍ଷେତ୍ରକୁ ବିରୋଧ
