ମୁମ୍ବାଇ: ବଲିଉଡ୍‌ର ସୁପରଷ୍ଟାର ଶାହରୁଖ ଖାନଙ୍କୁ ବଡ଼ ଆଶ୍ବସ୍ତି ମିଳିଛି । ଟ୍ୟାକ୍ସ ଚୋରି ମାମଲାରେ ଫସିଥିବା କିଙ୍ଗ ଖାନ ଦୋଷ ମୁକ୍ତ ହୋଇଛନ୍ତି । ୨୦୧୧ରେ ଶାହରୁଖ ଖାନଙ୍କ ଅଭିନୀତ ଚଳଚ୍ଚିତ୍ର ‘ରାଓ୍ବାନ୍‌’ ମୁକ୍ତିଲାଭ କରିଥିଲା । ଏହା ଫିଲ୍ମ ରିଲିଜ ହେବା ପରେ ଶାହରୁଖଙ୍କ ଉପରେ ଟିକସ ଚୋରି କରିଥିବା ନେଇ ଅଭିଯୋଗ ହୋଇଥିଲା । ଦୀର୍ଘ ୧୩ ବର୍ଷ ପରେ ଏହି ମାମଲାରେ କିଙ୍ଗ ଖାନଙ୍କ ସପକ୍ଷରେ ନିଷ୍ପତ୍ତି ଆସିଛି । ତାଙ୍କ ବିରୋଧରେ ହୋଇଥିବା ଅଭିଯୋଗ ଭିତ୍ତିହୀନ ଥିଲା ବୋଲି ପ୍ରମାଣିତ ହୋଇଛି ।

‘ରାଓ୍ବାନ’ ଚଳଚ୍ଚିତ୍ର ଶାହରୁଖଙ୍କ କମ୍ପାନୀ ରେଡ୍ ଚିଲିଜ୍ ବ୍ୟାନରରେ ନିର୍ମିତ ହୋଇଥିଲା। ଏହାର ଅର୍ଥ ହେଉଛି ସେ ଏହି ଫିଲ୍ମର ପ୍ରଯୋଜକ ଥିଲେ। ଏହି ଫିଲ୍ମକୁ ନେଇ କିଙ୍ଗ ଖାନ ଏବଂ ତାଙ୍କ କମ୍ପାନୀ ମଧ୍ୟରେ ଏକ ଚୁକ୍ତି ହୋଇଥିଲା ଯେ, ଫିଲ୍ମର ୭୦ ପ୍ରତିଶତ ସୁଟିଂ ବ୍ରିଟେନରେ କରାଯିବ। ଏପରି ପରିସ୍ଥିତିରେ, ବ୍ରିଟେନରେ ୭୦ ପ୍ରତିଶତ ଆୟକର ଦେବାକୁ ପଡ଼ିଥିଲା । ୨୦୧୧-୧୨ ବର୍ଷରେ, ଶାହରୁଖ ଖାନ ତାଙ୍କର ଆୟ ୮୩.୪୨ କୋଟି ଟଙ୍କା ଦର୍ଶାଇଥିଲେ । କିନ୍ତୁ ଆୟକର ବିଭାଗ ଶାହରୁଖ କମ୍ ଆୟ ଦେଖାଇଛନ୍ତି ବୋଲି କହିଥିଲେ । ପ୍ରାୟ ଚାରି ବର୍ଷ ପରେ ବିଭାଗ ଶାହରୁଖଙ୍କ ଟିକସ ହିସାବ କରି ୮୪.୧୪ କୋଟି ଟଙ୍କା ଦର୍ଶାଇଥିଲା ।  

ଏ ସମ୍ପର୍କରେ ମାମଲା ବହୁତ ଦିନ ଧରି ଚାଲିଥିଲା। ଏବେ ନିଷ୍ପତ୍ତି ଶାହରୁଖଙ୍କ ସପକ୍ଷରେ ଆସିଛି । ଆୟକର ଆପିଲେଟ୍ ଟ୍ରିବ୍ୟୁନାଲ୍ (ITAT) କହିଛନ୍ତି ଯେ, ଚାରି ବର୍ଷ ପରେ ଏହି ମାମଲାର ପୁନଃ ତଦନ୍ତ କରିବା ଠିକ୍ ନଥିଲା । ତଦନ୍ତ ପରେ ମଧ୍ୟ ଆୟକର ଅଧିକାରୀମାନେ କୌଣସି ଠୋସ୍ ପ୍ରମାଣ ଉପସ୍ଥାପନ କରିପାରିଲେ ନାହିଁ । ଏପରି ପରିସ୍ଥିତିରେ କିଙ୍ଗ୍ ଖାନ ଏହି ମାମଲା ଜିତି ଯାଇଛନ୍ତି । ସୂଚନାଯୋଗ୍ୟ, ଫିଲ୍ମ ସୁଟିଂ ଲାଗି କିଙ୍ଗ ଖାନ ବ୍ରିଟେନରେ ଟିକସ ଦେଉଥିଲେ । ସେତେବେଳେ ଏହା ଭାରତର ରାଜସ୍ବକୁ କ୍ଷତି ପହଞ୍ଚାଉଛି ବୋଲି ଅଭିଯୋଗ କରିଥିଲା ଆୟକର ବିଭାଗ । 

ସେପଟେ ଯଦି ଆମେ ଶାହରୁଖ ଖାନଙ୍କ ବୃତ୍ତିଗତ ଜୀବନ ବିଷୟରେ କହିବା ତେବେ ସେ ବହୁତ ଦିନ ଧରି ତାଙ୍କର ଆଗାମୀ ଫିଲ୍ମ 'କିଙ୍ଗ' ପାଇଁ ବ୍ୟସ୍ତ ଅଛନ୍ତି । ସିଦ୍ଧାର୍ଥ ଆନନ୍ଦଙ୍କ ନିର୍ଦ୍ଦେଶିତ ଏହି ଫିଲ୍ମରେ ତାଙ୍କ ଝିଅ ସୁହାନା ଖାନ ମଧ୍ୟ ଅଭିନୟ କରିଛନ୍ତି । ଏହି ଫିଲ୍ମଟି ୨୦୨୬ ରେ ସିନେମା ହଲରେ ମୁକ୍ତିଲାଭ କରିପାରେ ।