ମୁମ୍ବାଇ: ଦେବେନ୍ଦ୍ର ଫଡ଼ନାଭିସ୍, ଏକନାଥ ସିନ୍ଦେ ଏବଂ ଅଜିତ ପାଓ୍ବାର ମିଳିତ ଭାବରେ ମହାୟୁତି ସରକାର ଗଠନ ଲାଗି ରାଜ୍ୟପାଳଙ୍କ ନିକଟରେ ଦାବି କରିଛନ୍ତି । ଏହା ପରେ ୩ ନେତା ଏକାଠି ବସି ସାମ୍ବାଦିକ ସମ୍ମିଳନୀ କରିଥିଲେ । ଦେବେନ୍ଦ୍ର ଫଡ଼ନାଭିସଙ୍କ ସହ ସନ୍ଦେ ଏବଂ ପାଓ୍ବାର ଉପମୁଖ୍ୟମନ୍ତ୍ରୀ ଭାବରେ ଶପଥ ନେବେ କି ବୋଲି ସାମ୍ବାଦିକମାନେ ଏକାନଥ ସିନ୍ଦେଙ୍କୁ ପ୍ରଶ୍ନ କରିଥିଲେ । ଏହାର ଜବାବରେ ସିନ୍ଦେ କହିଥିଲେ, ଆପଣମାନେ ଏତେ ତରବର କାହିଁକି ହେଉଛନ୍ତି । ଆସନ୍ତାକାଲି ଶପଥ ଗ୍ରହଣ ଉତ୍ସବ ଅନୁଷ୍ଠିତ ହେବ ତାପୂର୍ବରୁ ସବୁକିଛି ସ୍ପଷ୍ଟ ହୋଇଯିବ । ଏତିକି ବେଳେ ଅଜିତ ପାଓ୍ବାର କହିଥିଲେ, ‘ମୁଁ ତ ଶପଥ ନେବା ନିଶ୍ଚିତ କିନ୍ତୁ ସିନ୍ଦେଙ୍କ କଥା ସେ ନିର୍ଣ୍ଣୟ କରିବେ ।’
ଅଜିତ୍ ପାୱାରଙ୍କ ଏଭଳି ମନ୍ତବ୍ୟ ଶୁଣି ଉପସ୍ଥିତ ନେତା ଏବଂ ସାମ୍ବାଦିକମାନେ ଜୋରରେ ହସିବାକୁ ଲାଗିଥିଲେ । ଏକନାଥ ସିନ୍ଦେ ମଧ୍ୟ ହସ ହସରେ ଅଜିତ୍ ପାୱାରଙ୍କୁ କଟାକ୍ଷ କରିଥିଲେ । ସିନ୍ଦେ କହିଥିଲେ, ‘ଅଜିତ ଦାଦାଙ୍କୁ ଶପଥ ନେବାର ଅନୁଭବ ରହିଛି । ସକାଳେ ଏବଂ ସନ୍ଧ୍ୟାରେ ଶପଥ ନେବାର ଅନୁଭବ ତାଙ୍କ ପାଖରେ ରହିଛି ।’ ଉଲ୍ଲେଖଯୋଗ୍ୟ ଯେ, ଅଜିତ ପାୱାର ଏବଂ ଦେବେନ୍ଦ୍ର ଫଡ଼ନାଭିସ୍ ୨୦୧୯ ନିର୍ବାଚନ ପରିଣାମ ଆସିବା ପରେ ସକାଳରେ ଆୟୋଜିତ ଉତ୍ସବରେ ଶପଥ ନେଇଥିଲେ । ଦେବେନ୍ଦ୍ର ଫଡ଼ନାଭିସ ମୁଖ୍ୟମନ୍ତ୍ରୀ ଏବଂ ଅଜିତ୍ ପାୱାର ଉପମୁଖ୍ୟମନ୍ତ୍ରୀ ଶପଥ ନେଇଥିଲେ । ତେବେ ଅଜିତ୍ ପାୱାର ତାଙ୍କ ଦଳର ବିଧାୟକଙ୍କ ସମର୍ଥନ ହାସଲ କରିପାରି ନଥିଲେ । ଏହି କାରଣରୁ ସରକାର ୩ ଦିନରେ ଭାଙ୍ଗି ଯାଇଥିଲା । ପରେ ଉଦ୍ଧବ ଠାକରେଙ୍କ ନେତୃତ୍ୱରେ ମହାବିକାଶ ଅଘାଡ଼ି ସରକାର ଗଠନ କରିଥିଲା ।
୨୦୨୨ରେ ମହାଅଘାଡ଼ି ସରକାର ଭାଙ୍ଗିଗଲା ଏବଂ ଏକନାଥ ସିନ୍ଦେଙ୍କ ନେତୃତ୍ୱରେ ମହାୟୁତି ସରକାର ହେଲା । ପରେ ମହାୟୁତି ସରକାରରେ ଏନସିପିର ୪୦ ବିଧାୟକଙ୍କୁ ଧରି ସାମିଲ ହୋଇଥିଲେ ଅଜିତ୍ ପାୱାର । ଏହାସହ ରାଜ୍ୟର ଉପମୁଖ୍ୟମନ୍ତ୍ରୀ ଭାବେ ସନ୍ଧ୍ୟାରେ ଶପଥ ନେଇଥିଲେ । ଦେବେନ୍ଦ୍ର ଫଡ଼ନାଭିସ୍ଙ୍କ ନେତୃତ୍ୱରେ ଆଗାମୀ ମହାରାଷ୍ଟ୍ର ସରକାରରେ ବି ଅଜିତ୍ ପାୱାର ଉପମୁଖ୍ୟମନ୍ତ୍ରୀ ହେବେ ।
