ନୂଆଦିଲ୍ଲୀ: ଇଣ୍ଡୋନେସିଆରେ ଏକ ବଡ଼ ଦୁର୍ଘଟଣା ଘଟିଛି। ରିପୋର୍ଟ ଅନୁସାରେ, ଏକ ଯାତ୍ରୀବାହୀ ଜାହାଜରେ ଭୟଙ୍କର ଅଗ୍ନିକାଣ୍ଡ ଘଟିଥିଲା ଏବଂ ଯାତ୍ରୀମାନେ ଜାହାଜରୁ ଡେଇଁ ପଡ଼ିଥିଲେ। ଉତ୍ତର ସୁଲାୱେସିର ତାଲିସ୍ ଦ୍ୱୀପ ନିକଟରେ କେଏମ ବାର୍ସେଲୋନା VA ଜାହାଜରେ ହଠାତ୍ ନିଆଁ ଲାଗିଯାଇଥିଲା । ଏହା ପରେ ଯାତ୍ରୀମାନେ ନିଜ ଜୀବନ ବଞ୍ଚାଇବା ପାଇଁ ଜାହାଜରୁ ଡେଇଁ ପଡ଼ିଥିଲେ । ଅନେକ ଯାତ୍ରୀ ଭୟଙ୍କର ଦୃଶ୍ୟକୁ ନିଜ ଫୋନରେ କଏଦ ମଧ୍ୟ କରିଛନ୍ତି । ଜାହାଜରେ ୨୮୦ ରୁ ଅଧିକ ଲୋକ ଥିଲେ ।
ଅଗ୍ନିକାଣ୍ଡ ପରେ, ଭୟଭୀତ ଯାତ୍ରୀମାନେ ନିଆଁରୁ ରକ୍ଷା ପାଇବା ପାଇଁ ସମୁଦ୍ରକୁ ଡେଇଁପଡ଼ିଥିବା ଦେଖାଯାଇଥିଲା । ଜାହାଜରେ ଅନେକ ପିଲା ମଧ୍ୟ ଥିଲେ । ଅଗ୍ନିକାଣ୍ଡର କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ ଏବଂ କୌଣସି ମୃତାହତ ନେଇ ସୂଚନା ମିଳି ନାହିଁ । ଭାଇରାଲ୍ ଭିଡିଓରେ, ଜାହାଜରେ ଥିବା ଲୋକମାନେ ଜୀବନ ବଞ୍ଚାଇବା ପାଇଁ ସମୁଦ୍ରକୁ ଡେଇଁପଡ଼ୁଥିବାର ଦେଖାଯାଉଛି । ସେମାନଙ୍କ ମଧ୍ୟରୁ ଅଧିକାଂଶ ଜୀବନ ସୁରକ୍ଷା ଜ୍ୟାକେଟ୍ ପିନ୍ଧିଥିଲେ, କିନ୍ତୁ କିଛି ପିନ୍ଧି ନଥିଲେ । ଅନେକ ଯାତ୍ରୀ ଜ୍ୟାକେଟ୍ ବିନା ସମୁଦ୍ରକୁ ଡେଇଁ ପଡ଼ିଥିଲେ। ନିଆଁଠାରୁ ପ୍ରାୟ ୧୦ ରୁ ୧୫ ମିଟର ଦୂରରେ ଥିବା ଜଣେ ମହିଳାଙ୍କ ଦ୍ୱାରା ଉତ୍ତୋଳନ କରାଯାଇଥିବା ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ୍ ହେବାରେ ଲାଗିଛି ।
ଜାହାଜରେ ଥିବା ଲୋକ ଭୟରେ ଚିତ୍କାର କରୁଥିବା ମଧ୍ୟ ଶୁଣିବାକୁ ମିଳୁଛି । ଜାହାଜଟି ହୁତୁ ହୁତୁ ହୋଇ ଜଳୁଥିବା ବେଳେ ଏଥିରୁ ନିର୍ଗତ ଧୂଆଁ ବହୁ ଉଚ୍ଚକୁ ବ୍ୟାପିଥିଲା । ଘନ କଳା ଧୂଆଁ ଆକାଶକୁ ଉଠୁଥିବା ଭିଡିଓରେ ଦେଖାଯାଉଛି। ନିକଟସ୍ଥ ଦ୍ୱୀପରୁ ଯାଉଥିବା ଅନେକ ମାଛ ଧରିବା ଡଙ୍ଗା ପାଣିରୁ କିଛି ଲୋକଙ୍କୁ ଉଦ୍ଧାର କରି ସେମାନଙ୍କ ଡଙ୍ଗାରେ କୂଳକୁ ଆଣିଥିଲେ ।
