ବର୍ତ୍ତମାନର ଅବ୍ୟବସ୍ଥିତ ଜୀବନଶୈଳୀ ଓ ଖରାପ ଖାଦ୍ୟପେୟ ଯୋଗୁଁ ବିଭିନ୍ନ ପ୍ରକାର ରୋଗ ଦେଖାଦେଉଛି। ସେହିପରି କିଛି ଲୋକ ଚାଲିବା କିମ୍ବା ସିଢ଼ି ଚଢିବା ବେଳେ କଷ୍ଟ ଅନୁଭବ କରିଥାନ୍ତି । ନିଶ୍ବାସ ନେବାରେ ସମସ୍ୟା ହୋଇଥାଏ । ଆଉ ଏପରି ସ୍ଥଳେ ଅନେକ ଲୋକଙ୍କ ମନରେ ପ୍ରଶ୍ନ ଆସିଥାଏ ଯେ କାହିଁକି ଏପରି ହେଉଛି। ତେବେ ଆସନ୍ତୁ ଜାଣିବା ଚାଲିବା କିମ୍ବା ସିଢ଼ି ଚଢିବା ସମୟରେ କାହିଁକି ନିଶ୍ବାସ ନେବାରେ କଷ୍ଟ ହୋଇଥାଏ।
ତେବେ ସିଢ଼ି ଚଢିବା କିମ୍ବା ଚାଲିବା ସମୟରେ ନିଶ୍ବାସ ଫୁଲିବା ପଛରେ ଅନେକ କାରଣ ରହିଛି । ଆପଣ ଜୋରରେ ଚାଲିଲେ ହେଉ କି ଦୌଡ଼ିଲେ ନିଶ୍ବାସ ଫୁଲିବା ସାଧାରଣ କଥା । ହେଲେ ଯଦି ଆପଣ ଧିରେ ଧିରେ ଚାଲୁଛନ୍ତି କିନ୍ତୁ ତଥାପି ନିଶ୍ବାସ ଫୁଲୁଛି ତେବେ ଏହା କେତେକ ସ୍ବାସ୍ଥ୍ୟ ସମସ୍ୟାର ଲକ୍ଷଣ ହୋଇପାରେ । ଯେପରିକି ବ୍ଲଡପ୍ରେସର ସମସ୍ୟା,ହୃଦ ଜନିତ ରୋଗ , କିଡନୀ ସମସ୍ୟା ,ନିମୋନିଆ, ଟିବି, ସଂକ୍ରମଣ କିମ୍ବା ଆସ୍ଥାମା ଥିଲେ ଏହି କାରଣରୁ ସିଡି ଚଢିଲେ କଷ୍ଟ ଲାଗିଥାଏ । ସେହିପରି ମହିଳା ଓ ଛୁଆଙ୍କ ମଧ୍ୟରେ ରକ୍ତ ଅଭାବରୁ ନିଶ୍ବାସ ଫୁଲିବା ସମସ୍ୟା ହୋଇପାରେ । ହେଲେ ଯଦି ଆପଣଙ୍କୁ ଲଗାତାର ଚାଲିବା କିମ୍ବା ସିଡି ଚଢିବା ସମୟରେ ନିଶ୍ବାସ ନେବାରେ କଷ୍ଟ ହେଉଛି ତେବେ ଡାକ୍ତରଙ୍କ ପରାମର୍ଶ ନେବା ଆବଶ୍ୟକ ।
ସେହିପରି ଏନେଇ ଖାଦ୍ୟପେୟ ପ୍ରତି ସତର୍କ ରହିବା ଜରୁରୀ ଅଟେ। ଲୁଣ, ମିଠା, ତେଲ ଛଣା ଖାଦ୍ୟ ଖାଇବାରୁ ଦୂରେଇ ରୁହନ୍ତୁ । ଏହାଦ୍ବାରା ବିପି ଓ ଡାଇବେଟିସ ଆଶଙ୍କା ବଢିଥାଏ । କାଶ କିମ୍ବା ଆସ୍ଥାମା ସମସ୍ୟା ଥିଲେ ଔଷଧ ଖାଆନ୍ତୁ । ସେହିପରି ଶୀତଦିନେ ମାସ୍କ ବ୍ୟବହାର କରନ୍ତୁ । ପ୍ରତିଦିନ ଯୋଗ, ବ୍ୟାୟମ କରି ନିଜକୁ ସୁସ୍ଥ ରଖନ୍ତୁ । ଆଉ ଯେଉଁ ଲୋକଙ୍କ ହାର୍ଟ, ବ୍ଲଡପ୍ରେସର, ଫୁସଫୁସ ଜନିତ ସମସ୍ୟା ଅଛି, ସେମାନେ ନିୟମିତ ଔଷଧ ସେବନ କରିବା ଉଚିତ୍ ।
