ପୁରୀ,୨୦/୦୯: ଶ୍ରୀମନ୍ଦିରରେ ହାଉଯାଉ ହେଉଛି ମହାପ୍ରଭୁଙ୍କ ନକଲି ପୁଷ୍ପ ଅଳଙ୍କାର । ଘର ତଥା ଅନୁଷ୍ଠାନର ମଙ୍ଗଳ ପାଇଁ ଅଧିକ ଟଙ୍କା ଦେଇ ଦାରୁଦିଅଁଙ୍କ ଗୁଣା ଓ ଝୁମ୍ପା ଆଦି ପୁଷ୍ପ ଅଳଙ୍କାର ନେବାକୁ ଭକ୍ତ ପ୍ରତିଯୋଗିତା କରୁଛନ୍ତି । ଏହାର ସୁଯୋଗ ନେଇ ଯିଏ ଯେମିତି ପାରିଲା ଭକ୍ତର ବିଶ୍ୱାସରେ ବିଷ ଦେଇ ନକଲି ଅଳଙ୍କାର ବିକୁଛନ୍ତି । ମହାପ୍ରଭୁଙ୍କ ନାମରେ ଏସବୁ ନକଲି ଅଳଙ୍କାରର କଳାବଜାର ଖୋଲିଛି । ଗୋଟିଏ ପୁଷ୍ପ ଅଳଙ୍କାରକୁ ୫ଶହରୁ ୨ହଜାର ଭଳି ଟଙ୍କା ନିଆଯାଉଛି । ଏହାଦ୍ୱାରା କେବଳ ଭକ୍ତଙ୍କୁ ବିଶ୍ୱାସଘାତ ନୁହେଁ ମହାପ୍ରଭୁଙ୍କ ଅସଲ ମହିମା ମଧ୍ୟ କ୍ଷୁଣ୍ଣ ହୋଇଛି । ମହାପ୍ରଭୁଙ୍କ ପୁଷ୍ପଅଳଙ୍କାର ବିକାକିଣାକୁ ନେଇ ଶ୍ରୀମନ୍ଦିରରେ ଚାପା ଅସନ୍ତୋଷ ଅନେକ ଦିନରୁ ଦେଖାଗଲାଣି । ଏନେଇ ପୁଷ୍ପାଳକ ନିଯୋଗ ପକ୍ଷରୁ ଲିଖିତାକାରେ ଶ୍ରୀମନ୍ଦିର ପ୍ରଶାସନକୁ ଜଣାଯାଇଛି । ହେଲେ ପ୍ରଶାସକ ଏନେଇ ମୁଣ୍ଡ ନଖେଳାଇବାରେ ଏହି ପ୍ରସଙ୍ଗ ଉଗ୍ର ରୂପ ନେବାଭଳି ପରିସ୍ଥିତି ସୃଷ୍ଟି ହେଲାଣି ।
ଅସଲି ଭକ୍ତଙ୍କୁ ନକଲି ପୁଷ୍ପଅଳଙ୍କାର ବିକ୍ରି ଏବେ ସୀମାପାର କରିଥିବା ଅଭିଯୋଗ ହୋଇଛି । ଜଗନ୍ନାଥଙ୍କ ଲାଗି ନାମରେ ଠାକୁରଙ୍କ ପୁଷ୍ପ ଅଳଙ୍କାର ବିକ୍ରୟ ଏବେ ଲାଭଜନକ ବ୍ୟବସାୟ ପାଲଟିଛି । ପାଶ୍ୱର୍ ଦେବତାଙ୍କୁ ଲାଗି କରି ଯିଏ ଯେତେ ପାରିଲା ଚଢ଼ା ଦରରେ ବିକ୍ରୟ କରୁଛନ୍ତି । ଅଧିକାଂଶ ଭକ୍ତ ଜାଣନ୍ତି ଏସବୁ ଅଳଙ୍କାର ମହାପ୍ରଭୁଙ୍କୁ ଲାଗି ହେଉଛନ୍ତି । ଏଣୁ ସମର୍ପଣ ଭାବ ଓ ଆଗ୍ରହରେ ଏସବୁ ଅଳଙ୍କାରର ମୂଲ୍ୟ ସେବକଙ୍କୁ ଦେଇ ଭକ୍ତ ସଂଗ୍ରହ କରୁଛନ୍ତି । ଶ୍ରୀମନ୍ଦିର ପଶ୍ଚିମ ଦ୍ୱାର ଓ ଦକ୍ଷିଣଦ୍ୱାର ଉପବନରେ ମହାପ୍ରଭୁଙ୍କ ପୁଷ୍ପ ଅଳଙ୍କାର ତିଆରି ହୋଇ ଠାକୁରଙ୍କୁ ଲାଗି ହୁଏ । ହେଲେ ଅଧିକ ସଂଖ୍ୟକ ଅଳଙ୍କାର ସବୁ ବିଭିନ୍ନ ସ୍ଥାନରେ ତିଆରି କରାଇ ଶ୍ରୀମନ୍ଦିର ବେଢ଼ା ଦେବତାଙ୍କୁ ଲାଗି କରି ଭକ୍ତର ଭାବାବେଗ ସଙ୍ଗେ ଖେଳୁଥିବା ଅଭିଯୋଗ ହେଉଛି ।
ବରିଷ୍ଠ ସେବକମାନେ କୁହନ୍ତି, ଶ୍ରୀମୁଖରେ ଠାକୁରେ ଲାଗି ହୁଅନ୍ତି ଗୁଣା, ଝୁମ୍ପା ଓ ଅଧର । ମହାପ୍ରଭୁଙ୍କ ଯେତେ ଧୂପ ଓ ଆଳତି ସେତେ ବେଶ । ଶ୍ରୀବିଗ୍ରହଙ୍କ ବଡ଼ସିଂହାର ବେଶ ଉଲାଗି ପରେ ପୁଷ୍ପ ଅଳଙ୍କାର ଦେବତାଙ୍କୁ ସମର୍ପଣ କରାଯାଏ । ଯଥାରୀତି ମା’ ବିମଳା, ଦେବୀ ଭୁବନେଶ୍ୱରୀ ଓ ମହାଲକ୍ଷ୍ମୀଙ୍କୁ ଦିଆଯିବାର ଶ୍ରୀମନ୍ଦିର ପରମ୍ପରା ରହିଛି । ଭକ୍ତଙ୍କ ଆଗ୍ରହ ବଢ଼ିବାରେ ଆଜିକାଲି ଏହା ଏକ ବ୍ୟବସାୟରେ ପରିଣତ ହୋଇଗଲା । ପୁଣି ଦାରୁବ୍ରହ୍ମଙ୍କ ଉଲାଗି ପୁଷ୍ପ ଅଳଙ୍କାରରେ ଶ୍ରୀମନ୍ଦିର ପରମ୍ପରା ଅନୁସାରେ ସିଂହାରୀ ସେବକ ଓ ଖୁଣ୍ଟିଆ ସେବକଙ୍କ ହକ୍ ରହିଥାଏ ।
ମହାପ୍ରଭୁଙ୍କ ଜିନିଷ ବୋଲି ଗୃହ ତଥା ଅନୁଷ୍ଠାନର ମଙ୍ଗଳ ପାଇଁ ଭକ୍ତ ଯଥାସାଧ୍ୟ ମୂଲ୍ୟ ଦେଇ ନିଅନ୍ତି। ହେଲେ ନକଲି ପୁଷ୍ପ ଅଳଙ୍କାର ବିକ୍ରି ନେଇ ଆଖିବୁଜା ବ୍ୟବସାୟ ଆରମ୍ଭ ହେବାରେ ବିବାଦୀୟ ପରିସ୍ଥିତି ସୃଷ୍ଟି ହୋଇଛି । ଏନେଇ ପୁଷ୍ପାଳକ ନିଯୋଗ ପକ୍ଷରୁ ଲିଖିତାକାରେ ଶ୍ରୀ ଜଗନ୍ନାଥ ମନ୍ଦିର ପ୍ରଶାସନକୁ ଜଣାଯାଇଛି । ଏନେଇ ଶ୍ରୀମନ୍ଦିର ନୀତି ପ୍ରଶାସକଙ୍କ ସଙ୍ଗେ ଯୋଗାଯୋଗ କରାଯାଇଥିଲେ ସୁଦ୍ଧା ତାଙ୍କ ପ୍ରତିକ୍ରିୟା ମିଳିନାହିଁ ।
