ଭୁବନେଶ୍ୱର,୧୩/୦୧: ସୋମବାର ପୌଷ ପୂର୍ଣ୍ଣିମା ଅବସରରେ ମହାପ୍ରଭୁ ଶ୍ରୀଲିଙ୍ଗରାଜଙ୍କ ପୁଷ୍ୟାଭିଷେକ ନୀତି କରାଯିବ । ଭୋଗମଣ୍ଡପ ନୀତି ବଢିବା ପରେ ବଡୁ ସେବାୟତ ମାନେ ତୀର୍ଥ ପୁଷ୍କରିଣୀ ବିନ୍ଦୁ ସାଗରରୁ ୧୦୮ ଗରା ପାଣି ଉତ୍ତୋଳନ କରି ମନ୍ଦିରକୁ ଆଣିବେ । ବେହେରାଣ ମଣ୍ଡପରେ ପୂଜାପଣ୍ଡାଙ୍କ ଦ୍ୱାରା ଅଧିବାସ କରାଯିବା ପରେ ଅଭିଷେକ ନୀତି ବଢି ଠାକୁରଙ୍କୁ ବେଶ ଓ ଭାଗ ଲାଗି ହେବ ।
ସେହିପରି ସନ୍ଧ୍ୟାଧୂପ ପରେ ମକର ନୀତିର ଆଦ୍ୟ ପର୍ବ ନବାଙ୍କ ବେଢା ଆରମ୍ଭ ହେବ । ସେବାୟତମାନେ ମେଘ ଡମ୍ବରୁ ଶୋଭାଯାତ୍ରା ସହ ସାମନ୍ତରାଙ୍କ ଘରକୁ ଯାଇ ଖିର ଆଣିବେ । ସେହି ଖିରକୁ ଆଉଟା ଯାଇ ଦୁଗ୍ଧ ଘରେ ସଂରକ୍ଷଣ ରଖାଯିବ ।ସଂକ୍ରାନ୍ତିରେ ଖିରକୁ ବ୍ୟବହାର କରି ମକର ଚାଉଳ ପ୍ରସ୍ତୁତ ହୋଇ ଦିଅଁଙ୍କ ଠାରେ ଲାଗି ହେବ ବୋଲି ନୀତି ସୁପରଭାଇଜର ରାଜ କିଶୋର ମହାପାତ୍ର ଓ ବଡୁ ସେବାୟତ ମୌସମ ବଡୁ ସୂଚନା ଦେଇଛନ୍ତି।
