ପୁରୀ,୨୮/୦୭: ଅଗଷ୍ଟ ୪ ତାରିଖ ସୋମବାରଠାରୁ ଶ୍ରୀକ୍ଷେତ୍ରରେ ଆରମ୍ଭ ହେବାକୁ ଯାଉଛି ଝୁଲଣ ଯାତ୍ରା । ଠାକୁରଙ୍କ ଏହା ହେଉଛି ବର୍ଷାକାଳୀନ ରାହାସ ଉତ୍ସବ । ଶ୍ରୀମନ୍ଦିର ମୁକ୍ତିମଣ୍ଡପ କୁଞ୍ଜରେ ଝୁଲିବେ ଶ୍ରୀମଦନମୋହନଙ୍କ ସହ ଲକ୍ଷ୍ମୀ ଓ ସରସ୍ୱତୀ । ବୃନ୍ଦାବନରେ ଶ୍ରୀକୃଷ୍ଣଙ୍କ ଲୀଳା ସ୍ମରଣେ ଚଳଚଞ୍ଚଳ ହେବ ମଠ ମନ୍ଦିର । ସୁସଜ୍ଜିତ ଝୁଲଣ କୁଞ୍ଜରେ ବିଜେ ହେବେ ଦେବଦେବୀ । ଶ୍ରଦ୍ଧାଳୁମାନେ ଦେବଦେବୀଙ୍କୁ ଦର୍ଶନ କରିବା ସହ ଝୁଲଣ ସଜାର ଆନନ୍ଦ ନେବେ ।
ଆଉ ମାତ୍ର ସପ୍ତାହକ ପରେ ଝୁଲଣ ଯାତ୍ରା । କୁଞ୍ଜକାନନର ପଶୁପକ୍ଷୀଙ୍କ କଳରବ ମଧ୍ୟରେ ଠାକୁରେ ଝୁଲୁଥିବେ । ଯାତ୍ରା ପାଇଁ ଶ୍ରୀମନ୍ଦିର ସମେତ ମଠବାଡ଼ିରେ ପ୍ରସ୍ତୁତି ଚାଲିଛି । ମୁକ୍ତିମଣ୍ଡପରେ ଝୁଲଣ ମଣ୍ଡପରେ ସଜାସଜି ସମ୍ପନ୍ନ ହେବ । ମହୋତ୍ସବ ପାଇଁ ଶ୍ରୀମନ୍ଦିରରେ ଅନୁଷ୍ଠିତ ହେବ ସ୍ୱତନ୍ତ୍ର ନୀତି । ମହାପ୍ରଭୁଙ୍କ ମଧ୍ୟାହ୍ନଧୂପ ପରେ ତିନି ବାଡ଼ରେ ସର୍ବାଙ୍ଗ ଲାଗି ଓ ବେଶ ହେବ । ମହାଜନମାନେ ସିଂହାସନରୁ ଲକ୍ଷ୍ମୀ ସରସ୍ୱତୀଙ୍କୁ ଓ ଦକ୍ଷିଣଘରୁ ମଦନମୋହନଙ୍କୁ ଆଣି ବିଜେ କରାଇବେ । ପୂଜାପଣ୍ଡା ସାମନ୍ତ ମାଣ୍ଡୁଅ ଭୋଗ ଅର୍ପଣ କରିବେ । ତିନି ବାଡ଼ରେ ଆଳତି ହେବ । ଏହାପରେ ତିନି ମୂର୍ତ୍ତିଙ୍କୁ ଝୁଲଣମଣ୍ଡପ ଦୋଳିକୁ ଅଣାଯିବ ।
୭ ଦିନ ବ୍ୟାପି ଚାଲିବ ଯାତ୍ରା । ଦ୍ୱାପର ଯୁଗ ଆଧାରିତ ଶ୍ରୀକୃଷ୍ଣ ଲୀଳା ଓ ପ୍ରକୃତିର ରଙ୍ଗରୂପ ପ୍ରସ୍ତୁତ ହେଉଛି । ପାରମ୍ପରିକ କାରିଗରିର ଜରିଜମ୍ଭୁରା ସାଜରେ ଝଲସିବ କୁଞ୍ଜ । ଏଭଳି କାରିଗରି କାମ ପୁରୀରେ ସ୍ୱତନ୍ତ୍ର । କୁଞ୍ଜରେ ଶୁଆଶାରୀ, ବଣିପାରା, ଗୁଣ୍ଡୁଚି ମୂଷା, ଗାଈ, ମାଙ୍କଡ ଆଦି ମୂର୍ତ୍ତି ଖଞ୍ଜାଯାଉଛି । ଜୀବଜନ୍ତୁଙ୍କ ଛାଞ୍ଚରେ ସୋଲପଟିରେ କାଗଜ ଗୁଡ଼ାଯାଇ ରଙ୍ଗ ଦିଆଯାଏ । କାରିଗରମାନେ ମଠରେ ଥିବା ସାଜକୁ ସଜାଡ଼ି କୁଞ୍ଜ ନିର୍ମାଣରେ ଲାଗିଛନ୍ତି । ୧୦ ତାରିଖ ରବିବାର ବଡ଼ଦେଉଳରେ ଝୁଲଣ ଯାତ୍ରା ଶେଷ ହେବ ।
