ପୁରୀ ୧୭/୧୨: ଶ୍ରୀମନ୍ଦିରରେ ରତ୍ନଭଣ୍ଡାର ମରାମତି ପାଇଁ ପହଞ୍ଚିଲେ ଏଏସଆଇ ଟିମ୍। ଏଏସଆଇ ଅଧିକ୍ଷକ ଡି.ବି ଗଡ଼ନାୟକଙ୍କ ସହ ଏଏସଆଇ କର୍ମଚାରୀ ସାମିଲ୍ ହୋଇଛି। ଏଏସ୍ଆଇ ଅଧିକାରୀ ଓ କର୍ମଚାରୀମାନେ ଏସ୍ଓପି ପାଳନ କରି ରତ୍ନଭଣ୍ଡାର ଭିତରେ ପ୍ରବେଶ କରିବେ । ପ୍ରଥମ ଦିନ ଭିତର ଓ ବାହାର ରତ୍ନଭଣ୍ଡାରରେ ଭାରା ବନ୍ଧାଯିବ । ଭାରାରେ ଚଢ଼ି ଏଏସ୍ଆଇ ଅଧିକାରୀମାନେ ସ୍ଥିତିକୁ ନିରୀକ୍ଷଣ କରିବା ପରେ ଛାତ, କାନ୍ଥ ଓ ଚଟାଣରୁ ପ୍ଲାଷ୍ଟର ଛଡ଼ାଯିବ । ପଥରର ସଂଯୋଗ ସ୍ଥଳଗୁଡ଼ିକର ସ୍ଥିତି ଦେଖି ଆବଶ୍ୟକ ମରାମତି ଏବଂ ସଂରକ୍ଷଣ କରାଯିବ । ୧୫ ଜଣ କର୍ମଚାରୀ ପ୍ରଥମ ଦିନରେ ନିୟୋଜିତ ରହିବେ। ପରେ ଆବଶ୍ୟକ ଅନୁସାରେ କୁଶଳୀ ଓ ଅଣକୁଶଳୀ ଶ୍ରମିକ ରତ୍ନଭଣ୍ଡାର ସଂରକ୍ଷଣ ଓ ମରାମତି କାମରେ ନିୟୋଜିତ ହେବେ।
ଭିତର ଓ ବାହାର ରତ୍ନଭଣ୍ଡାର କାନ୍ଥ ଏବଂ ଛାତରେ କିଛି ଅଂଶରେ ସିମେଣ୍ଟ ପ୍ଲାଷ୍ଟର ରହିଛି । ଏହାକୁ ପ୍ରଥମେ ଛଡ଼ାଯିବ । ଖରାପ ପଥରକୁ ବଦଳାଯିବ । ପଥରକୁ ପଥର ସଂଯୋଗ କରୁଥିବା ସ୍ଥାନକୁ ପୁନଃ ପ୍ଲାଷ୍ଟର କରାଯିବ । ଆବଶ୍ୟକ କେମିକାଲ ପ୍ରଲେପ ଦିଆଯିବ । ପରେ ଚଟାଣରେ ଥିବା ସିମେଣ୍ଟ ପ୍ଲାଷ୍ଟରକୁ ଛଡ଼ାଯିବ । ପୂରା ରତ୍ନଭଣ୍ଡାର ଖଣ୍ଡୋଲାଇଟ୍ ପଥରରେ ନିର୍ମିତ ହୋଇଛି । ଏହାର କାନ୍ଥ, ଛାତ ଓ ଚଟାଣରେ ମୋଟା ଖଣ୍ଡୋଲାଇଟ୍ ପଥର ପଡ଼ିଛି । ଚଟାଣରେ କଳାମୁଗୁନି ପଥର ପକାଇବାକୁ ଯୋଜନା ରହିଛି । ସେହିପରି ରତ୍ନଭଣ୍ଡାର ଭିତରେ କାନ୍ଥ ଓ ଛାତକୁ ଧରି ରଖିଥିବା ପୁରୁଣା ପିଟା ଲୁହା କଳଙ୍କି ଲାଗି ଯାଇଥିବାରୁ ଏହାକୁ କାଢ଼ି ବଦଳାଇ ଦିଆଯିବ । ପୁରୁଣା ପିଟା ଲୁହା ସ୍ଥାନରେ ଷ୍ଟେନ୍ଲେସ୍ ଷ୍ଟିଲ୍ର ଶକ୍ତ ଲୁହା ବିମ୍ ଦିଆଯିବ । ଏଥିନିମନ୍ତେ ଏଏସ୍ଆଇ ପକ୍ଷରୁ ୧୨ ଏମ୍ଏମ୍ ଓ ୧୬ ଏମ୍ଏମ୍ର ଷ୍ଟେନଲେସ୍ ଷ୍ଟିଲ୍ ପ୍ଲେଟ୍ ମଗାଇ ରଖାଯାଇଛି । ପ୍ଲେଟକୁ ବ୍ୟବହାର କରି ଆବଶ୍ୟକ ମୁତାବକ ବିମ୍ ତିଆରି କରାଯିବ ଓ ଭାରା ଦିଆଯିବ ।
