ପୁରୀ,୧୩/୦୧: ସୋମବାର ପୌଷ ପୂର୍ଣ୍ଣିମାରେ ଶ୍ରୀମନ୍ଦିରରେ ଦେବାଭିଷେକ ନୀତି ପାଳନ ଅବସରରେ ମହାପ୍ରଭୁଙ୍କ ରାଜାଧିରାଜ ବେଶ ସହ ମକର ସଂକ୍ରାନ୍ତି ପୂର୍ବ ଦିନ ନୀତି ଅନୁସାରେ ନବାଙ୍କ ବେଶ ଅନୁଷ୍ଠିତ ହେବ । ଏକା ଦିନକେ ଠାକୁରଙ୍କ ଦୁଇଟି ବେଶର ଅଦ୍ଭୁତ ଯୋଗାଯୋଗ ବହୁ ବର୍ଷରେ ଆସିଥିବା କୁହାଯାଉଛି । ଦ୍ୱିପହର ଧୂପରେ ଠାକୁରଙ୍କ ସୁନା ବେଶ ଓ ସନ୍ଧ୍ୟା ଧୂପରେ ନବାଙ୍କ ବେଶ ସମ୍ପନ୍ନ ହେବ ।
ପୌରାଣିକ କଥାବସ୍ତୁ ଆଧାରରେ ପୌଷପୂର୍ଣ୍ଣିମାରେ ଶ୍ରୀରାମଚନ୍ଦ୍ର ବନବାସରୁ ଫେରି ରାଜା ହୋଇଥିଲେ । ଏଣୁ ବଡ଼ଦେଉଳ ରତ୍ନସିଂହାସନରେ ମହାପ୍ରଭୁଙ୍କ ଅଭିଷେକ ନୀତି ସମ୍ପନ୍ନ ହେବ । ଠାକୁରଙ୍କ ପୁଷ୍ୟାଭିଷେକ ପୂର୍ବରୁ ରବିବାର ରାତିରେ ଅଙ୍କୁରାରୋପଣ ଓ ଜଳ ଅଧିବାସ ଆଦି ବିଧି ସମ୍ପନ୍ନ ହୋଇଛି । ଚନ୍ଦନଲାଗି ନୀତି ସରିଲାପରେ ଭୋଗମଣ୍ଡପ ଘରେ ଜଳ ଓ ଘୃତ ଅଧିବାସ ହୋଇଛି । ସୋମବାର ସକାଳ ଧୂପ ସରିଲେ ଠାକୁରଙ୍କ ସ୍ୱତନ୍ତ୍ର ନୀତିର ଶୁଭାରମ୍ଭ ହେବ । ରତ୍ନସିଂହାସନ ନିମ୍ନରେ ଥିବା ଦର୍ପଣରେ ଶ୍ରୀଜଗନ୍ନାଥଙ୍କ ବାଡ଼ରେ ଅଭିଷେକ ନୀତି ଅନୁଷ୍ଠିତ ହେବ । ଏହାପରେ ମହାପ୍ରଭୁଙ୍କ ଚିତ୍ତାକର୍ଷକ ସୁନାବେଶ ସମ୍ପନ୍ନ ହେବ ।
ଏହି ଅବସରରେ ଭିତରଛ ମହାପାତ୍ର ଶ୍ରୀଲକ୍ଷ୍ମଣଙ୍କ ରୂପରେ ଦଣ୍ଡଛତ୍ର ଧରି ଦଣ୍ଡାୟମାନ ହେବେ । ଦଣ୍ଡଛତ୍ର ମୂଳକୁ ଧାରଣ କରି ପାଳିଆ ଭଣ୍ଡାର ମେକାପ ଶ୍ରୀହନୁମାନଙ୍କ ରୂପରେ ଆଣ୍ଠୁମାଡ଼ି ବସିଥିବେ । ଷୋଡ଼ଷ ଉପଚାରରେ ମହାପ୍ରଭୁଙ୍କୁ ନୈବେଦ୍ୟ ଅର୍ପଣ କରାଯିବ । ରାଜନୀତି ଓ ବନ୍ଦାପନା ନୀତି ସମ୍ପନ୍ନ ହେବ । ଶ୍ରୀରଘୁନାଥ ରତ୍ନସିଂହାସନକୁ ବିଜେ ହୋଇ ମହାପ୍ରଭୁଙ୍କ ଆଜ୍ଞାମାଳ ପାଇ ନୀତି ଅନୁଷ୍ଠିତ ହେବ । ଶ୍ରୀମନ୍ଦିରରେ ଠାକୁରଙ୍କ ରାଜାଧିରାଜ ବେଶ ଓ ବିଶେଷ ନୀତି ଦର୍ଶନ କରି ହଜାର ହଜାର ଭକ୍ତ କୃତାର୍ଥ ହେବେ ।
