ପୁରୀ,୨୪/୦୭: ପ୍ରସ୍ତାବିତ ଗ୍ରୀନ ଫିଲ୍ଡ ଏୟାରପୋର୍ଟ ପାଇଁ ଜାରି ରହିଛି ସରକାରୀ ଉଦ୍ୟମ । ପୁରୀ ଗସ୍ତରେ ଆସି କେନ୍ଦ୍ରୀୟ ୱାଇଲ୍ଡ ଲାଇଫ୍ ଇଷ୍ଟିଚ୍ୟୁଟ୍ ଅଫ୍ ଇଣ୍ଡିଆର ବିଶେଷଜ୍ଞ ଟିମ୍ ଶ୍ରୀଜଗନ୍ନାଥ ବିମାନ ବନ୍ଦର ନିମନ୍ତେ ପ୍ରସ୍ତାବିତ ଜମିକୁ ଯାଇ ବୁଧବାର ଅନୁଧ୍ୟାନ କରିଛନ୍ତି । କେନ୍ଦ୍ର ସରକାରଙ୍କ ସୁପାରିସରେ ଭାରତୀୟ ବନ୍ୟଜନ୍ତୁ ପ୍ରତିଷ୍ଠାନର ମତାମତ ଲୋଡିଥିଲେ ରାଜ୍ୟ ସରକାର । ଜଙ୍ଗଲ ଜମି କିସମ ପରିବର୍ତ୍ତନ ହେବାକୁ ଥିବା ୨୭.୮୭୭ ହେକ୍ଟର ଜମିର ସ୍ଥିତି ଏହି ଟିମ୍ ଅନୁଧ୍ୟାନ କରିଛନ୍ତି । ସ୍ଥିତି ଦେଖିବା ପରେ ଏହି ଟିମ୍ ନିଜର ମତାମତ ପୁରୀ ଡିଏଫ୍ଓଙ୍କୁ ଦେଇଛନ୍ତି ।
ସେହିପରି ୱାଇଲ୍ଡ ଲାଇଫ୍ ଇଷ୍ଟିଚ୍ୟୁଟ୍ ଅଫ୍ ଇଣ୍ଡିଆର ବିଶେଷଜ୍ଞ ଟିମ୍ ଏଠାରେ ପ୍ରକଳ୍ପ ହେଲେ ବିଦେଶୀ ପକ୍ଷୀ, ଡଲ୍ଫିନ୍, ଅଲିଭ ରିଡ୍ଲେଙ୍କ ଆତଯାତରେ କିପରି ପ୍ରତିକୂଳ ପ୍ରଭାବ ପଡ଼ିବ ତାହାକୁ ଆକଳନ କରିଥିଲେ । ଯାହାକୁ ସେମାନେ ପୁରୀ ଡିଏଫ୍ଓଙ୍କ ନିକଟରେ ଉପସ୍ଥାପିତ କରିଥିବା ଟିମ୍ ସଦସ୍ୟମାନେ ମତ ଦେଇଛନ୍ତି । ସେହିପରି ଏହାକୁ ନେଇ ଏହି ବିଶେଷଜ୍ଞ ଟିମ୍ ଏକ ରିପୋର୍ଟ ପ୍ରସ୍ତୁତ କରି ସରକାରଙ୍କୁ ଦେବ । ଉଭୟ ଜୈବ ବିବିଧତା ଓ ବନ୍ୟଜନ୍ତୁ ଅନୁଶୀଳନକୁ ନେଇ ଏହି ରିପୋର୍ଟ ପ୍ରସ୍ତୁତ ହେବ । ଡିଏଫ୍ଓ ଏହାକୁ ଦୃଷ୍ଟିରେ ରଖି ପରବର୍ତ୍ତୀ ପଦକ୍ଷେପ ନେବେ ବୋଲି ଜଣାପଡ଼ିଛି ।
ସୂଚନା ଥାଉକି, ପୁରୀରେ ବିଶ୍ୱସ୍ତରୀୟ ସହରରେ ପରିଣତ କରିବା ସହ ଏହାର କାୟା ପରିବର୍ତ୍ତନ ନିମନ୍ତେ ସରକାର ଅନେକ ପଦକ୍ଷେପ ନେଉଛନ୍ତି । ଯାହା ଭିତରେ ଅନ୍ତର୍ଜାତୀୟ ବିମାନ ବନ୍ଦର ପ୍ରତିଷ୍ଠା ଲକ୍ଷ୍ୟ ରହିଛି । ଏବାବଦରେ ପରିବେଶ ମଞ୍ଜୁରି ଓ ଅନ୍ୟାନ୍ୟ ଆବଶ୍ୟକ ମଞ୍ଜୁରି ନିମନ୍ତେ ସରକାର ପଦକ୍ଷେପ ଜୋରଦାର କରିଛନ୍ତି।
