ନୂଆଦିଲ୍ଲୀ : ପଶ୍ଚିମବଙ୍ଗର ନବଗଠିତ ଶୁଭେନ୍ଦୁ ଅଧିକାରୀ ସରକାର ନିରନ୍ତର ଆକ୍ସନ ମୋଡରେ। ବାଂଲାଦେଶୀ ଅନୁପ୍ରବେଶକାରୀଙ୍କୁ ନେଇ ଆରମ୍ଭରୁ ସ୍ଥିତି ସ୍ପଷ୍ଟ କରି ଥିବା ବିଜେପି ସରକାର, ନିଶ୍ଚିତ କରି ଦେଇଛି ଯେ, ସରକାରୀ ସୁବିଧା କେବଳ ଭାରତୀୟ ନାଗରିକଙ୍କ ପାଇଁ। ଅନୁପ୍ରବେଶକାରୀଙ୍କୁ କୌଣସି ପ୍ରକାରର ସରକାରୀ ସୁବିଧା ପାଇବାକୁ ଦିଆଯିବ ନାହିଁ। ହେଲେ, ଯେଉଁମାନଙ୍କର ନାମ SIR ଅନୁଯାୟୀ କାଟି ଦିଆ ଯାଇଛି, କିନ୍ତୁ ଯେଉଁମାନେ ନାଗରିକତା ସଂଶୋଧନ ଆଇନ (CAA) ଅନୁସାରେ ନାଗରିକତା ପାଇଁ ଆବେଦନ କରିଛନ୍ତି, ସେହି ଲୋକଙ୍କୁ ମଧ୍ୟ ଆଶ୍ୱସ୍ତି ଦିଆଯାଇଛି।
ଉତ୍ତର ୨୪ ପରଗଣାରେ ମିଡିଆ ସହ କଥାବାର୍ତ୍ତା କରି ପଶ୍ଚିମବଙ୍ଗର ଖାଦ୍ୟ ଏବଂ ସମବାୟ ମନ୍ତ୍ରୀ ଅଶୋକ କୀର୍ତ୍ତିନିଆ ସ୍ଥିତିକୁ ସଂପୂର୍ଣ୍ଣ ସ୍ପଷ୍ଟ କରି କହିଛନ୍ତି, ଯଦିଓ କାହାର ନାମ SIRରୁ କାଟି ଦିଆ ଯାଇଛି, ତଥାପି ଚିନ୍ତା କରିବାର କୌଣସି ଆବଶ୍ୟକତା ନାହିଁ। ଏପରି ଲୋକମାନେ CAA ଅଧୀନରେ ନାଗରିକତା ପାଇଁ ଆବେଦନ କରି ପାରିବେ। ଏହା କରିବା ଦ୍ୱାରା, ସେମାନଙ୍କୁ ସବୁ ସରକାରୀ ସୁବିଧା ମିଳିବା ଜାରି ରହିବ। ସେମାନଙ୍କର ରାସନ ବନ୍ଦ ହେବ ନାହିଁ।
ଉଲ୍ଲେଖନୀୟ ଯେ, CAA ଅନୁସାରେ, ୩୧ ଡିସେମ୍ବର, ୨୦୧୪ ସୁଦ୍ଧା ଭାରତ ଆସି ଥିବା ହିନ୍ଦୁ, ଶିଖ, ବୌଦ୍ଧ, ଜୈନ, ପାର୍ସୀ ଏବଂ ଖ୍ରୀଷ୍ଟିଆନ ସମ୍ପ୍ରଦାୟର ଲୋକଙ୍କୁ ନାଗରିକତା ପାଇବାର ଅଧିକାର ଅଛି। ସାଧାରଣତଃ, ଭାରତୀୟ ନାଗରିକତା ପାଇବା ପାଇଁ ଭାରତରେ ୧୧ ବର୍ଷ ବସବାସ କରିଥିବା ଆବଶ୍ୟକ, କିନ୍ତୁ CAA ଅନୁସାରେ, ଏହାକୁ ମାତ୍ର ୫ ବର୍ଷ କରି ଦିଆ ଯାଇଛି।
ବେଆଇନ ରାସନ କାର୍ଡ ପ୍ରଦାନକାରୀଙ୍କ ବିରୋଧରେ ଚାଲିଛି ତଦନ୍ତ : ଶୁଭେନ୍ଦୁଙ୍କ ମନ୍ତ୍ରୀ
ପଶ୍ଚିମବଙ୍ଗରେ ମମତା ସରକାରଙ୍କ ଦ୍ୱାରା କରାଯାଇଥିବା କାର୍ଯ୍ୟର ଗୋଟି ଗୋଟି କରି ତଦନ୍ତ କରୁଥିବା ଶୁଭେନ୍ଦୁ ସରକାର, ଏବେ ରାସନ କାର୍ଡକୁ ନେଇ ମଧ୍ୟ ନିଜର କାମ ଆରମ୍ଭ କରି ଦେଇଛନ୍ତି। ମନ୍ତ୍ରୀ ଅଶୋକ କୀର୍ତ୍ତିନିଆ କହିଛନ୍ତି ଯେ, ସେ ତାଙ୍କ ବିଭାଗ ଦୁର୍ନୀତି ବିରୋଧରେ ଏକ ବଡ଼ ଅଭିଯାନ ଚଳାଇଛି। ସେ କହିଛନ୍ତି ଯେ, ନୂଆ ସରକାର ବିଭାଗକୁ ସମ୍ପୂର୍ଣ୍ଣ ଦୁର୍ନୀତିମୁକ୍ତ କରିବା ପାଇଁ ପ୍ରତିବଦ୍ଧ। ସେ କହିଛନ୍ତି , ଆମେ ବେଆଇନ ଭାବେ ରାସନ କାର୍ଡ ତିଆରି କରୁଥିବା ଦୁର୍ନୀତିଗ୍ରସ୍ତ ସିଣ୍ଡିକେଟକୁ ବନ୍ଦ କରିବୁ। ଅନେକ ଲୋକ ଫର୍ମ-୧୦ ପୂରଣ କରି ରାସନ କାର୍ଡକୁ ପରିଚୟ ପତ୍ର ଭାବରେ ବ୍ୟବହାର କରୁଛନ୍ତି। ଏବେ ଏହା ଆଉ ଚଳିବ ନାହିଁ ଏବଂ ଏଥିରେ ସମ୍ପୃକ୍ତ ଲୋକଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନିଆଯିବ।
ଆହୁରି ମଧ୍ୟ ପଢନ୍ତୁ : ଦିଲ୍ଲୀର ମହିଳାଙ୍କୁ ବିନା ଗ୍ୟାରେଣ୍ଟିରେ ମହିଳା ୧୦ କୋଟିର ଋଣ, ରେଖା ଗୁପ୍ତା ସରକାରଙ୍କ ବଡ଼ ଘୋଷଣା
