ଭୁବନେଶ୍ୱର,୨୧/୧୧: ଶୁକ୍ରବାର ଶଙ୍ଖ ଧ୍ୱନି, ହୁଳହୁଳି ଆଉ ବେଦମନ୍ତ୍ରରେ କମ୍ପି ଉଠିବ । ବିବାହ ବେଦିରେ ଅଗ୍ନିକୁ ସାକ୍ଷୀ ରଖି ସାତ ଜନ୍ମର ସାଥୀ ହୋଇଯିବେ ବର-ବଧୂ । ବାହାଘରକୁ ଆଉ ଦିନଟିଏ ବାକି ଥିବାବେଳେ ଖଣ୍ଡଗିରି ଜୀବନଜ୍ୟୋତି ଶିଶୁସୁରକ୍ଷା ଯତ୍ନଗୃହରେ ସେଥିପାଇଁ ଚାଲିଛି ଜୋରଦାର୍ ପ୍ରସ୍ତୁତି । ତେବେ ଏହି ବାହାଘରର ଭିନ୍ନତା ହେଉଛି ଅନାଥାଶ୍ରମର ଅନ୍ତେବାସିନୀ ସୀମା (୨୦)ଙ୍କୁ ଜୀବନସାଥୀ କରିବେ ଅନନ୍ତ ନାରାୟଣ ଶତପଥୀ (୨୭) ।
ପିଲାଟିବେଳୁ ସୀମା ବାପାମା’ଙ୍କୁ ହରାଇବା ପରେ ଏହି ଆଶ୍ରମରେ ବଡ ହୋଇଛନ୍ତି । ସେ ଆଇଟିଆଇ ପାସ୍ କରିବା ପରେ ଆଶ୍ରମରେ ରହି ସେବା କାର୍ଯ୍ୟ କରୁଛନ୍ତି । ସବୁ ଝିଅଙ୍କ ଭଳି ସୀମା ବି ବାହାଘର ଲାଗି ସ୍ୱପ୍ନ ଦେଖିଥିଲେ ଯାହା ସତ ହେବାକୁ ଯାଉଛି । ସୀମାଙ୍କ ହାତ ଧରିବେ କଳାରାହାଙ୍ଗ ନିବାସୀ ପ୍ରମିଳା ଶତପଥୀ ଏବଂ ସ୍ୱର୍ଗତଃ ବିଷ୍ଣୁଚରଣ ଶତପଥୀଙ୍କ ପୁଅ ଅନନ୍ତ । ଅନନ୍ତ ଓଡିଶା କନଷ୍ଟ୍ରକସନ୍ କର୍ପୋରେସନ୍ (ଓସିସି)ରେ ଜଣେ ୪ର୍ଥ ଶ୍ରେଣୀ କର୍ମଚାରୀ । ଏକ ଆଶ୍ରମର ଝିଅକୁ ବୋହୂ କରି ନେବାକୁ ସେ ଓ ତାଙ୍କ ପରିବାରର ଇଚ୍ଛା ଥିଲା । ସେଥିପାଇଁ ସେମାନେ ମନଲାଖି ଝିଅଟିଏ ଖୋଜୁଥିଲେ । ଜଣେ ମଧ୍ୟସ୍ଥିଙ୍କ ଜରିଆରେ ଜୀବନଜ୍ୟୋତି ଆଶ୍ରମକୁ ଆସିଥିଲେ । ତେବେ ସୀମାଙ୍କୁ ଦେଖିବା ପରେ ଅନନ୍ତଙ୍କ କନିଆ ଖୋଜାରେ ପୂର୍ଣ୍ଣଚ୍ଛେଦ ପଡ଼ିଥିଲା । ତାଙ୍କୁ ବୋହୂ କରି ନେବାକୁ ନିଷ୍ପତ୍ତି ନେଇଥିଲେ ଅନନ୍ତଙ୍କ ପରିବାର । ବୁଧବାର ଅନୁକୂଳ ବଡ଼ି ପଡିଛି । ଗୁରୁବାର ହେବ ମେହେନ୍ଦି । ଆଉ ଶୁକ୍ରବାର ବେଦିରେ ମଙ୍ଗନ ସହ ବାହାଘର ।
ଏଇ ଆଶ୍ରମ ମୋ ପାଇଁ ସବୁ କିଛି । ମୋ ସ୍ୱପ୍ନ ସତ ହେବାକୁ ଯାଉଥିବାରୁ ମୁଁ ବହୁତ ଖୁସି । ମୋ ଭାବି ସ୍ୱାମୀ ଅନନ୍ତଙ୍କ ଖୁସିରେ ମୋର ଖୁସି । ସେ ମୋର ବହୁତ ଧ୍ୟାନ ରଖୁଛନ୍ତି । ସେ ଦିନକୁ ଅତି କମରେ ଦୁଇ ଥର ଫୋନ କରି ମୋର ଭଲମନ୍ଦ ପଚାରି ବୁଝୁଛନ୍ତି । ତାଙ୍କର ପନିର ଆଉ ପୋଟଳ ତରକାରୀ ବହୁତ ପସନ୍ଦ । ତେଣୁ ମୁଁ ତାଙ୍କୁ ରୋଷେଇ କରି ଖୁଆଇବି । ଏଥିସହ ଆଗକୁ ତାଙ୍କ ସହଯୋଗରେ ସମାଜସେବା କରିବାକୁ ଲକ୍ଷ୍ୟ ରଖିଛି ।
