ନୂଆଦିଲ୍ଲୀ ୦୭/୧୦: ଏବେ ମ୍ୟୁଚୁଆଲ ଫଣ୍ଡରେ ନିବେଶ ନେଇ ଯୁବବର୍ଗଙ୍କ ମଧ୍ୟରେ ଆଗ୍ରହ ବଢ଼ିଛି । କେବଳ ଦେଶର ସହରାଞ୍ଚଳ ନୁହେଁ ଛୋଟ ସହର ଗୁଡିକରୁ ମଧ୍ୟ ନିବେଶକ ଏ କ୍ଷେତ୍ରରେ ବେଶ ସକ୍ରିୟତା ଦେଖାଉଛନ୍ତି । ପ୍ରତି ମାସ ଏହି ସଂଖ୍ୟାରେ ବୃଦ୍ଧି ହେଉଛି । ଚଳିତ ବର୍ଷ ଏପ୍ରିଲରୁ ଅଗଷ୍ଟ ଅବଧିରେ ମ୍ୟୁଚୁଆଲ ଫଣ୍ଡ ଶିଳ୍ପ ସହ ୨.୩ କୋଟି ନିବେଶକ ଯୋଡି ହୋଇଛନ୍ତି । ଏହା ମଧ୍ୟରେ ଛୋଟ ସହରର ଅଂଶ ୫୦% ରହିଥିବା ଜିରୋଧା ଫଣ୍ଡ ହାଉସ ପକ୍ଷରୁ ସୂଚନା ମିଳିଛି ।
ମ୍ୟୁଚୁଆଲ ଫଣ୍ଡ ଶିଳ୍ପରେ ମୋଟ ପରିଚାଳନା ସମ୍ପତ୍ତିକୁ ଦେଖିଲେ ଛୋଟ ସହର ଗୁଡିକର ଅଂଶ ୧୯% ରହିଛି । ଏହାକୁ ଦେଖିଲେ ଏବେ ଏସବୁ ସହରରୁ ଅଧିକ ନିବେଶକ ମ୍ୟୁଚୁଆଲ ଫଣ୍ଡ ପ୍ରତି ଆକୃଷ୍ଟ ହେଉଛନ୍ତି । ସେହିଭଳି ସହରାଞ୍ଚଳ ତୁଳନାରେ ମଧ୍ୟ ହାରାହାରି ନିବେଶ ଅଧିକ ରହୁଛି । ଏସବୁ ଛୋଟ ସହର ଗୁଡିକୁ ବି-୩୦ ସହର ଭାବେ ବିବେଚିତ କରାଯାଇଥିବା ଆସୋସିଏସନ ଅଫ୍ ମ୍ୟୁଚୁଆଲ ଫଣ୍ଡ୍ସ ଇନ୍ ଇଣ୍ଡିଆ ପକ୍ଷରୁ କୁହାଯାଇଛି । ୨୦୨୪ ଅଗଷ୍ଟ ସୁଦ୍ଧା ସମସ୍ତ ଏସ୍ଆଇପି ଆକାଉଣ୍ଟ ମଧ୍ୟରୁ ଛୋଟ ସହର ଗୁଡିକର ଆକାଉଣ୍ଟ ସଂଖ୍ୟା ରହିଛି ୫୪% । ସରଳ ଭାବେ କହିବାରେ ଗଲେ ଏସବୁ ସହର ଗୁଡିକରେ ବୃହତ୍ତ ସଂଖ୍ୟକ ଏସ୍ଆଇପି ଆକାଉଣ୍ଟ ଖୋଲାଯାଉଛି ।
ଚଳିତ ବର୍ଷ ଏପ୍ରିଲ ଅଗଷ୍ଟ ଅବଧିରେ ଇଣ୍ଡେକ୍ସ ଫଣ୍ଡ କ୍ଷେତ୍ରରେ ଛୋଟ ସହରର ଏସ୍ଆଇପି ଆକାଉଣ୍ଟ ଅଭିବୃଦ୍ଧି ହାର ରହିଛି ୧୮.୭% । ଯାହା ଅନ୍ୟ ବର୍ଗର ଆକାଉଣ୍ଟ ତୁଳନାରେ ଅଧିକ । ଏହି ସହର ଗୁଡିକର ୭୯% ଆକାଉଣ୍ଟ ଅଭିବୃଦ୍ଧି ଏବଂ ଇକ୍ୱିଟି ଭିତ୍ତିକ ସ୍କିମରେ ନିବେଶ ହେଉଥିବା ଜିରୋଧା ପକ୍ଷରୁ ପ୍ରକାଶ ।
