ୱାଶିଂଟନ୍, ୨୩/୦୧: ଆମେରିକାର ଅନେକ ଦକ୍ଷିଣ ରାଜ୍ୟରେ ଭୀଷଣ ତୁଷାରଝଡ଼ ଜାରି ରହିଛି । ଏଥିଯୋଗୁ ଅଦ୍ୟାବଧି ୧୦ ଜଣଙ୍କ ମୃତ୍ୟୁ ଘଟିଲାଣି । ୨୧ଶହରୁ ଅଧିକ ବିମାନ ଉଡ଼ାଣ ବାତିଲ ହୋଇଛି । ମିସିସିପି, ଅଲବାମା, ଫ୍ଲୋରିଡା, ଜର୍ଜିଆ ଏବଂ ଲୁଇସିୟାନା ଆଦି ରାଜ୍ୟରେ ଏମର୍ଜେନ୍ସି ଘୋଷଣା କରାଯାଇଛି । ଅନେକ ସ୍ଥାନରେ ସରକାରୀ ଅଫିସ, ଶିକ୍ଷାନୁଷ୍ଠାନ ବନ୍ଦ କରାଯାଇଛି । ବହୁ ସ୍ଥାନରେ ସଡ଼କ ବନ୍ଦ ହେବା ଯୋଗୁ ଟେକ୍ସାସ୍ରୁ ଫ୍ଲୋରିଡା ପର୍ଯ୍ୟନ୍ତ ଜନଜୀବନ ବାଧାପ୍ରାପ୍ତ ହୋଇଛି । ବିଦ୍ୟୁତ୍ ଯୋଗାଣ ଠପ୍ ହୋଇଛି । ଏପରିକି ବରଫପାତ ବନ୍ଦ ହେବା ପରେ ବି ସଡ଼କ ଖୋଲିବା, ଏୟାର ସର୍ଭିସ୍ ଆରମ୍ଭ ହେବାକୁ କିଛି ଦିନ ଲାଗିପାରେ ।
ରିପୋର୍ଟ ଅନୁସାରେ, ଟେକ୍ସାସ୍ ରାଜପଥରେ ବରଫପାତ ଯୋଗୁ ଏକ ଦୁର୍ଘଟଣାରେ ୫ ଜଣଙ୍କ ମୃତ୍ୟୁ ଘଟିଛି । ସେହିପରି ଅଲବାମାରେ ୨ ଜଣ ପ୍ରାଣ ହରାଇଛନ୍ତି । ପ୍ରବଳ ଥଣ୍ଡାରେ ଜର୍ଜିଆରେ ଜଣଙ୍କ ମୃତ୍ୟୁ ହୋଇଛି । ବରଫଝଡ଼ ଯୋଗୁ ଦକ୍ଷିଣ ରାଜ୍ୟଗୁଡ଼ିକରେ ରାତି ସମୟ ବେଶ୍ କଷ୍ଟକର ହୋଇପଡ଼ିଛି । ଲୁଇସିଆନାରେ ପ୍ରବଳ ବରଫପାତ ସହ ୬୦ କିମି ବେଗରେ ବରଫଝଡ଼ ହେବାର ଚେତାବନୀ ରହିଛି । ଭର୍ଜିନିଆରେ ୩ କୋଟି ଲୋକଙ୍କୁ ବରଫଝଡ଼ରୁ ସୁରକ୍ଷିତ ରହିବା ଲାଗି ସତର୍କ କରାଯାଇଛି । ମଙ୍ଗଳବାର ରାତିରେ ଲୁଇସିଆନାର ଏକାଧିକ ଅଞ୍ଚଳରେ ୧୦ ଇଞ୍ଚ ପର୍ଯ୍ୟନ୍ତ ବରଫ ଜମି ଥିଲା।
