ଫିରିଙ୍ଗିଆ,୩୦/୮ : କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ ପାଙ୍ଗା ଉପରସାହି ପଞ୍ଚାୟତ ବାଲିଗଟା ଗାଁରେ ନିର୍ମାଣ କରାଯାଇଥିବା ସୋଲାର ଜଳ ପ୍ରକଳ୍ପ ଏକ ମାସ ପୂର୍ବରୁ ଅଚଳ ହୋଇପଡିଛି l ସୂଚନା ଅନୁସାରେ ଏହି ବାଲିଗଟା ଗାଁରେ ପିଇବା ପାଣି ପାଇଁ ଅନ୍ୟ ବ୍ୟବସ୍ଥା ନ ଥିବାରୁ ଏବଂ ଅଞ୍ଚଳବାସୀ ଅସୁବିଧା ହେଉଥିବାରୁ ପାଣି ଯୋଗାଇବାକୁ ବାରମ୍ବାର ବାଲିଗଟା ୪ ନମ୍ବର ୱାର୍ଡ ବାସିନ୍ଦା ଲିଖିତ ଭାବେ ଜଣାଇଥିଲେ l 

ସମସ୍ୟାକୁ ଦୃଷ୍ଟି ଦେଇ ପ୍ରଶାସନ ତରଫରୁ ଏକ ସୋଲାର ଜଳ ପ୍ରକଳ୍ପ ନିର୍ମାଣ କରାଯାଇଥିଲା l ନିର୍ମାଣର ବର୍ତ୍ତମାନ ୭ ମାସ ବିତିଯାଇଥିବାବେଳେ ନିର୍ମାଣ କରିଥିବା ଠିକାଦାର ନିମ୍ନ ମାନର ସରଞ୍ଜାମ ଲଗାଇଥିବାରୁ ତାହା ଅଳ୍ପ ଦିନ ମଧ୍ୟରେ ଭାଙ୍ଗି ନଷ୍ଟ ହୋଇଛି । ଯାହାଦ୍ୱାରା ଗତ ଏକ ମାସରୁ ଅଧିକ ହେବ ଏହା ଅଚଳ ହୋଇ ପଡିଛି l ଏହି ସୋଲାର ପ୍ରକଳ୍ପ ଉପରେ ନିର୍ଭର କରୁଥିବା ୪ନମ୍ବର ୱାର୍ଡର ୧୭ରୁ ଅଧିକ ଘର ଲୋକେ ପାଣି ପାଇଁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି l ଏହି ବାଲିଗଟା ଗାଁ ଫିରିଙ୍ଗିଆ ବ୍ଲକର ଉପାନ୍ତ ଅଞ୍ଚଳ ଏବଂ ଜଙ୍ଗଲ ପରିବେଷ୍ଟିତ ଭିତରେ ରହିଥିବାରୁ ନିର୍ମାଣ କରିଥିବା ଠିକାଦାର ସୋଲାର ପ୍ରକଳ୍ପ ଠିକ ଭାବରେ କରିନଥିବାରୁ ଏଭଳି ଅବସ୍ଥା ହୋଇଥିବା ଅଭିଯୋଗ କରିଛନ୍ତି ସମୂହ ଗ୍ରାମବାସୀ l

ପାହାଡ଼ ଉପରେ ଏବଂ ଉଚ୍ଚ ସ୍ଥାନରେ ଏହି ଗାଁ ରହିଥିବାବେଳେ ସୋଲାର ପ୍ରକଳ୍ପ ଲୋକଙ୍କୁ ବହୁ ସୁବିଧା ଯୋଗାଉଥିଲା ଯାହାଦ୍ୱାରା ଲୋକେ ପାଣି ସୁବିଧା ପାଇ ପାରୁଥିଲେ l ବର୍ତ୍ତମାନ ପାଣି ପାଇଁ ସମସ୍ୟା ଭୋଗୁଥିବା ବେଳେ ତୁରନ୍ତ ଏହି ବାଲିଗଟା ଗାଁରେ ନିର୍ମାଣ କରାଯାଇଥିବା ସୋଲାର ପ୍ରକଳ୍ପକୁ ତୁରନ୍ତ ମରାମତି କରିବା ସହ ଅଞ୍ଚଳ ବାସୀଙ୍କୁ ପିଇବା ପାଣି ଯୋଗାଇ ଦେବାକୁ ବାଲିଗଟା ଗାଁ ୪ ନମ୍ବର ୱାର୍ଡର ଶୀଧେଶ୍ୱର କହଁର, ଶ୍ରବଣ କହଁର, ନରତମ କହଁର, କାଳନ୍ଦୀ ଚରଣ ସାହୁ, ବସିରାମ କହଁର, କିରିନ୍ଦ କହଁରଙ୍କ ସହ ଗ୍ରାମବାସୀ ଦାବି କରିଛନ୍ତି l