ଚେନ୍ନାଇ: ଶ୍ରୀଲଙ୍କା ଗସ୍ତରୁ ଫେରିବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର ତାମିଲନାଡୁରେ ପହଞ୍ଚିଛନ୍ତି । ସେଠାରେ ସେ ରାମେଶ୍ୱରମର ରାମନାଥପୁରମରେ ନୂତନ ପମ୍ବନ ସେତୁର ଉଦଘାଟନ କରିଛନ୍ତି । ମୋଦୀ ରବିବାର ଏକ ରାଲିକୁ ସମ୍ବୋଧନ କରି ତାମିଲନାଡୁର ଡିଏମକେ ସରକାର ଏବଂ ମୁଖ୍ୟମନ୍ତ୍ରୀ ଏମକେ ଷ୍ଟାଲିନଙ୍କୁ ଟାର୍ଗେଟ କରିଛନ୍ତି । ସେ କହିଛନ୍ତି, ସବୁ ବେଳେ କାନ୍ଦିବା କିଛି ଲୋକଙ୍କର ଅଭ୍ୟାସ ।
ତାମିଲନାଡୁର ବିକାଶ ସଂପର୍କରେ ମୋଦୀ କହିଛନ୍ତି, ‘ବିକଶିତ ଭାରତ ଯାତ୍ରାରେ ତାମିଲନାଡୁର ଏକ ବିରାଟ ଭୂମିକା ରହିଛି। ମୁଁ ବିଶ୍ୱାସ କରେ, ତାମିଲନାଡୁର ଶକ୍ତି ଯେତେ ବୃଦ୍ଧି ପାଇବ ଭାରତର ଅଭିବୃଦ୍ଧି ସେତେ ଦ୍ରୁତ ହେବ । ଗତ ଦଶନ୍ଧୀରେ କେନ୍ଦ୍ର ସରକାର ତାମିଲନାଡୁର ବିକାଶ ପାଇଁ ୨୦୧୪ ତୁଳନାରେ ତିନି ଗୁଣ ଅଧିକ ଟଙ୍କା ଦେଇଛନ୍ତି। ଏହା ସତ୍ତ୍ୱେ କିଛି ଲୋକଙ୍କର କୌଣସି କାରଣ ବିନା କାନ୍ଦିବାର ଅଭ୍ୟାସ ଅଛି, ସେମାନେ କାନ୍ଦି ଚାଲିଛନ୍ତି। ୨୦୧୪ ପୂର୍ବରୁ ରେଳ ପ୍ରକଳ୍ପ ପାଇଁ ପ୍ରତିବର୍ଷ କେବଳ ୯୦୦ କୋଟି ଟଙ୍କା ମିଳୁଥିଲା। ଏହି ବର୍ଷ ତାମିଲନାଡୁର ରେଳ ବଜେଟ୍ ୬୦୦୦ କୋଟି ଟଙ୍କାରୁ ଅଧିକ ଏବଂ ଭାରତ ସରକାର ଏଠାରେ ୭୭ଟି ରେଳ ଷ୍ଟେସନ୍ର ଆଧୁନିକୀକରଣ ମଧ୍ୟ କରୁଛନ୍ତି। ଏଥିରେ ରାମେଶ୍ୱରମ୍ ରେଳ ଷ୍ଟେସନ ମଧ୍ୟ ଅନ୍ତର୍ଭୁକ୍ତ ।’
ପ୍ରଧାନମନ୍ତ୍ରୀ ମୋଦୀ କହିଛନ୍ତି, ଗତ ୦ ବର୍ଷ ମଧ୍ୟରେ ଭାରତ ଏହାର ଅର୍ଥନୀତିର ଆକାର ଦ୍ୱିଗୁଣିତ କରିଛି। ଏତେ ଦ୍ରୁତ ଅଭିବୃଦ୍ଧିର ଏକ ପ୍ରମୁଖ କାରଣ ହେଉଛି ଆମର ଉତ୍କୃଷ୍ଟ ଆଧୁନିକ ଭିତ୍ତିଭୂମି । ଗତ ୧୦ ବର୍ଷ ମଧ୍ୟରେ ଆମେ ରେଳ, ରାସ୍ତା, ବିମାନବନ୍ଦର, ବନ୍ଦର, ବିଦ୍ୟୁତ୍, ପାଣି, ଗ୍ୟାସ୍ ପାଇପଲାଇନ୍ ଭଳି ଭିତ୍ତିଭୂମି ପାଇଁ ବଜେଟ୍ ପ୍ରାୟ ୬ ଗୁଣ ବୃଦ୍ଧି କରିଛୁ।
ସେ ଆହୁରି କହିଛ୍ତି, ଆଜି ଦେଶରେ ମେଗା ପ୍ରକଳ୍ପଗୁଡ଼ିକର କାମ ବହୁତ ଦ୍ରୁତ ଗତିରେ ଚାଲିଛି। ଯଦି ଆପଣ ଉତ୍ତର ଦିଗରେ ଦେଖନ୍ତି, ତେବେ ବିଶ୍ୱର ସବୁଠାରୁ ଉଚ୍ଚ ରେଳ ସେତୁ ମଧ୍ୟରୁ ଗୋଟିଏ 'ଚେନାବ ସେତୁ' ଜମ୍ମୁ ଏବଂ କାଶ୍ମୀରରେ ନିର୍ମିତ । ଯଦି ଆମେ ପଶ୍ଚିମକୁ ଯିବା ତେବେ ଦେଶର ସବୁଠାରୁ ଲମ୍ବା ସମୁଦ୍ର ସେତୁ 'ଅଟଳ ସେତୁ' ମୁମ୍ବାଇରେ ନିର୍ମିତ । ଯଦି ଆପଣ ପୂର୍ବକୁ ଯାଆନ୍ତି, ତେବେ ଆପଣ ଆସାମର 'ବୋଗିବିଲ ସେତୁ' ଦେଖିବେ। ଦକ୍ଷିଣକୁ ଆସିବା ପରେ, ବିଶ୍ୱର କିଛି ଭର୍ଟିକାଲ୍ ଲିଫ୍ଟ ସେତୁ ମଧ୍ୟରୁ ଗୋଟିଏ 'ପମ୍ବନ୍ ସେତୁ'ର ନିର୍ମାଣ କାର୍ଯ୍ୟ ସମାପ୍ତ ହୋଇଛି ବୋଲି ପ୍ରଧାନମନ୍ତ୍ରୀ ମୋଦୀ କହିଛନ୍ତି ।
