ଭୁବନେଶ୍ୱର, ୨୮/୦୩: ସଇତାନ ସାଜିଲା ଜନ୍ମ କଲା ପୁଅ । ବୁଢା ବାପାର ମୁଣ୍ଡକୁ ହାତୁଡ଼ିରେ ପିଟି ପିଟି କଲା ହତ୍ୟା । ପୋଲିସ ଆଗରେ ସତ ବଖାଣିଲା ହତ୍ୟାକାରୀ ପୁଅ । ମୃତକ ଲାମପଦର ଗାଁର ଡକେଣା ଦିଗାଲ ଏବଂ ହତ୍ୟାକାରୀ ପୁଅ ସୁରଜ ଦିଗାଲ ବୋଲି ଜଣାପଡ଼ିଛି । କନ୍ଧମାଳ ଜିଲ୍ଲା ଫିରିଙ୍ଗିଆ ଥାନା ଅନ୍ତର୍ଗତ ପବିଙ୍ଗିଆ ପଞ୍ଚାୟତ ଲାମପଦର ଗାଁରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଲାମପଦର ଗାଁର ଡକେଣା ଦିଗାଲ ରାତିରେ ବାହାରକୁ ପରିଶ୍ରା କରିବାକୁ ଆସିଥିଲେ । ଏହି ସମୟରେ ତାଙ୍କ ପୁଅ ସୁରଜ ଦିଗାଲ ନିଶାସକ୍ତ ଅବସ୍ଥାରେ ଘରକୁ ଫେରିଥିଲା । ଘର ବାହାରେ ନିଜ ବାପାକୁ ଗାଳି କରିବା ପରେ ଉତ୍ୟକ୍ତ ହୋଇ ହାତୁଡ଼ିରେ ବାପାର ମୁଣ୍ଡକୁ ବାରମ୍ବାର ପ୍ରହାର କରିଥିଲା । ଫଳରେ ଘଟଣା ସ୍ଥଳରେ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ବୃଦ୍ଧ ବାପା ଜୀବନ ହାରିଥିଲେ । କିଛି ସମୟ ପରେ ସ୍ୱାମୀ ଘରକୁ ନ ଆସିବାରୁ ବାହାରକୁ ଆସି ଦେଖିଥିଲେ ଡକେଣା ଦିଗାଲଙ୍କ ପତ୍ନୀ । ହେଲେ ସେତେବେଳକୁ ତାଙ୍କ ସ୍ୱାମୀ ଡକେଣା ଦିଗାଲଙ୍କ ମୃତ୍ୟୁ ହୋଇସାରିଥିଲା । ଏହା ଦେଖି ତୁରନ୍ତ ପୋଲିସକୁ ଖବର ଦେଇଥିଲେ । ଘଟଣା ସମ୍ପର୍କରେ ଖବର ପାଇ ଫିରିଙ୍ଗିଆ ଥାନା ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରିବା ସହ ହତ୍ୟାକାରୀ ପୁଅ ସୁରଜ ଦିଗାଲକୁ ଗିରଫ କରିଛି । ହତ୍ୟାକାରୀ ପୁଅ ସମସ୍ତ ଘଟଣାକୁ ସ୍ୱୀକାର କରିବା ସହ ମଦ ପିଇ ନିଶାରେ ଏଭଳି ଘଟାଇଥିବା ବଖାଣିଛି।
