ନୂଆଦିଲ୍ଲୀ,୧୫।୧: ନୂଆଦିଲ୍ଲୀରେ ଆଜି କଂଗ୍ରେସ ସାଂସଦ ସୋନିଆ ଗାନ୍ଧୀ ଏଆଇସିସିର ନୂଆ ମୁଖ୍ୟାଳୟ ଇନ୍ଦିରା ଗାନ୍ଧୀ ଭବନର ଉଦଘାଟନ କରିଛନ୍ତି। ୯ଏ, କୋଟଲା ରୋଡ୍ରେ ନିର୍ମିତ ଆଧୁନିକ ସୁବିଧାରେ ଥିବା ଏହି ମୁଖ୍ୟାଳୟର ଦୀର୍ଘ ଦିନ ହେବ କଂଗ୍ରେସ ଅପେକ୍ଷା କରୁଥିଲା। ବୁଧବାର କଂଗ୍ରେସ ସଂସଦୀୟ ଦଳର ମୁଖ୍ୟ ସୋନିଆ ଗାନ୍ଧୀ ଉଦଘାଟନ କରିଛନ୍ତି।ଏହି ସମୟରେ କଂଗ୍ରେସ ଅଧ୍ୟକ୍ଷ ମାଲିକାର୍ଜୁନ ଖଡଗେ ଓ ସାଂସଦ ରାହୁଲ ଗାନ୍ଧୀଙ୍କ ସହ କଂଗ୍ରେସର ଅନ୍ୟ ବରିଷ୍ଠ ନେତା ଉପସ୍ଥିତ ଥିଲେ। କଂଗ୍ରେସ ଦ୍ବାରା ନିର୍ମିତ ଏହି ମୁଖ୍ୟାଳୟ ଇନ୍ଦିରା ଗାନ୍ଧୀ ଭବନରେ ପ୍ରଶାସନିକ, ସଂଗଠନାତ୍ମକ ଓ ରଣନୈତିକ ସଞ୍ଚାଳକୁ ସୁବିଧାଜନକ କରିବା ପାଇଁ ଆଧୁନିକ ସୁବିଧା ରହିଛି। ଏହି ଐତିହାସିକ ବିଲ୍ଡିଂର ନିର୍ମାଣ ସୋନିଆ ଗାନ୍ଧୀଙ୍କ କଂଗ୍ରେସ ମୁଖ୍ୟ ଥିବା ବେଳେ ଆରମ୍ଭ ହୋଇଥିଲା।
ଭବନର ଉଦଘାଟନ ଅବସରରେ ଭବ୍ୟ କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏହି ଅବସରରେ ପାର୍ଟିର ପତାକା ଉତ୍ତୋଳନ କରାଯିବା ସହ, ବନ୍ଦେମାତରମ୍ ଓ ଜାତୀୟ ସଙ୍ଗୀତ ଗାନ କରାଯାଇଥିଲା। ସୋନିଆ ନୂତନ ଭବନର ଫିତା କାଟି ଉଦଘାଟନ କରିଥିଥିଲେ। ଏହି ସମୟରେ ସେ କହିଛନ୍ତି କଂଗ୍ରେସର ନୂଆ ମୁଖ୍ୟାଳୟ ଦେଶ ସେବା, ନିଷ୍ଠା ଓ ରାଷ୍ଟ୍ରପ୍ରେମର ପ୍ରତୀକ।
ଉଲ୍ଲେଖନୀୟ ଯେ, କଂଗ୍ରେସ ପାର୍ଟି ୨୪, ଆକବର ରୋଡ୍ରେ ଥିବା ନିଜର ପୂର୍ବତନ ମୁଖ୍ୟାଳୟକୁ ଖାଲି ନକରିବାର ନିଷ୍ପତ୍ତି ନେଇଛି, ଯାହାକି ୧୯୭୮ ରେ କଂଗ୍ରେସ(ଆଇ) ଗଠନ ପରେ କଂଗ୍ରେସ ଐତିହର ପ୍ରତୀକ ରହିଛି। ଏହି ପୁରୁଣା ବିଲ୍ଡିଂରେ କେବେ ଭାଇରସରୟ ଲର୍ଡ ଲିନାଲିଥଙ୍ଗୋଙ୍କ କାର୍ଯ୍ୟକାରୀ ପରିଷଦର ସଦସ୍ୟ ସର୍ ରୋଜିନାଲ୍ଡ ମାକ୍ସଓ୍ବେଲ ଓ ୧୯୬୧ ରେ କିଶୋର ଆଙ୍ଗ ସାନ୍ ସୁ ଙ୍କ ଏହି ନିବାସ ଥିଲା। କେନ୍ଦ୍ରରେ କଂଗ୍ରେସ ସରକାର ହରାଇବା ପରେ ଅର୍ଥ ଅଭାବରୁ ଇନ୍ଦିରା ଗାନ୍ଧୀ ଭବନର ନିର୍ମାଣ କାର୍ଯ୍ୟ ବିଳମ୍ବିତ ହୋଇଥିଲା। ବିଜେପି ମଧ୍ୟ ଦୀନଦୟାଲ ଉପାଧ୍ୟାୟ ମାର୍ଗର ଏକ ନୂତନ ସ୍ଥାନକୁ ସ୍ଥାନାନ୍ତରିତ ହେବା ସତ୍ତ୍ୱେ ୧୧, ଅଶୋକା ରୋଡରେ ଥିବା ଏହାର ପୁରୁଣା ମୁଖ୍ୟାଳୟ ଏପର୍ଯ୍ୟନ୍ତ ଖାଲି କରିନାହିଁ। ନୂତନ କଂଗ୍ରେସ ମୁଖ୍ୟାଳୟ ପରମ୍ପରା ଏବଂ ଆଧୁନିକତାର ମିଶ୍ରଣ ସହିତ ଜାତିର ସେବା କରିବା ପାଇଁ ଦଳର ଆକାଂକ୍ଷା ଏବଂ ସମର୍ପଣର ପ୍ରତୀକ।
