ସିଓଲ,୧୦/୧୨: ଦକ୍ଷିଣ କୋରିଆ ରାଷ୍ଟ୍ରପତି ୟୁନ୍ ସୁକ୍-ୟୋଲଙ୍କ ବିଦେଶ ଯାତ୍ରା ଉପରେ ସୋମବାର ବ୍ୟାନ୍ ଲାଗିଛି । ଦେଶରେ ସାମରିକ ଆଇନ ଲାଗୁ କରିଥିବା କାରଣରୁ ଦକ୍ଷିଣ କୋରିଆର କରପ୍ସନ ଇନ୍ଭେଷ୍ଟିଗେଶନ ମୁଖ୍ୟ ଏହି କଟକଣା ଲଗାଇଛନ୍ତି ।
ରିପୋର୍ଟ ଅନୁସାରେ, ଦକ୍ଷିଣ କୋରିଆ ପୁଲିସ ଗତ ସପ୍ତାହରୁ ହିଁ ସାମରିକ ଆଇନ ଲାଗୁ କରିବା କାରଣରୁ ୟୁନ୍ଙ୍କ ବିରୋଧରେ ବିଦ୍ରୋହ ଅଭିଯୋଗର ଯାଞ୍ଚ ପାଇଁ ଯାତ୍ରା କଟକଣା ଲଗାଇବା ବାବଦରେ ବିଚାର କରୁଥିଲା । ବିରୋଧୀ ଦଳ ଉତ୍ତରକୋରିଆ ସହ ହାତ ମିଳାଇଥିବା ଏବଂ ରାଷ୍ଟ୍ରବିରୋଧୀ ଗତିବିଧିରେ ସାମିଲ ଥିବା ଅଭିଯୋଗ କରି ଗତ ମଙ୍ଗଳବାର ୟୁନ୍ ଦେଶରେ ସାମରିକ ଆଇନ ଲାଗୁ କରିଥିଲେ । ଏଥିଯୋଗୁ ଦେଶରେ ଘୋର ରାଜନୈତିକ ସଙ୍କଟ ଦେଖାଦେଇଥିଲା । ବିରୋଧୀ ତାଙ୍କ ବିରୋଧରେ ମହାଭିଯୋଗ ପ୍ରସ୍ତାବ ଆଣିଥିଲେ । କିନ୍ତୁ ଶାସକ ପକ୍ଷ ମହାଭିଯୋଗ ପ୍ରସ୍ତାବ ଉପରେ ଭୋଟିଂରୁ ବିରତ ରହିଥିଲେ । ଫଳରେ ବିରୋଧୀ ଏହି ପ୍ରସ୍ତାବ ପାସ୍ ହେବା ପାଇଁ ଆବଶ୍ୟକ ୨୦୦ ଭୋଟ ଏକଜୁଟ କରିପାରି ନ ଥିଲେ । ଏବେ ପୁଣି ବିରୋଧୀ ୟୁନ୍ଙ୍କ ବିରୋଧରେ ମହାଭିଯୋଗ ପ୍ରସ୍ତାବ ଆଣିବାକୁ ପ୍ରସ୍ତୁତି କରୁଛନ୍ତି । ଯଦି ଏଥର ବିରୋଧୀ ମହାଭିଯୋଗ ପ୍ରସ୍ତାବ ପାସ୍ କରିବାରେ ସଫଳ ହୋଇଯିବେ ତେବେ ୟୁନ୍ଙ୍କ ବିରୋଧରେ କୋର୍ଟରେ ମାମଲା ଚାଲିବ । ୨୦୨୭ ମେ’ରେ ୫ ବର୍ଷ କାର୍ଯ୍ୟକାଳ ଶେଷ ହେବା ପୂର୍ବରୁ ୟୁନ୍ ପଦ ଛାଡ଼ିଲେ ସମ୍ବିଧାନ ଅନୁସାରେ ୬୦ ଦିନ ଭିତରେ ରାଷ୍ଟ୍ରପତି ନିର୍ବାଚନ ଜରୁରି ।
