ନୂଆଦିଲ୍ଲୀ ୨୭/୦୬: ଦକ୍ଷିଣ ସୁଦାନ ବିଶ୍ୱର ସବୁଠାରୁ ନୂଆ ଦେଶ । ୨୦୧୧ ଜୁଲାଇ ୯ରେ ଏହା ନିଜକୁ ସୁଦାନରୁ ପୃଥକ କରିଥିଲା ଏବଂ ଏହାର କିଛି ଦିନ ପରେ ଏ ଦେଶ ଜାତିସଂଘର ସଦସ୍ୟ ପାଲଟିଥିଲା । ସୁଦାନଠାରୁ ଅଲଗା ହେବା ପରେ ବି ଏହାର ଭାଗ୍ୟ ବଦଳିନାହିଁ ।
ଅନ୍ତର୍ଜାତୀୟ ମୁଦ୍ରା ପାଣ୍ଠି(ଆଇଏମ୍ଏଫ୍) ଅନୁସାରେ, ଦକ୍ଷିଣ ସୁଦାନ ହେଉଛି ବିଶ୍ୱର ସବୁଠାରୁ ଗରିବ ରାଷ୍ଟ୍ର । ଏଠାରେ ବ୍ୟକ୍ତି ପିଛା ଜିଡିପି ମାତ୍ର ୨୫୧ ଡଲାର । ବିଶ୍ୱ ବ୍ୟାଙ୍କ୍ର ଏକ ରିପୋର୍ଟ ଅନୁସାରେ, ୧.୧୫ କୋଟି ଜନସଂଖ୍ୟାବିଶିଷ୍ଟ ଏହି ଦେଶରେ ୭୬% ଜନସଂଖ୍ୟା ଦାରିଦ୍ର୍ୟ ରେଖା ତଳେ ଅଛନ୍ତି ଏବଂ ଦୁଇ ତୃତୀୟାଂଶ ଲୋକ ଭୟଙ୍କର ଦାରିଦ୍ର୍ୟରେ ଜୀବନଯାପନ କରୁଛନ୍ତି । ବିଶ୍ୱର ସବୁଠାରୁ ଗରିବ ଦେଶଗୁଡ଼ିକର ତାଲିକାରେ ଅଧିକାଂଶ ଦେଶ ଆଫ୍ରିକାରେ ରହିଛି । ଦକ୍ଷିଣ ସୁଦାନ ପରେ ୟେମେନ୍ ଦ୍ୱିତୀୟ ଗରିବ ରାଷ୍ଟ୍ର । ବର୍ଷ ବର୍ଷ ଧରି ଯୁଦ୍ଧରେ ମାତିଥିବା ଏହି ଗଲ୍ଫ ଦେଶରେ ବ୍ୟକ୍ତି ପିଛା ଜିଡିପି ୪୧୭ ଡଲାର । ଏହା ପରେ ବୁରୁଣ୍ଡି, ସେଣ୍ଟ୍ରାଲ ଆଫ୍ରିକାନ୍ ରିପବ୍ଲିକ, ମଲାବୀ, ମେଡାଗାସ୍କର, ସୁଜାନ, ମୋଞ୍ଜାବିକ୍, ଡିଆର୍ସି, ନାଇଜର, ସୋମାଲିଆ, ନାଇଜେରିଆ, ଲାଇବେରିଆ, ସିୟରା ଲିୟୋନ, ମାଲୀ, ଗାମ୍ବିଆ ଏବଂ ଚାଡ୍ ରହିଛି । ଏହି ଦେଶଗୁଡ଼ିକରେ ବ୍ୟକ୍ତି ପିଛା ଜିଡିପି ୧୦୦୦ ଡଲାରରୁ କମ୍ ।
ଏହା ପରେ ରହିଛି ରାୱାଣ୍ଡା, ଟୋଗୋ, ଇଥିୟୋପିଆ, ଲେସୋଥୋ, ବୁର୍କିନା ଫାସୋ, ଗିନି ବସାଉ, ମ୍ୟାନ୍ମାର, ତାଞ୍ଜାନିଆ, ଜାମ୍ବିଆ, ଉଗାଣ୍ଡା, ତାଜିକସ୍ତାନ, ନେପାଳ, ପୂର୍ବ ତିମୁର, ବେନିନ୍, କୋମୋରୋସ୍, ସେନେଗଲ, କେମରୁନ୍ ଏବଂ ଗିନି । ଏହି ଦେଶଗୁଡ଼ିକରେ ପ୍ରତି ବ୍ୟକ୍ତି ଜିଡିପି ୨,୦୦୦ ଡଲାରରୁ କମ୍ । ଲାଓସ୍, ଜିମ୍ବାବ୍ୱେ, କଙ୍ଗୋ, ସୋଲୋମନ୍ ଆଇଲାଣ୍ଡ୍ସ, କିରିବାତୀ, କେନିଆ, ଘାନା, ପାପୁଆ ନ୍ୟୁ ଗିନି, ହାଇତି, ବାଂଲାଦେଶ, କିର୍ଗିଜ ରିପବ୍ଲିକ୍, କମ୍ବୋଡିଆ ଏବଂ ଆଇବରୀ କୋଷ୍ଟ୍ରେ ପ୍ରତି ବ୍ୟକ୍ତି ଜିଡିପି ୨,୦୦୦ ଡଲାରରୁ ଅଧିକ ରହିଛି । ଭାରତ ଏ ତାଲିକାରେ ୫୦ ନମ୍ବରରେ ଅଛି । ଦେଶର ପ୍ରତି ବ୍ୟକ୍ତି ଜିଡିପି ୨,୮୭୮ ଡଲାର ।
