ଭୁବନେଶ୍ୱର, ୦୬/୦୫ : ରାଜ୍ୟରେ ଥିବା ୩୨୯ଟି ଶିଶୁ ଯତ୍ନ ପ୍ରତିଷ୍ଠାନ (ସିସିଆଇ)ରେ ରହୁଥିବା ଶିଶୁଙ୍କ ଗୁଣାତ୍ମକ ସ୍ୱାସ୍ଥ୍ୟସେବା ସୁନିଶ୍ଚିତ କରିବାକୁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି । ଏଥିପାଇଁ ନିୟମିତ ଭାବେ ଶିଶୁଙ୍କ ଶାରୀରିକ, ମାନସିକ ସ୍ଥିତି ଯାଞ୍ଚ କରାଯିବ ବୋଲି ଜଣାପଡିଛି । ମହିଳା ଓ ଶିଶୁ ବିକାଶ ବିଭାଗ ଏବଂ ସ୍ୱାସ୍ଥ୍ୟ ବିଭାଗ ରାଜ୍ୟ ଏବଂ ଜିଲ୍ଲା ସ୍ତରରେ ଏହାକୁ କାର୍ଯ୍ୟକାରୀ କରିବାକୁ ନିର୍ଦ୍ଦିଷ୍ଟ ନିର୍ଦ୍ଦେଶାବଳୀ ପ୍ରସ୍ତୁତ କରିଛନ୍ତି ।
ନିର୍ଦ୍ଦେଶାବଳୀ ଅନୁଯାୟୀ, ଜିଲ୍ଲା ହସ୍ପିଟାଲ, ସିଏଚ୍ସି, ପିଏଚ୍ସି, ୟୁପିଏଚ୍ସି ଓ ଆୟୁଷ୍ମାନ ଆରୋଗ୍ୟ ମନ୍ଦିର (ଏଏଏମ୍) ଭଳି ସିସିଆଇ ନିକଟରେ ଥିବା ସ୍ୱାସ୍ଥ୍ୟ କେନ୍ଦ୍ର ସହ ସିସିଆଇର ସଂଯୋଗ ସ୍ଥାପନ କରାଯିବ । ଏହି ସ୍ୱାସ୍ଥ୍ୟ ଅନୁଷ୍ଠାନଗୁଡ଼ିକରେ ସମସ୍ତ ଶିଶୁଙ୍କ ପାଇଁ ସ୍ୱାସ୍ଥ୍ୟସେବା ମିଳିବ । ପ୍ରତ୍ୟେକ ଶିଶୁକୁ ଟିକାକରଣ, ମସ୍ତିଷ୍କର ଦକ୍ଷତା ବୃଦ୍ଧି ତଦାରଖ, ଡାକ୍ତରୀ ଯାଞ୍ଚ, ଚିକିତ୍ସା ଏବଂ ଅନ୍ୟ ଡାକ୍ତରଖାନାକୁ ରେଫରାଲ୍ ପାଇଁ ଏକ ବ୍ୟକ୍ତିଗତ ସ୍ୱାସ୍ଥ୍ୟ କାର୍ଡ ପ୍ରଦାନ କରାଯିବ । ସ୍ୱାସ୍ଥ୍ୟକେନ୍ଦ୍ରକୁ ପରିଦର୍ଶନ ସମୟରେ ଏହି ରେକର୍ଡ ଅପଡେଟ୍ କରାଯିବ । ସରକାରୀ ଅଧିକାରୀମାନଙ୍କ ଦ୍ୱାରା ସମୟ ସମୟରେ ସମୀକ୍ଷା କରାଯିବ । ଆୟୁଷ୍ମାନ ଆରୋଗ୍ୟ ମନ୍ଦିରଗୁଡ଼ିକ ଏକ ହବ୍ ଭାବରେ କାର୍ଯ୍ୟ କରିବ । ରାଷ୍ଟ୍ରୀୟ ବାଲ୍ ସ୍ୱାସ୍ଥ୍ୟ କାର୍ଯ୍ୟକ୍ରମ ଅଧୀନରେ ମୋବାଇଲ୍ ସ୍ୱାସ୍ଥ୍ୟ ଦଳ ଅଛନ୍ତି । ସେମାନେ ସ୍କୁଲ୍ ପିଲାଙ୍କ ଯାଞ୍ଚରେ ନିୟୋଜିତ ଅଛନ୍ତି । ଏହି ଦଳ ମଧ୍ୟ ଶିଶୁ ଯତ୍ନ ପ୍ରତିଷ୍ଠାନ ପରିଦର୍ଶନ କରିବେ ।
ସେହିପରି ପିଲାମାନଙ୍କର ମାନସିକ ସ୍ୱାସ୍ଥ୍ୟ ଆବଶ୍ୟକତାକୁ ଧ୍ୟାନରେ ରଖି ନିୟମିତ ମୂଲ୍ୟାଙ୍କନ ଏବଂ ପରାମର୍ଶ ସହାୟତା ପାଇଁ ସିସିଆଇଗୁଡ଼ିକୁ ଜିଲ୍ଲା ମାନସିକ ସ୍ୱାସ୍ଥ୍ୟ କାର୍ଯ୍ୟକ୍ରମ ଦଳ ସହିତ ସଂଯୋଗ କରାଯିବ । ଏନେଇ ରାଜ୍ୟ ସରକାର ଜିଲ୍ଲା ଶିଶୁ ସୁରକ୍ଷା ୟୁନିଟ୍ ଓ ଜିଲ୍ଲା ସ୍ୱାସ୍ଥ୍ୟ ପ୍ରଶାସନ ମଧ୍ୟରେ ସମନ୍ୱୟକୁ ସୁଗମ କରିବା ପାଇଁ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦେଇଛନ୍ତି । ନିୟମିତ ଶିଶୁଙ୍କ ସ୍ୱାସ୍ଥ୍ୟ ରିପୋର୍ଟ ପ୍ରସ୍ତୁତ କରି ରାଜ୍ୟ ସରକାରଙ୍କୁ ପଠାଇବା ପାଇଁ ନିର୍ଦ୍ଦେଶ ଦିଆଯାଇଛି ।
ରାଜ୍ୟରେ ୩୨୯ଟି ଶିଶୁ ଯତ୍ନ ପ୍ରତିଷ୍ଠାନ ରହିଛି । ଅନୁଗୁଳରେ ୬, ବାଲେଶ୍ୱରରେ ୧୬, ବଲାଙ୍ଗିରରେ ୬, ଭଦ୍ରକରେ ୧୦, ବରଗଡ଼ରେ ୧୦, ବୌଦ୍ଧରେ ୩, କଟକରେ ୩୦, ଦେବଗଡ଼ରେ ୩, ଢ଼େଙ୍କାନାଳରେ ୩ ରହିଛି । ସେହିପରି ଗଜପତିରେ ୧୪, ଗଞ୍ଜାମରେ ୧୭, ଜଗତସିଂହପୁରରେ ୩, ଯାଜପୁରରେ ୫, ଝାରସୁଗୁଡ଼ାରେ ୬, କଳାହାଣ୍ଡିରେ ୧୯, କେନ୍ଦ୍ରାପଡ଼ାରେ ୩, କେନ୍ଦୁଝରରେ ୪, କନ୍ଧମାଳରେ ୨୧, ଖୋର୍ଦ୍ଧାରେ ୨୯, କୋରାପୁଟରେ ୨୧ ରହିଛି । ମାଲକାନଗିରିରେ ୯, ମୟୂରଭଞ୍ଜରେ ୧୪, ନବରଙ୍ଗପୁରରେ ୧୪, ନୟାଗଡ଼ରେ ୪, ନୂଆପଡ଼ାରେ ୫, ପୁରୀରେ ୧୪, ରାୟଗଡ଼ାରେ ୯, ସମ୍ବଲପୁରରେ ୬, ସୋନପୁରରେ ୩ ଓ ସୁନ୍ଦରଗଡ଼ରେ ୨୧ଟି ପ୍ରତିଷ୍ଠାନ ରହିଛି ।
ଏହି ଖବରଟିକୁ ପଢନ୍ତୁ-ଅବକାରୀ ବିଭାଗରେ ସାଂଘାତିକ କେଳେଙ୍କାରୀ, ବିନା ଲାଇସେନ୍ସରେ ଚାଲିଛି ମଦ ଦୋକାନ
