ଭୁବନେଶ୍ୱର,୦୭/୦୯: ଆଜି ପବିତ୍ର ଇନ୍ଦ୍ରୋତ୍ସବ ପୂର୍ଣ୍ଣିମା ତଥା ଭାଗବତ ଜନ୍ମତିଥିରେ ଚନ୍ଦ୍ରଗ୍ରାସ ବା ଗ୍ରହଣ ଦୋଷ ରହିଛି । ତେଣୁ ଦିନ ସାଢେ ୧୨ଟାରୁ ରାତି ସାଢେ ୧୧ଟା ପର୍ଯ୍ୟନ୍ତ ଅର୍ଥାତ ପ୍ରାୟ ୧୧ ଘଣ୍ଟା ପର୍ଯ୍ୟନ୍ତ ମହାପ୍ରଭୁ ଶ୍ରୀଲିଙ୍ଗରାଜଙ୍କ ମନ୍ଦିରରେ ଦେବ ନୀତି ଓ ପୂଜା ବନ୍ଦ ରହିବ ବୋଲି ପ୍ରଶାସନ ତରଫରୁ ନିଷ୍ପତ୍ତି ନିଆଯାଇଛି ।
ନିଷ୍ପତ୍ତି ମୁତାବକ, ସକାଳ ୬ଟାରେ ପହଡ ଖୋଲି ପହିଲି ଉପଚାର କ୍ରମରେ ମଙ୍ଗଳ ଆଳତୀ ଓ ଅବକାଶ ଆରମ୍ଭ କରି ଦିନ ସାଢେ ୧୧ଟା ସୁଦ୍ଧା ଠାକୁରାଣୀ ସନ୍ଧ୍ୟାଧୂପ ବଢ଼ିବ । ପରେ ଗ୍ରହଣ ଦୋଷ ଥିବାରୁ ଧାର୍ଯ୍ୟ ସମୟ ପର୍ଯ୍ୟନ୍ତ ଦେଉଳରେ ନୀତି ବନ୍ଦ ରହିବ । ଗ୍ରହଣ ସମୟରେ ସାହଣମେଲା ଦର୍ଶନ ବନ୍ଦ ରଖି କେବଳ ବାହାର କାଠ ବା ଆଡ଼କାଠ ଦର୍ଶନ ଅନୁମତି ରହିଛି । ଗ୍ରହଣ ଅବଧି ସରିବା ପରେ ଶ୍ରୀଜିଉ ବିନ୍ଦୁ ସାଗର ପୁଷ୍କରିଣୀକୁ ଗ୍ରହଣ ସ୍ନାନ ନିମନ୍ତେ ବିଜେ କରିବେ । ସେଠାରୁ ଫେରି ପଞ୍ଚାମୃତରେ ସର୍ବ ମୋକ୍ଷ କରି ଅବଶିଷ୍ଟ ପୂଜା କରାଯିବ ବୋଲି ନୀତି ସୁପରଭାଇଜର ରାଜ କିଶୋର ମହାପାତ୍ର କହିଛନ୍ତି । ଏହି ସ୍ୱତନ୍ତ୍ର ନୀତି ନିର୍ଘଣ୍ଟ ପ୍ରସ୍ତୁତି ନିମନ୍ତେ ଗୁରୁବାର ସନ୍ଧ୍ୟାରେ ମନ୍ଦିର କାର୍ଯ୍ୟାଳୟ ପରିସରରେ ଅତିରିକ୍ତ ଜିଲ୍ଲାପାଳ ତଥା ମନ୍ଦିର କାର୍ଯ୍ୟ ନିର୍ବାହୀ ଅଧିକାରୀ ରୁଦ୍ର ନାରାୟଣ ମହାନ୍ତିଙ୍କ ଅଧ୍ୟକ୍ଷତାରେ ସେବାୟତ ପ୍ରତିନିଧି ଓ ମନ୍ଦିର କର୍ମଚାରୀଙ୍କୁ ନେଇ ଏକ ବୈଠକ ଅନୁଷ୍ଠିତ ହୋଇଥିଲା।
