ଭୁବନେଶ୍ୱର,୦୫/୦୪: କିଏ ହେବେ ରାଜ୍ୟ ବିଜେପି ସଭାପତି? କାହାକୁ ମିଳିବ ବୋର୍ଡ ଓ ନିଗମ ପଦ? କେବେ ହେବ ମନ୍ତ୍ରିମଣ୍ଡଳ ସମ୍ପ୍ରସାରଣ, କିଏ ପିନ୍ଧିବେ ପଗଡ଼ି? ଏ ତିନୋଟି ବିନ୍ଦୁରେ ଘୂରି ବୁଲୁଛି ବିଜେପି ରାଜନୀତି । ନୂଆଦିଲ୍ଲୀରୁ ଭୁବନେଶ୍ୱର ଏ ଆଲୋଚନା ଚାଲିଥିଲେ ମଧ୍ୟ କିଛି ସ୍ପଷ୍ଟ ହେଉନି । ଆଶାୟୀମାନେ ଚାତକ ଭଳି ଅପେକ୍ଷା କରିଛନ୍ତି । ହେଲେ ଆଜି, କାଲି ହୋଇ ଦିନ ଗଡ଼ି ଚାଲିଛି । ବିଧାନସଭାର ବଜେଟ୍ ଅଧିବେଶନ ଶେଷ ହୋଇଛି । ଆସନ୍ତା ୧୦ରେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ତଥା କେନ୍ଦ୍ରମନ୍ତ୍ରୀ ଜେ ପି ନଡ୍ଡା ଓଡ଼ିଶା ଗସ୍ତରେ ଆସୁଛନ୍ତି । ନଡ୍ଡାଙ୍କ ଏ ଗସ୍ତ ପରେ ଏ ଦିଗରେ ଚିତ୍ର ସ୍ପଷ୍ଟ ହେବ ବୋଲି ଦଳ ସୂତ୍ରରୁ ଜଣାପଡ଼ୁଛି ।
ରାଜ୍ୟରେ ବିଜେପି କ୍ଷମତାକୁ ଆସିବାର ୯ ମାସ ହେଲାଣି । ମୋହନଙ୍କ କ୍ୟାବିନେଟରେ ଖାଲିପଡ଼ିଛି ୬ଟି ମନ୍ତ୍ରୀ ପଦ । ମନ୍ତ୍ରିମଣ୍ଡଳ ସଂପ୍ରସାରଣ ହେବ ବୋଲି ୩ ମାସ ତଳୁ ଚର୍ଚ୍ଚା ହେଲାଣି । ହେଲେ ଦିନ ଗଡ଼ୁଛି । ସଂପ୍ରସାରଣର ନାଁ ଗନ୍ଧ ନାହିଁ । ଦଳରେ ଚର୍ଚ୍ଚା ହେଉଛି ଯେ ଏ ପ୍ରସଙ୍ଗରେ କେନ୍ଦ୍ରୀୟ ନେତାଙ୍କ ସହ ମୁଖ୍ୟମନ୍ତ୍ରୀ, ରାଜ୍ୟ ବିଜେପି ସଭାପତି ଦୁଇ ଥର ଆଲୋଚନା କରି ସାରିଲେଣି । ପ୍ରଧାନମନ୍ତ୍ରୀଙ୍କ ଓଡ଼ିଶା ଗସ୍ତ, ଦିଲ୍ଲୀ ନିର୍ବାଚନର ବ୍ୟସ୍ତତା, ବିଧାନସଭାର ବଜେଟ୍ ଅଧିବେଶନ ଆଦି ଆଳରେ ବିଜେପି ଦିଲ୍ଲୀ ଦରବାର ସମୟ ଗଡ଼ାଇଲା । ଏବେ ପୁଣି ମନ୍ତ୍ରୀ ପଦରେ ନିଯୁକ୍ତି ନେଇ ଚର୍ଚ୍ଚା ଜୋର ଧରିଛି । ଏ ଚର୍ଚ୍ଚା ପରେ ମନ୍ତ୍ରୀ ପଗଡ଼ି ପିନ୍ଧିବାକୁ ଲବି ଜୋର ଧରିଛି ।
ସୂଚନା ଅନୁସାରେ, ପ୍ରଦର୍ଶନ ଭିତ୍ତିରେ କିଛି ମନ୍ତ୍ରୀଙ୍କୁ ମନ୍ତ୍ରିମଣ୍ଡଳରୁ ବାଦ୍ ଦିଆଯାଇପାରେ । କିଛି ମନ୍ତ୍ରୀ ବିବାଦୀୟ ମନ୍ତବ୍ୟ ଦେବା ସହ ଆଶାନୁରୂପକ କାମ କରିନାହାନ୍ତି । ତେଣୁ ତାଙ୍କ ବଦଳରେ ଦଳ ନୂଆ ମୁହଁକୁ ନେବାର ସମ୍ଭାବନା ଅଛି । କେନ୍ଦ୍ରାପଡ଼ା, କଟକ, ସୁନ୍ଦରଗଡ଼, ବରଗଡ଼, ବାଲେଶ୍ୱର, କଳାହାଣ୍ଡି, କନ୍ଧମାଳ ଭଳି ୧୭ଟି ଜିଲ୍ଲାକୁ ମନ୍ତ୍ରିମଣ୍ଡଳରେ ପ୍ରତିନିଧିତ୍ୱ ମିଳିନି । ବଡ଼ ପଦ ଆଶାରେ ବିଜେଡିରୁ କିଛି ନେତା ପଘା ଛିଣ୍ଡେଇ ଆସିଥିଲେ । ସେମାନେ ବି ନିରାଶରେ ମୁହଁ ଶୁଖାଇ ବସିଛନ୍ତି । ମନ୍ତ୍ରିମଣ୍ଡଳରେ ଅନୁସୂଚିତ ଜନଜାତି ବର୍ଗରୁ ୩ ଜଣ, ଅନୁସୂଚିତ ବର୍ଗରୁ ୨ ଏବଂ ୫ ଜଣ ଓବିସି ବର୍ଗରୁ ଅଛନ୍ତି । ତେଣୁ ସଂପ୍ରସାରଣ ବେଳେ ମୁଖ୍ୟମନ୍ତ୍ରୀ କେଉଁ ସୂତ୍ରକୁ ଆଧାର କରି ନୂଆ ନିଯୁକ୍ତି ଦେବେ ତାକୁ ନେଇ ଛକିଶୂନ ଚାଲିଛି । ବିଧାନସଭାରେ ଭଲ ପ୍ରଦର୍ଶନ କରିଥିବା କିଛଇ ଯୁବ ଓ ଅଭିଜ୍ଞଙ୍କୁ ମନ୍ତ୍ରୀପଦ ମିଳିପାରେ ବୋଲି କୁହାଯାଉଛି ।
ବୋର୍ଡ ଓ ନିଗମରେ କାହାକୁ ମିଳିବ ଦାୟିତ୍ୱ? ପ୍ରଥମ ଥର ପାଇଁ ରାଜ୍ୟରେ କ୍ଷମତାକୁ ବିଜେପି ଆସିଥିବା ବେଳେ ଦଳ ପାଇଁ କାମ କରିଥିବା ନେତାଙ୍କୁ ପୁରସ୍କାର ଭାବେ ଦଳ ବୋର୍ଡ ଓ ନିଗମରେ ଥଇଥାନ କରିବାକୁ ତାଲିକା ତିଆରି କରିଛି । ରାଜ୍ୟ ପ୍ରଭାରୀ ବିଜୟପାଲ ସିଂ ତୋମାର, ରାଷ୍ଟ୍ରୀୟ ସାଧାରଣ ସଂପାଦକ ତରୁଣ ଚୁଗ, ନଡ୍ଡା ଏବଂ ଅମିତ୍ ଶାହଙ୍କ ସହ ଚର୍ଚ୍ଚା ହୋଇଥିବା କୁହାଯାଉଛି । ବିଧାୟକ ନଥିବା ଓ ସାଙ୍ଗଠନିକ ଦାୟିତ୍ୱକୁ ନିଷ୍ଠାର ସହ ଦାୟିତ୍ୱ ସମ୍ଭାଳିଥିବା ନେତାଙ୍କୁ ବୋର୍ଡ ଓ ନିଗମରେ ଥଇଥାନ କରାଯିବ । ବିଧାୟକମାନଙ୍କୁ ରାଜ୍ୟ ଯୋଜନା ବୋର୍ଡ, ଜିଲ୍ଲା ଯୋଜନା ବୋର୍ଡ ଓ ଅନ୍ୟ କମିଟିରେ ନିଯୁକ୍ତି ମିଳିବ । ଦଳୀୟ ନେତାଙ୍କୁ ଥଇଥାନ କରି ସଂଗଠନକୁ ମଜଭୁତ୍ କରିବାକୁ ଦଳ ଯୋଜନା କରିଛି । ମାତ୍ର ଭାଗବଣ୍ଟାରେ କାଳେ ମୋହର ବାଜିନି ।
ବିଜେପିର ମଣ୍ଡଳ ଓ ଜିଲ୍ଲା ସଭାପତି ଚୟନ ପ୍ରକ୍ରିୟା ସରିଛି । ହେଲେ ଏଯାଏଁ ରାଜ୍ୟ ସଭାପତି ମୁକୁଟ କିଏ ପିନ୍ଧିବ ନିଷ୍ପତ୍ତି ହୋଇପାରିନାହିଁ । ଦଳୀୟ ସଭାପତି ନିଷ୍ପତ୍ତି ନେଇ ରାଜ୍ୟ ବିଜେପି କାର୍ଯ୍ୟାଳୟରେ ୩ ଥର ବୈଠକ ସରିଥିଲା ବେଳେ ଦିଲ୍ଲୀରେ ମଧ୍ୟ ୨ଥର ବୈଠକ ସରିଛି । ହେଲେ କିଏ ହେବ ଓଡ଼ିଶା ବିଜେପି ମଙ୍ଗୁଆଳ ତାହା ଏଯାଏଁ ଅସ୍ପଷ୍ଟ । ନିଃଶ୍ୱାସ ଅଟକାଇ ଆଶାୟୀ ଭେଟେରାନମାନେ ଅପେକ୍ଷା କରିଛନ୍ତି ।
ବର୍ତ୍ତମାନର ସଭାପତି ମନମୋହନ ସାମଲଙ୍କ ସହ ଏକାଧିକ ଓଜନିଆ ନେତାଙ୍କ ନାମକୁ ନେଇ ଚର୍ଚ୍ଚା ଚାଲିଥିଲା ବେଳେ ହାଇକମାଣ୍ଡ କାହା ମୁଣ୍ଡରେ ସୁନାକଳସ ଢ଼ାଳିବେ ତା ଉପରେ ସମସ୍ତଙ୍କ ଆଖି । ଆସନ୍ତା ୧୦ରେ ନଡ୍ଡା ଓଡ଼ିଶା ଗସ୍ତରେ ଆସି ଦଳୀୟ କାର୍ଯ୍ୟାଳୟରେ ଗୁରୁତ୍ୱପୂର୍ଣ୍ଣ ବୈଠକରେ ସାମିଲ ହେବେ । ତାଙ୍କ ଗସ୍ତ ପରେ ମନ୍ତ୍ରିମଣ୍ଡଳ ସଂପ୍ରସାରଣ, ନିଗମ ଓ ବୋର୍ଡ ନିଯୁକ୍ତି ନେଇ ଦଳର ଆଭିମୁଖ୍ୟ ସ୍ପଷ୍ଟ ହେବ । ଓଡ଼ିଆ ନୂଆବର୍ଷ ବେଳକୁ ଦଳର ବହୁ ନେତା ବଡ଼ ଖବର ପାଇପାରନ୍ତି ବୋଲି ନୂଆଦିଲ୍ଲୀର ସୂତ୍ର କହୁଛି ।
