ଭୁବନେଶ୍ୱର, ୧୮।୧୧: ବାଲିଯାତ୍ରା ବୁଲିବା ପାଇଁ ଯିବା ସମୟରେ ବିଦ୍ୟୁତ୍ ଆଘାତରେ ଛାତ୍ର ମୃତ୍ୟୁ ଘଟଣା । କଟକ କ୍ୟାଣ୍ଟନମେଣ୍ଟ ଥାନାରେ ପରିବାର ଲୋକଙ୍କ ପକ୍ଷରୁ ଏତଲା ଦିଆଯାଇଥିବା ଜଣାପଡ଼ିଛି । ଘଟଣାର ପୁଙ୍ଖାନୁ ପୁଙ୍ଖ ତଦନ୍ତ କରିବା ସହ ସିସିଟିଭି ଯାଞ୍ଚ କରିବା ପାଇଁ ଦାବି ହୋଇଛି । ଘଟଣା ପାଇଁ ଦାୟୀ କର୍ତ୍ତୁପକ୍ଷଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ପାଇଁ ମଧ୍ୟ ପରିବାର ଲୋକ ଦାବି କରିଛନ୍ତି ।
ସୂଚନାନୁସାରେ, ରବିବାର ରାତିରେ ବିଦ୍ୟୁତ୍ ଆଘାତରେ ଛାତ୍ର ବିଶ୍ଵ ପ୍ରକାଶ ମନ୍ଥନଙ୍କ ମୃତ୍ୟୁ ଘଟିଥିଲା । ଯାତ୍ରା ପଡ଼ିଆ ସମ୍ମୁଖ ରିଂ ବନ୍ଧର ଦୁଇ ରାସ୍ତା ମଝିରେ ଥିବା ବାଡ଼ରେ ସଜାଯାଇଥିବା ଲିଚୁ ଲାଇଟ୍ ତାର ସଂସ୍ପର୍ଶରେ ଆସି ବିଶ୍ୱପ୍ରକାଶଙ୍କ ମୃତ୍ୟୁ ହୋଇଥିବା ଜଣାପଡ଼ିଥିଲା । ବାରବାଟି କଟକ ବିଧାୟିକା ସୋଫିଆ ଫିର୍ଦୋସ ମୃତ ଛାତ୍ରଙ୍କ ପରିବାରକୁ ଭେଟିଛନ୍ତି । ଏହି ଅଘଟଣ ପାଇଁ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ବିଧାୟିକା ସୋଫିୟା ଦାବି କରିଛନ୍ତି । ଚଳିତ ବାଲିଯାତ୍ରା ବିଭ୍ରାଟକୁ ନେଇ ଆସନ୍ତା ବିଧାନସଭାରେ ପ୍ରଶ୍ନ ଉଠାଇବେ ବୋଲି କହିଛନ୍ତି ବିଧାୟିକା ।
ଅନ୍ୟପଟେ ଘଟଣାର ତଦନ୍ତ ଆରମ୍ଭ କରିଛି କ୍ୟାଣ୍ଟନମେଣ୍ଟ ଥାନା ପୋଲିସ । କିଏ ଲିଚୁ ଲାଇଟ୍ ଲଗାଇଥିଲା ? ବିଦ୍ୟୁତ୍ କାର୍ଯ୍ୟ କାହା ଦାୟିତ୍ଵରେ ଥିଲା ? କିଏ ଏହି ଅବହେଳା ପାଇଁ ଦାୟୀ ? ଏସବୁକୁ ନେଇ କିଛି ବ୍ୟକ୍ତିଙ୍କୁ ପୋଲିସ ପଚରାଉଚରା କରୁଛି । ଘଟଣାର ତଦନ୍ତ ପାଇଁ ବିଦ୍ୟୁତ୍ ବିଭାଗ ପକ୍ଷରୁ ଏକ ଟିମ୍ ଗଠନ କରାଯାଇଛି । ଯିଏ ଏହି ଅବହେଳା ପାଇଁ ଦାୟୀ ତଦନ୍ତରେ ଜଣାପଡ଼ିଲେ ତା’ ବିରୋଧରେ କାର୍ଯ୍ୟାନୁଷ୍ଠାନ ହେବ । ଏହା ଜଣାତରେ ହୋଇଛି କି ଅଜାଣତରେ ତାହା ମଧ୍ୟ ତଦନ୍ତ କରାଯାଉଛି । ମୃତ ଛାତ୍ରଙ୍କ ପରିବାରକୁ ପ୍ରଶାସନର ନିୟମ ଅନୁସାରେ କ୍ଷତିପୂରଣ ଦିଆଯାଇଥିବା ଜିଲ୍ଲାପାଳ ଦତ୍ତାତ୍ରେୟ ଭାଓ ସାହେବ୍ ଶିନ୍ଧେଙ୍କ ସୂଚନା ଦେଇଛନ୍ତି ।
