ଭୁବନେଶ୍ୱର, ୦୯/୦୬: ଚଳିତ ଶିକ୍ଷାବର୍ଷରେ ଛାତ୍ର ସଂସଦ ନିର୍ବାଚନ ହେବ । ଏପରି ସଂକେତ ମିଳିବା ପରେ ନିଜର ସାଂଗଠନିକ ପ୍ରସ୍ତୁତି ଆରମ୍ଭ କରିଛନ୍ତି ଛାତ୍ର ନେତା । କ୍ୟାମ୍ପସରେ ପତିଆରା ଜାହିର କରିବା ଲାଗି ପ୍ରସ୍ତୁତି କରୁଛନ୍ତି । କାହାର ଜନ୍ମଦିନ ପାଳନ କରି କେକ୍ କାଟୁଛନ୍ତି ତ ଆଉ କିଏ ବିଭିନ୍ନ ଉତ୍ସବ ନାଁରେ ଭୋଜିଭାତ କରି ପିଲାଙ୍କୁ ଏକାଠି କରୁଛନ୍ତି । ଆଗକୁ ନାମଲେଖା ଆରମ୍ଭ ହେବାକୁ ଥିବା ବେଳେ ନବାଗତଙ୍କ ସହ ହେଲ୍ପଡେସ୍କ ମାଧ୍ୟମରେ ଯୋଡ଼ି ହେବାକୁ ଏବେଠୁ ପ୍ରସ୍ତୁତି ଚାଲିଛି ।
ରାଜ୍ୟରେ ବିଜେପି ସରକାର ଆସିବା ପରେ କ୍ୟାମ୍ପସକୁ ଛାତ୍ର ସଂସଦ ନିର୍ବାଚନ ଫେରିବା ନେଇ ଆଶା ସଞ୍ଚରି ଥିଲା । ହେଲେ ଗତବର୍ଷ ସମୟ ଅଭାବ, ଭିତ୍ତିଭୂମି ପ୍ରସ୍ତୁତି ହୋଇନଥିବାରୁ ସରକାର ନିର୍ବାଚନ କଲେ ନାହିଁ । ଏବର୍ଷ ଛାତ୍ର ସଂସଦ ନିର୍ବାଚନ ନେଇ ସରକାର ଚିନ୍ତା କରୁଛନ୍ତି । ପ୍ରସ୍ତୁତି ମଧ୍ୟ ଆରମ୍ଭ କରାଯାଇଛି । ଦଶହରା ପୂର୍ବରୁ ନିର୍ବାଚନ କରିବାକୁ ଯୋଜନା ରହିଛି ।
ଗତ ମେ ୨୧ ତାରିଖରେ ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ ଗଣମାଧ୍ୟମକୁ କହିଥିଲେ, ଏବର୍ଷ ଛାତ୍ର ସଂସଦ କରିବା ପାଇଁ ସରକାର ଚିନ୍ତା କରୁଛନ୍ତି । ସେଥିଲାଗି ଉଚ୍ଚଶିକ୍ଷା ବିଭାଗ ଆଗୁଆ ପ୍ରକ୍ରିୟା ଆରମ୍ଭ କରିଛି । ଯୁକ୍ତ ତିନି ନାମଲେଖା, ପିଜି ନାମଲେଖା, ବିଏଡ୍ ନାମଲେଖା ପ୍ରକ୍ରିୟା ଆଗୁଆ ଆରମ୍ଭ ହୋଇଛି । ଠିକ୍ ସମୟରେ ନାମଲେଖା ଶେଷ କରାଯିବ । ଆସନ୍ତା ଜୁଲାଇ ୧୫ରୁ ପାଠପଢ଼ା ଆରମ୍ଭ କରିବାକୁ ଲକ୍ଷ୍ୟ ରଖାଯାଇଛି । ପାଠ୍ୟକ୍ରମରେ ଯେପରି କିଛି ଅସୁବିଧା ନହେବ ସେଥିଲାଗି ଆଗୁଆ ନାମଲେଖା ପ୍ରକ୍ରିୟା ଆରମ୍ଭ ହୋଇଛି । ଯଦି ପାଠପଢ଼ା ବ୍ୟବସ୍ଥିତ ହୁଏ ତେବେ ଦଶହରା ପୂର୍ବରୁ ଛାତ୍ର ସଂସଦ ନିର୍ବାଚନ କରାଯିବ । ଛାତ୍ର ସଂସଦ ନିର୍ବାଚନ ପାଇଁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି । ଏହାକୁ ଆମ ବିଭାଗ ଆଗ୍ରହର ସହ ଗ୍ରହଣ କରି ନିର୍ବାଚନ କିପରି ହୋଇପାରିବ ସେଥିଲାଗି ଆଗୁଆ ପ୍ରସ୍ତୁତି ଆରମ୍ଭ କରୁଛି ବୋଲି ଶ୍ରୀ ସୂରଜ କହିଥିଲେ ।
ଅନ୍ୟପଟେ ତିନି ପ୍ରମୁଖ ଛାତ୍ର ସଂଗଠନ କ୍ୟାମ୍ପସରେ ହେଲ୍ପଡେସ୍କ କରିବେ । ସମସ୍ତ ବିଶ୍ୱବିଦ୍ୟାଳୟ, କଲେଜରେ ଛାତ୍ରନେତାମାନେ ପ୍ରସ୍ତୁତି ଆରମ୍ଭ କରିଛନ୍ତି । ବନ୍ଧୁମିଳନ, ସ୍ୱଚ୍ଛତା ଅଭିଯାନ, ବୃକ୍ଷରୋପଣ ଆଦି କାର୍ଯ୍ୟକ୍ରମ କରି ପିଲାଙ୍କ ନିକଟତର ହେବାକୁ ଚେଷ୍ଟା କରୁଛନ୍ତି । ପୂର୍ବରୁ କୌଣସି ସମସ୍ୟାକୁ ନେଇ ଏତେ ମାତ୍ରାରେ ଆନ୍ଦୋଳନ ହେଉନଥିବା ବେଳେ ଏବେ କିନ୍ତୁ ଛାତ୍ର ସଂଗଠନ ପୂରା ସକ୍ରିୟ ହୋଇଛନ୍ତି ।
ଉଲ୍ଲେଖଯୋଗ୍ୟ ଯେ ୨୦୧୭ରୁ ତତ୍କାଳୀନ ସରକାର ବିଭିନ୍ନ ବାହାନା ଦେଖାଇ ଛାତ୍ରସଂସଦ ନିର୍ବାଚନ ବନ୍ଦ କରିଥିଲେ । ବିଜେପି ସରକାରକୁ ଆସିବା ପୂର୍ବରୁ ଛାତ୍ରସଂସଦ ନିର୍ବାଚନ ନେଇ ପ୍ରତିଶ୍ରୁତି ଦେଇଥିଲା ।
