ନୂଆଦିଲ୍ଲୀ,୧୯।୩: ଦୀର୍ଘ ନଅ ମାସର ଅପେକ୍ଷାର ଅନ୍ତଃ ଘଟିଛି। ଶେଷରେ ମହାକାଶରୁ ପୃଥିବୀପୃଷ୍ଠକୁ ଫେରି ଆସିଛନ୍ତି ମହାକାଶଚାରୀ ସୁନୀତା ୱିଲିୟମ୍ସ ଓ ବୁଚ୍ ୱିଲ୍ମୋର। ଦୀର୍ଘ ୧୭ ଘଣ୍ଟାର ଯାତ୍ରା ପରେ ସ୍ପେସ୍ ଷ୍ଟେସନରୁ ବାହାରି ପୃଥିବୀରେ ପହଞ୍ଚିଛନ୍ତି ସୁନୀତା ଏବଂ ବୁଚ୍। ବୁଧବାର ସକାଳେ ଫ୍ଲୋରିଡ଼ା ତଟରେ ଅବତରଣ କରିଥିଲା ସ୍ପେସ୍ ଏକ୍ସ କ୍ରିଉ ଡ୍ରାଗନ୍ କ୍ୟାପସୁଲ। ମହାକାଶରେ ୯ ମାସ ବିନା ଗ୍ରାଭିଟିରେ ବିତାଇବା ପରେ ଏବେ ସୁନିତା ଏବଂ ତାଙ୍କ ସାଥିଙ୍କୁ ପୃଥିବୀ ପୃଷ୍ଠରେ ରହିବାରେ ଅନେକ ସମସ୍ୟା ହେବ। ଆରମ୍ଭରୁ ଏହା ଏତେ ସହଜ ହେବନି।
ଡ୍ରାଗ୍ସନ୍ ସ୍ପେସ୍କ୍ରାଫ୍ଟରୁ ସୁନିତା ଓ ଅନ୍ୟ ମହାକାଶଚାରୀ ସୁରକ୍ଷିତ ଭାବରେ ପୃଥିବୀରେ ପାଦ ରଖିଛନ୍ତି। ପହଁଞ୍ଚିବା ମାତ୍ରେ ସୁନିତା ଓ ଅନ୍ୟ ମହାକାଶଚାରୀଙ୍କୁ ଷ୍ଟେ୍ରଚରରେ ନାସାର ବିମାନ ଭିତରକୁ ନିଆଯାଇଥିଲା। ଏହାପରେ ତାଙ୍କୁ ହୁଷ୍ଟନରେ ଥିବା ଜନ୍ସନ୍ ସ୍ପେସ୍ ସେଣ୍ଟରକୁ ନିଆଯାଇଛି। ସେଠାରେ ୪୫ ରୁ ଦିନରୁ ଅଧିକ ଦୁଇ ମହାକାଶଚାରୀ ଡାକ୍ତରୀ ଦେଖାଶୁଣାରେ ରହିବେ। ସୁନିତା ଓ ଅନ୍ୟ ମହାକାଶଚାରୀଙ୍କୁ ପୃଥିବୀ ପୃଷ୍ଠରେ ଆଡଜଷ୍ଟ କରିବା ଖୁବ୍ କଷ୍ଟକର ହେବ। କାରଣ ତାଙ୍କୁ ଚାଲିବାରେ ସମସ୍ୟା ହେବ। ୯ ମାସ ମହାକାଶରେ ରହିବା ପରେ ତଳିପାଦ ନରମ ପଡିଯାଇଥାଏ। ଏହି କାରଣରୁ ଚାଲିବା ଖୁବ୍ କଷ୍ଟକର ହୋଇଯାଏ। କାରଣ ପୃଥିବୀର ମାଧ୍ୟାକର୍ଷଣ ଶକ୍ତି କାରଣରୁ ପାଦର ଚମଡା ମୋଟା ଓ ଶକ୍ତ ହୋଇଥାଏ। ପୂର୍ବଭଳି ପାଦ ହେବା ପାଇଁ ଆଉ କିଛି ସପ୍ତାହ କିମ୍ବା ମାସ ଲାଗିପାରେ। ମହକାଶରେ ହାଡର ଘନତ୍ବ କମ୍ ହୋଇଯାଏ। ଫଳରେ ହାଡ ଦୁର୍ବଳ ହେବା ସହ ପାଦ, ପିଠି, ବେକର ମାଂସପେଶୀରେ ପ୍ରଭାବ ପଡିଥାଏ।
ମହାକାଶଯାତ୍ରୀ ପୃଥିବୀ ଫେରିବା ପରେ ତାଙ୍କୁ ସିଧାସଳଖ ଘରକୁ ଯିବାର ଅନୁମତି ମିଳିନଥାଏ। ତାଙ୍କୁ କିଛି ଦିନ ପର୍ଯ୍ୟନ୍ତ ଡାକ୍ତରଙ୍କ ଦେଖାଶୁଣାରେ ରଖାଯାଏ। ଏହା ଏକ ନିୟମିତ ପକ୍ରିୟା। ମେଡିକାଲ ଯାଞ୍ଚର ପକ୍ରିୟା ଶେଷ ହେବା ପରେ ଅବଜରଭେସନ୍ରେ ରହିବେ। ଏହି ସମୟରେ ତାଙ୍କୁ ପରିବାର ସଦସ୍ୟ ଓ ବନ୍ଧୁଙ୍କୁ ଦେଖାକରିବାକୁ ଦିଆଯାଏ। ଏହାଛଡା ମହାକାଶଯାତ୍ରୀ ଏହି ମିଶନ୍ ସମୟରେ ନିଜର ଅନୁଭବ, ସମସ୍ୟା ଏବଂ ସଫଳତା ମଧ୍ୟ ସେୟାର କରିଥାନ୍ତି। ନାସାର ଇଣ୍ଟର ନ୍ୟାସନାଲ ସ୍ପେସ୍ ଷ୍ଟେସନ୍ ପୋଗ୍ରାମର ଅପରେସନ୍ ମ୍ୟାନେଜର କହିଛନ୍ତି, ସମସ୍ତ ମହାକାଶଚାରୀଙ୍କୁ ସର୍ଭେ ଏବଂ ମୂଲ୍ୟାଙ୍କନ କରିବାକୁ ପଡିଥାଏ। ସେଭଳି ନାସାର କମର୍ସିଆଲ କ୍ରୁ ପୋଗ୍ରାମ ମ୍ୟାନେଜର କହିଛନ୍ତି, ସମସ୍ତ ମହାକାଶଚାରୀଙ୍କୁ ନିରାପଦରେ ଫେରାଇ ଆଣିବାର ସୁଯୋଗ ଆମେ ଖୋଜୁଥିଲୁ। ଯାହାକି ଏବେ ସଫଳ ହୋଇଛି। ’
