ନୂଆଦିଲ୍ଲୀ: ଓକିଲ ମାନଙ୍କୁ ସମନ ପଠାଇବା ଘଟଣାରେ ପ୍ରବର୍ତ୍ତନ ନିର୍ଦ୍ଦେଶାଳୟ (ED)କୁ ତୀବ୍ର ଭର୍ତ୍ସନା କରିଛନ୍ତି ସୁପ୍ରିମକୋର୍ଟ । ଶୁଣାଣି ସମୟରେ ସଲିସିଟର ଜେନେରାଲ ତୁଷାର ମେହେଟା ଅଭିଯୋଗ କରିଛନ୍ତି ଯେ, କିଛି ରାଜନେତା ସାକ୍ଷାତକାର ମାଧ୍ୟମରେ ED ବିରୋଧରେ ଏକ କାହାଣୀ ସୃଷ୍ଟି କରିବାକୁ ଚେଷ୍ଟା କରୁଛନ୍ତି। ମୁଖ୍ୟ ବିଚାରପତି ଭୂଷଣ ରାମକୃଷ୍ଣ ଗାଭାଇ ( ସିଜେଆଇ ବି.ଆର୍.ଗାଭାଇ) ଏହାର ପ୍ରତିବାଦ କରି କହିଛନ୍ତି ଯେ, ବିଚାରପତି ମାନଙ୍କ ପାଖରେ YouTube ଦେଖିବା ପାଇଁ ଯଥେଷ୍ଟ ସମୟ ନାହିଁ।

ଏକ ଜାତୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ସୁପ୍ରିମକୋର୍ଟ ଅନ୍ ରେକର୍ଡ ଆସୋସିଏସନ୍, ସୁପ୍ରିମକୋର୍ଟ ବାର୍ ଆସୋସିଏସନ୍, ଇନ-ହାଉସ୍ ଲୟର୍ସ ଆସୋସିଏସନ୍ ଏବଂ ଅନ୍ୟାନ୍ୟ ଆଇନଗତ ସଂସ୍ଥା ଏକ ହସ୍ତକ୍ଷେପ ଆବେଦନ ଦାଖଲ କରି କୋର୍ଟକୁ କହିଛନ୍ତି ଯେ, ED ସେମାନଙ୍କ ମହକିଲ ମାନଙ୍କୁ ଆଇନଗତ ପରାମର୍ଶ ଦେବାକୁ ନେଇ ଅନେକ ବରିଷ୍ଠ ଓକିଲଙ୍କୁ ସମନ ପଠାଇଛି । ପ୍ରସଙ୍ଗ ଥିଲା ଯେ,  ହସ୍ତକ୍ଷେପ ଆବେଦନରେ, ED ଓକିଲ ମାନଙ୍କୁ ସମନ ପଠାଇବା ପାଇଁ ନିର୍ଦ୍ଦେଶାବଳୀ ସ୍ଥିର କରିବାକୁ ଦାବି କରିଥିଲା, ଯେତେବେଳେ ED ଯୁକ୍ତି ଦେଇଥିଲା ଯେ ଅନେକ ସମୟରେ ହତ୍ୟା ମାମଲା ଭଳି ମାମଲାରେ ଲୋକମାନେ ମୃତଦେହ ଲୁଚାଇବା ପାଇଁ ମଧ୍ୟ ଓକିଲଙ୍କ ଠାରୁ ପରାମର୍ଶ ନିଅନ୍ତି। 

ମାମଲାର ଶୁଣାଣି ସମୟରେ, ମୁଖ୍ୟ ବିଚାରପତି ଭୂଷଣ ରାମକୃଷ୍ଣ ଗାଭାଇ କହିଥିଲେ ଯେ, ଯଦି ଜଣେ ଓକିଲ ତାଙ୍କ ମହକିଲଙ୍କୁ ଭୁଲ ପରାମର୍ଶ ଦିଅନ୍ତି, ତେବେ ତାଙ୍କୁ କିପରି ସମନ କରାଯାଇ ପାରିବ। ଏଥିପାଇଁ ନିର୍ଦ୍ଦେଶାବଳୀ ସ୍ଥିର କରିବା ଆବଶ୍ୟକ। ଏହା ଉପରେ ବରିଷ୍ଠ ଓକିଲ ବିକାଶ ସିଂହ କହିଛନ୍ତି ଯେ, ଇଡିର ଏହି କାର୍ଯ୍ୟ ଆଇନଗତ ବୃତ୍ତିକୁ ପ୍ରଭାବିତ କରୁଛି। ଅନ୍ୟ ଦେଶ ଗୁଡ଼ିକ ବିଷୟରେ ଉଲ୍ଲେଖ କରି ସେ କହିଛନ୍ତି, 'ଆମେ ତୁର୍କୀରେ ଦେଖିଲୁ ଯେ କିପରି ସମଗ୍ର ବାର୍ ଆସୋସିଏସନ୍ ଭାଙ୍ଗି ଦିଆଗଲା। ଆମେ ଚୀନରେ ମଧ୍ୟ ସମାନ ଜିନିଷ ଦେଖିଲୁ। ଆମକୁ ସେହି ଦିଗରେ ଯିବା ଉଚିତ୍ ନୁହେଁ। କିଛି ନିର୍ଦ୍ଦେଶାବଳୀ ସ୍ଥିର କରିବା ଆବଶ୍ୟକ।'

ସିଜେଆଇ ଗଭାଇ ମଧ୍ୟ ଆଡଭୋକେଟ ବିକାଶ ସିଂହଙ୍କ ସହ ସହମତ ହୋଇଥିଲେ ଏବଂ କହିଥିଲେ ଯେ ସେ ଜଣେ ଆମିକସ୍ କ୍ୟୁରି ନିଯୁକ୍ତ କରିବେ ଏବଂ ଆସନ୍ତା ସପ୍ତାହରେ ମାମଲାର ଶୁଣାଣି କରିବେ। ସେ କହିଥିଲେ ଯେ ଆମେ ସମସ୍ତେ ଓକିଲ। ସଲିସିଟର ଜେନେରାଲ ତୁଷାର ମେହେଟ୍ଟା ଇଡି ପକ୍ଷରୁ କହିଥିଲେ ଯେ, ଏଜେନ୍ସିର ଛବିକୁ ଖରାପ କରିବା ପାଇଁ ପ୍ରୟାସ କରାଯାଉଛି। ଏଜେନ୍ସି ବିରୋଧରେ ଏକ କାହାଣୀ ତିଆରି କରିବାକୁ ଚେଷ୍ଟା କରାଯାଉଛି। 

ଏସ.ଜି ତୁଷାର ମେହେଟ୍ଟାଙ୍କ ଯୁକ୍ତି ଉପରେ ସିଜେଆଇ ବି.ଆର ଗଭାଇ କହିଥିଲେ, 'ଆମର ଖବରକାଗଜ ପଢ଼ିବା କିମ୍ବା ୟୁଟ୍ୟୁବ୍ ଦେଖିବା ପାଇଁ ସମୟ ନାହିଁ। ଗତ ସପ୍ତାହରେ ଯେତେବେଳେ ମୁଁ ହସ୍ପିଟାଲରେ ଭର୍ତ୍ତି ହୋଇଥିଲି ସେତେବେଳେ ମୋତେ ଏକ ଫିଲ୍ମ ଦେଖିବାର ସୁଯୋଗ ମଧ୍ୟ ମିଳିଥିଲା।' ଏସଜି ତୁଷାର ମେହେଟ୍ଟା କହିଛନ୍ତି ଯେ ସେ କହୁନାହାଁନ୍ତି ଯେ କୋର୍ଟ ଗୁଡ଼ିକ କୌଣସି ସାକ୍ଷାତକାର କିମ୍ବା କାହାଣୀ ଦ୍ୱାରା ପ୍ରଭାବିତ।