ନୂଆଦିଲ୍ଲୀ,୨୧/୦୭: ଅପରେସନ ସିନ୍ଦୁର ସମୟରେ ପରାଜୟର ସମ୍ମୁଖୀନ ହେବା ପରେ, ପାକିସ୍ତାନ ଭାରତ ଉପରେ ଡ୍ରୋନ ଆକ୍ରମଣ କରିଥିଲା। ତଥାପି, ଆମର ବାୟୁ ପ୍ରତିରକ୍ଷା ପ୍ରଣାଳୀ ଆକାଶରେ ପାକିସ୍ତାନର ଘୃଣ୍ୟ କାର୍ଯ୍ୟକୁ ଧ୍ବଂସ କରିବାରେ ସଫଳ ହୋଇ‌ଥିଲା। ଏବେ ଭାରତୀୟ ସେନା ଆହୁରି ସ୍ମାର୍ଟ କାର୍ଯ୍ୟାନୁଷ୍ଠାନ ପାଇଁ ପ୍ରସ୍ତୁତି ଆରମ୍ଭ କରିଛି। ସେନା ୨୦୨୬-୨୭ ସୁଦ୍ଧା କୃତ୍ରିମ ବୁଦ୍ଧିମତ୍ତା ଅର୍ଥାତ୍‌ ଏଆଇ, ମେସିନ୍ ଲର୍ଣ୍ଣିଂ ଏବଂ ବିଗ୍ ଡାଟା ଆନାଲିଟିକ୍ସ ଭଳି ପ୍ରଯୁକ୍ତିବିଦ୍ୟା ଗ୍ରହଣ କରିବାକୁ ପ୍ରସ୍ତୁତ ହେଉଛି। ଇଣ୍ଡିଆନ୍ ଏକ୍ସପ୍ରେସ୍‌ର ରିପୋର୍ଟ ଅନୁଯାୟୀ, ଯୁଦ୍ଧ କ୍ଷେତ୍ରରେ ଉତ୍ତମ ସୂଚନା ସଂଗ୍ରହ କରିବା, ଶୀଘ୍ର ନିଷ୍ପତ୍ତି ନେବା ଏବଂ ସୈନିକମାନଙ୍କୁ ତାଲିମ ଦେବା ପାଇଁ ସେନା ଏହି ନୂଆ ଟେକ୍ନୋଲୋଜୀ ବ୍ୟବହାର କରିବ। ଅପରେସନ ସିନ୍ଦୁର ପରେ ସେନା ଏହି ନିଷ୍ପତ୍ତି ନେଇଛି। କେବଳ ଏତିକି ନୁହେଁ, ଏଥିପାଇଁ ଏକ ଏଆଇ ଟାସ୍କ ଫୋର୍ସ ମଧ୍ୟ ଗଠନ କରାଯିବ।

ନୂଆ ଅତ୍ୟାଧୁନିକ ପ୍ରକ୍ରିୟାରେ  ଶକ୍ତିଶାଳୀ ହେବ ସେନା:

ଭାରତୀୟ ସେନାକୁ ଅଧିକ ଶକ୍ତିଶାଳୀ କରିବା ପାଇଁ କେନ୍ଦ୍ର ସରକାର ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଉଛନ୍ତି। ଏଥିରେ ଭାରତୀୟ ସଶସ୍ତ୍ର ବାହିନୀ ଏଆଇ ଟେକ୍ନୋଲୋଜୀ ବ୍ୟବହାର କରିବାକୁ ପ୍ରସ୍ତୁତି ଚାଲିଛି। ଇଣ୍ଡିଆନ୍ ଏକ୍ସପ୍ରେସ୍ ରିପୋର୍ଟ ଅନୁଯାୟୀ, ଡ୍ରୋନ୍, ସାଟେଲାଇଟ, ବିମାନ ଏବଂ ଭୂମିରେ ସ୍ଥାପିତ ସେନ୍ସରରୁ ପ୍ରାପ୍ତ ସୂଚନା ପ୍ରକ୍ରିୟାକରଣ ପାଇଁ ମଧ୍ୟ ଏଆଇ ବ୍ୟବହାର କରାଯିବ। ଏହି ସୂଚନାକୁ ମିଶ୍ରଣ କରିବା ଦ୍ୱାରା ଶୀଘ୍ର ନିଷ୍ପତ୍ତି ନେବାରେ ସାହାଯ୍ୟ ମିଳିବ। ପୂର୍ବରୁ ସେନାରେ ଏଆଇ ବ୍ୟବହାର କରିବା ବିଷୟରେ ଆଲୋଚନା ହେଉଥିଲା, କିନ୍ତୁ ଏବେ ଏହାକୁ ଦ୍ରୁତ ଗତିରେ କାର୍ଯ୍ୟକାରୀ କରାଯାଉଛି।

AI ଚାଟବଟ୍ ଏବଂ ଭଏସ୍-ଟୁ-ଟେକ୍ସଟ୍ ସିଷ୍ଟମର ବ୍ୟବହାର:

୨୦୨୬-୨୭ ସୁଦ୍ଧା ଏହି ଟେକ୍ନୋଲୋଜୀଗୁଡ଼ିକୁ ସମ୍ପୂର୍ଣ୍ଣ ଭାବରେ ଗ୍ରହଣ କରିବାକୁ ସେନା ଲକ୍ଷ୍ୟ ରଖିଛି। ସେନା ଏହି ପ୍ରଯୁକ୍ତିବିଦ୍ୟାଗୁଡ଼ିକୁ ଅନେକ କ୍ଷେତ୍ରରେ ବ୍ୟବହାର କରିବାକୁ ଯୋଜନା କରୁଛି। ଏଥିରେ ଗୁପ୍ତଚର ସଂଗ୍ରହ, ଅନୁସନ୍ଧାନ ବୃଦ୍ଧି, ଲଜିଷ୍ଟିକ୍ସ ଏବଂ ଯୋଗାଣ ଶୃଙ୍ଖଳା ପରିଚାଳନା, ସାମାଜିକ ଗଣମାଧ୍ୟମର ବିଶ୍ଳେଷଣ, ଶତ୍ରୁର କ୍ଷମତା ଚିହ୍ନଟ କରିବା ଆଦି ଅନ୍ତର୍ଭୁକ୍ତ। ଏଆଇ ଚାଟବଟ୍ ଏବଂ ଭଏସ୍-ଟୁ-ଟେକ୍ସଟ୍ ସିଷ୍ଟମ୍ ମଧ୍ୟ ବ୍ୟବହାର କରାଯିବ।

ଏହି ନୂଆ ଟେକ୍ନୋଲୋଜୀ ମୁହଁ ଚିହ୍ନଟ ଏବଂ ଅସ୍ୱାଭାବିକ ଢାଞ୍ଚା କିମ୍ବା ବିପଦ ଚିହ୍ନଟ ପାଇଁ ମଧ୍ୟ ଏଆଇକୁ ବ୍ୟବହାର କରିବ। ଅପରେସନ୍ ସିନ୍ଦୂରରୁ ଶିକ୍ଷା ପାଇବା ପରେ ସେନା ଏହି ପ୍ରଯୁକ୍ତିବିଦ୍ୟାଗୁଡ଼ିକୁ ଦ୍ରୁତ ଗତିରେ ଗ୍ରହଣ କରିବାକୁ ନିଷ୍ପତ୍ତି ନେଇଛି। ମେ ମାସରେ ପାକିସ୍ତାନ ଏବଂ ପାକ୍ ଅଧିକୃତ କାଶ୍ମୀରରେ ଆତଙ୍କବାଦୀ ଆଡ୍ଡା ଉପରେ ଅପରେସନ୍ ସିନ୍ଦୂର ମାଧ୍ୟମରେ ଆକ୍ରମଣ କରିଥିଲା ଭାରତ। ଏହି ପ୍ରଯୁକ୍ତିବିଦ୍ୟାକୁ କାର୍ଯ୍ୟକାରୀ କରିବା ପାଇଁ ଏକ ଏଆଇ ଟାସ୍କ ଫୋର୍ସ ଗଠନ କରାଯିବ।

କେମିତି କାମ କରିବ ଏଆଇ ଟାସ୍କ ଫୋର୍ସ: 

ଏହି ଟାସ୍କ ଫୋର୍ସ ଡାଇରେକ୍ଟର ଜେନେରାଲ ଇନଫର୍ମେସନ ସିଷ୍ଟମ୍ସ (ଡିଜିଆଇଏସ୍) ଅଧୀନରେ କାମ କରିବ। ଏଥିରେ ସେନାର ଅନ୍ୟ ନିର୍ଦ୍ଦେଶାଳୟର ପ୍ରତିନିଧିମାନେ ମଧ୍ୟ ସାମିଲ ହେବେ। ଏହି ଟାସ୍କ ଫୋର୍ସ ତାଲିମ ଏବଂ କ୍ଷମତା ନିର୍ମାଣ, ତଥ୍ୟ ଅଂଶୀଦାର, ରକ୍ଷଣାବେକ୍ଷଣ ଏବଂ ସମର୍ଥନ, ସମନ୍ୱୟ, ଗବେଷଣା ଏବଂ ବିକାଶକୁ ପ୍ରୋତ୍ସାହିତ କରିବା ଏବଂ କ୍ରୟ ପ୍ରକ୍ରିୟାରେ ଏହି ପ୍ରଯୁକ୍ତିବିଦ୍ୟାକୁ ଅନ୍ତର୍ଭୁକ୍ତ କରିବା ଭଳି କ୍ଷେତ୍ରଗୁଡ଼ିକ ଉପରେ ଧ୍ୟାନ ଦେବ। ନୂଆ ଉପକରଣ କିଣିବା ପାଇଁ ଜେନେରାଲ ଷ୍ଟାଫ୍ କ୍ବାଲିଟେଟିଭ୍‌ ରିକ୍ବାରମେଣ୍ଟସ (ଜିଏସ୍‌କ୍ୟୁଆର୍‌) ରେ ଏଆଇ ବୈଶିଷ୍ଟ୍ୟଗୁଡ଼ିକୁ ସାମିଲ କରାଯିବ। ସେନା ପୁରୁଣା ଟେକ୍ନୋଲୋଜୀରେ ଏଆଇ କ୍ଷମତା ଯୋଡ଼ିବାକୁ ମଧ୍ୟ ଯୋଜନା କରୁଛି।