ନୂଆଦିଲ୍ଲୀ,୧୩/୧୨: ଦେଶର ବିଭିନ୍ନ ସ୍ଥାନରେ ଚାଲିଥିବା ମନ୍ଦିର-ମସ୍ଜିଦ ବିବାଦ ଉପରେ ଗୁରୁବାର ସୁପ୍ରିମକୋର୍ଟରେ ଶୁଣାଣି ହୋଇଛି । ଏଭଳି ମାମଲାରେ ଅଦାଲତଗୁଡ଼ିକ କୌଣସି ଆଦେଶ ନ ଦେବାକୁ ତଥା କୌଣସି ମନ୍ଦିର-ମସ୍ଜିଦ୍ର ସର୍ଭେ ନିର୍ଦ୍ଦେଶ ଜାରି ନ କରିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି । ସୁପ୍ରିମକୋର୍ଟଙ୍କ ୩ ଜଣିଆ ଖଣ୍ଡପୀଠ ପ୍ଲେସେସ୍ ଅଫ୍ ଓରସିପ୍ ଆକ୍ଟ ବା ପୂଜାସ୍ଥଳ ଆଇନ (ବିଶେଷ ପ୍ରାବଧାନ) ୧୯୯୧ର କିଛି ଧାରାର ବୈଧତା ଉପରେ ଆଗତ ପିଟିସନଗୁଡ଼ିକର ଶୁଣାଣି କରୁଛନ୍ତି । ଏହି ଆକ୍ଟ ବିରୋଧରେ ସିପିଆଇଏମ୍, ଇଣ୍ଡିଆନ୍ ମୁସ୍ଲିମ ଲିଗ୍, ଏନସିପି (ଶରଦ ପାୱାର), ଆର୍ଜେଡି ସାଂସଦ ମନୋଜ କୁମାର, ଡିଏମ୍କେ ସମେତ ୬ ପାର୍ଟି ପକ୍ଷରୁ ପିଟିସନ ହୋଇଛି ।
ଶୁଣାଣି ବେଳେ ସିଜେଆଇ ସଞ୍ଜୀବ ଖାନ୍ନାଙ୍କ ଖଣ୍ଡପୀଠ କହିଥିଲେ, ଆମେ ଏହି ଆଇନର ପରିସୀମା, ଏହାର ଶକ୍ତି ଏବଂ ଢାଞ୍ଚାକୁ ଯାଞ୍ଚ କରୁଛୁ । ଏଭଳି ସ୍ଥିତିରେ ଏହା ହିଁ ଉଚିତ ହେବ ଯେ ବାକି ସମସ୍ତ ଅଦାଲତ ପଡ଼ି ରହିଥିବା ମନ୍ଦିର-ମସ୍ଜିଦ୍ ମାମଲାରେ କୌଣସି ନିର୍ଦ୍ଦେଶ ଜାରି ନ କରନ୍ତୁ । ମଥୁରା ଶାହି ଇଦ୍ଗାହ, ଜ୍ଞାନବାପୀ ମସ୍ଜିଦ, ସମ୍ଭଲ ମସ୍ଜିଦ ବାବଦରେ ହିନ୍ଦୁ ପକ୍ଷରୁ ପିଟିସନ ହୋଇ ସେଠାରେ ଏକଦା ହିନ୍ଦୁ ମନ୍ଦିର ଥିଲା ବୋଲି ଦାବି କରାଯାଇଛି । ଏହା ସହ ଦେଶର ବିଭିନ୍ନ ଅଦାଲତରେ ଏଭଳି ୧୮ରୁ ଅଧକ ମାମଲା ପଡ଼ି ରହିଛି । ସେଥିମଧ୍ୟରେ ୧୦ଟି ମସ୍ଜିଦ୍ ସହ ଜଡ଼ିତ ବୋଲି ସୁପ୍ରିମକୋର୍ଟ କହିଥିଲେ । ଏଥିସହ ଏଭଳି ପିଟିସନ ଉପରେ ସୁପ୍ରିମକୋର୍ଟ କେନ୍ଦ୍ର ସରକାରଙ୍କୁ ୪ ସପ୍ତାହ ଭିତରେ ଜବାବ ରଖିବାକୁ ନିର୍ଦ୍ଦେଶ ଦେଇଛନ୍ତି । ଯେ ପର୍ଯ୍ୟନ୍ତ କେନ୍ଦ୍ର ସରକାର ଜବାବ ରଖିନାହାନ୍ତି ସେ ପର୍ଯ୍ୟନ୍ତ ଶୁଣାଣି ହୋଇପାରିବନି ବୋଲି ଖଣ୍ଡପୀଠ କହିଛନ୍ତି । ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ କୋର୍ଟରେ ଏଭଳି ନୂଆ ମାମଲା ଦାଖଲ ନ କରାଯିବାକୁ ମଧ୍ୟ ନିର୍ଦ୍ଦେଶ ରହିଛି । ଖଣ୍ଡପୀଠରେ ସିଜେଆଇ ଖାନ୍ନାଙ୍କ ସମେତ ଜଷ୍ଟିସ୍ ସଞ୍ଜୟ କୁମାର ଏବଂ ଜଷ୍ଟିସ୍ କେଭି ବିଶ୍ୱନାଥନ ରହିଛନ୍ତି ।
ଦ ପ୍ଲେସେସ୍ ଅଫ୍ ଓରସିପ୍ ଆକ୍ଟ-୧୯୯୧ ଅନୁସାରେ, ଦେଶ ସ୍ୱାଧୀନତା ପାଇବାବେଳେ ଅର୍ଥାତ ୧୯୪୭ ଅଗଷ୍ଟ ୧୫ ପର୍ଯ୍ୟନ୍ତ ପୂଜାସ୍ଥଳଗୁଡ଼ିକ ଯେଉଁ ସ୍ଥିତିରେ ଥିଲା ତାହା ସେମିତି ହିଁ ରହିବ । ବିଜେପି ନେତା ତଥା ଆଡ୍ଭୋକୋଟ୍ ଅଶ୍ୱିନୀ ଉପାଧ୍ୟାୟ, ସୁବ୍ରମଣ୍ୟମ ସ୍ୱାମୀ, କଥାବାଚକ ଦେବକୀନନ୍ଦନ ଠାକୁର, କାଶୀର ରାଜକୁମାର କୃଷ୍ଣ ପ୍ରିୟା, ଧର୍ମଗୁରୁ ସ୍ୱାମୀ ଜିତେନ୍ଦ୍ରାନନ୍ଦ ସରସ୍ୱତୀଙ୍କ ସମେତ ଅନେକ ବ୍ୟକ୍ତି ଏହି ଆକ୍ଟକୁ ଅସମ୍ବିଧାନିକ ଘୋଷଣା କରିବାକୁ ଦାବି କରିଛନ୍ତି।
