ମାଲକାନଗିରି,୨୨।୧ (ଆପ୍ର ): ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡର ନାରାୟଣପୁର ପୋଲିସ ନିକଟରେ ୮ ମାଓବାଦୀଙ୍କ ଆତ୍ମସମର୍ପଣ କରିଛନ୍ତି।ଛତିଶଗଡର ନାରାୟଣପୁର ଜିଲ୍ଲାରେ ମାଓ ଦମନ ନିମନ୍ତେ ପୋଲିସ ଦ୍ୱାରା ପରିଚାଳିତ ଆତ୍ମସମର୍ପଣ ନୀତି ଦ୍ୱାରା ପ୍ରଭାବିତ ହୋଇ ୮ ଜଣ ମାଓବାଦୀ ଆତ୍ମସମର୍ପଣ କରିଛନ୍ତି। ଏହି ଆତ୍ମସମର୍ପଣ କାରୀ ମାଓବାଦୀ ହେଲେ ଏସିଏମ କ୍ୟାଡର ମାଓବାଦୀ ଦିଲୀପ ଧୃୱା, ସୁଧାରାମ ପୋୟାମ, ସୁକଲି ଟିମ୍ମା, ସୋନି କୋରାମ, ଅମ୍ରିତା ନୁରେଟି, ଘାସି ପୋଡିୟମ, ମଙ୍ଗାଲୁ କଶ୍ୟପ, ସୁଦାନି ଭାଡା। ଏହି ମାଓବାଦୀମାନଙ୍କ ଉପରେ ୮ ଲକ୍ଷ ଟଙ୍କାରୁ ଅଧିକ ପୁରସ୍କାର ଘୋଷଣା କରାଯାଇଥିବା ନେଇ ପୋଲିସ ପକ୍ଷରୁ ସୂଚନା ଦିଆଯାଇଛି।
ଆତ୍ମସମର୍ପଣ କରିଥିବା ମାଓବାଦୀମାନେ ନାରାୟଣପୁର, ବିଜାପୁର ଏବଂ ଦାନ୍ତେୱାଡା ଅଞ୍ଚଳରେ ଅନେକ ମାଓ ହିଂସାକାଣ୍ଡରେ ଜଡିତ ଥିଲେ। ଏହି ମାଓବାଦୀଙ୍କ ଆତ୍ମସମର୍ପଣ ମାଓ ଡିଭିଜନର କୁତୁଲ ଏରିଆ ମାଓ କମିଟିର ମାଓବାଦୀଙ୍କ ପାଇଁ ଏକ ବଡ଼ ଝଟକା ବୋଲି କୁହାଯାଇଛି। ଆତ୍ମସମର୍ପଣ ପରେ ସରକାରୀ ନିୟମ ଅନୁଯାୟୀ ପ୍ରୋତ୍ସାହନ ସ୍ୱରୂପ ୨୫ ହଜାରଲେଖାଏଁ ଟଙ୍କାର ଚେକ୍ ପ୍ରଦାନ କରାଯାଇଥିବା ସହ ସମସ୍ତ ସୁବିଧା ଯୋଗାଇ ଦିଆଯିବ ବୋଲି ପୋଲିସପକ୍ଷରୁ ସୂଚନା ଦିଆଯାଇଛି।
ସୂଚନାଯୋଗ୍ୟ ଯେ ଗତ ୧୬ ତାରିଖରେ ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡର ନାରାୟଣପୁର ଜିଲ୍ଲାରେ ୪ କୁଖ୍ୟାତ ମାଓବାଦୀ ଆତ୍ମସମର୍ପଣ କରିଥିଲେ । ମାଓ କମାଣ୍ଡର ଆରବଙ୍କ ସମେତ ଚାରି ଜଣ ମାଓବାଦୀ ମାଓ ସଙ୍ଗଠନ ଛାଡି ନାରାୟଣପୁର ପୋଲିସ ନିକଟରେ ଆତ୍ମସମର୍ପଣ କରିଥିଲେ। ଏହି ଆତ୍ମସମର୍ପଣକାରୀ ନକ୍ସଲମାନଙ୍କ ଉପରେ ମୋଟ ୩୨ ଲକ୍ଷ ଟଙ୍କାର ପୁରସ୍କାର ଘୋଷଣା କରାଯାଇଥିଲା।
