ଭୁବନେଶ୍ୱର, ୧୮।୧୧: ଏବେ ସାରା ଓଡ଼ିଶାରେ ଚର୍ଚ୍ଚା କୁନି ସାରଥୀ । ବାବା କଳ୍କୀ ଭଗବାନ । ଏବେ ଚଢ଼ୁଛନ୍ତି କେଟିଏମ୍ । ଖଣ୍ତଗିରିରେ ରହିଛି ବିରାଟ ଆଶ୍ରମ । ସରକାରୀ ଜାଗାରେ ଶ୍ରୀ ବୈକୁଣ୍ଠଧାମ ଆଶ୍ରମର ବିଶାଳ ସାମ୍ରାଜ୍ୟକୁ ନେଇ ତମ୍ବିତୋଫାନ ପରେ ଏବେ ତତ୍ପର ହୋଇ ଉଠିଛି ଜିଲ୍ଲା ପ୍ରଶାସନ । ମଙ୍ଗଳବାର ଆଶ୍ରମକୁ ଯିବ ଏକ ସରକାରୀ ଦଳ । ଏହା ସରକାରୀ ଜମି ନା ଘରୋଇ ଜମି, ତନାଘନା ପରେ ନିଆଯିବ କାର୍ଯ୍ୟାନୁଷ୍ଠାନ । ଖୋର୍ଦ୍ଧା ଜିଲ୍ଲାପାଳ ଚଞ୍ଚଳ ରାଣାଙ୍କ କହିବାନୁସାରେ, ବେଆଇନ ଭାବେ ଆଶ୍ରମ ନିର୍ମାଣ ହୋଇଥିଲେ ନିଶ୍ଚିତ କାର୍ଯ୍ୟାନୁଷ୍ଠାନ ନିଆଯିବ । ଭୁବନେଶ୍ୱର ଉପଜିଲ୍ଲାପାଳଙ୍କ ନେତୃତ୍ୱରେ ଏକ ଟିମ୍ ଆଶ୍ରମରେ ଯାଞ୍ଚ କରି ରିପୋର୍ଟ ଦେବେ । ତେବେ ଏହା ରାଜସ୍ୱ ନା ସାଧାରଣ ପ୍ରଶାସନ ବିଭାଗ ଅଧୀନରେ ଆସୁଛି ତାହା ଯାଞ୍ଚ ପରେ ସ୍ପଷ୍ଟ ହେବ ବୋଲି ଶ୍ରୀ ରାଣା କହିଛନ୍ତି । ଏହି ଘଟଣାରେ ରାଜ୍ୟ ଶିଶୁ ଅଧିକାର ଓ ସୁରକ୍ଷା ଆୟୋଗ ନିଜ ଆଡ଼ୁ ରୁଜୁ କରିଛି ମାମଲା । ଆୟୋଗ ଅଧ୍ୟକ୍ଷା ମନ୍ଦାକିନୀ କର ଘଟଣା ସମ୍ପର୍କରେ ଭରତପୁର ଥାନାକୁ ରିପୋର୍ଟ ତଲବ କରିଛନ୍ତି । ଆଗାମୀ ୧୫ ଦିନ ମଧ୍ୟରେ ରିପୋର୍ଟ ଦାଖଲ ପାଇଁ ଦିଆଯାଇଛି ନିର୍ଦ୍ଦେଶ ।
ସେହିଭଳି ଘଟଣାର ତଦନ୍ତ କରିବା ପାଇଁ ସିଡବ୍ଲୁସିକୁ ମଧ୍ୟ ନିର୍ଦ୍ଦେଶ ଦିଆଯାଇଛି । କୁନି ସାରଥି ପାଦରେ ତୁଳସୀ ରଖି ପୂଜା ହେବା ନେଇ ଆସିଥିଲା ବଡ଼ ଅଭିଯୋଗ । ଏନେଇ ଶେଷରେ ମୁହଁ ଖୋଲିଛନ୍ତି ନାବାଳକର ବାପା ପଣ୍ଡିତ କାଶୀନାଥ ମିଶ୍ର । ପଣ୍ଡିତ କାଶୀନାଥ ମିଶ୍ର ଏକ ଭିଡିଓ ବାର୍ତ୍ତା ଜାରି କରିଛନ୍ତି । କିଛି କୁଚକ୍ରୀ ଗୋଷ୍ଠୀ ମତେ ବଦନାମ କରିବାକୁ ଚକ୍ରାନ୍ତ ଚଳାଇଛନ୍ତି ବୋଲି ଶ୍ରୀ ମିଶ୍ର ପାଲଟା ଅଭିଯୋଗ କରିଛନ୍ତି ।
ଜଣେ ନାବାଳକକୁ ‘କଳକୀ ଅବତାର’ ଦର୍ଶାଇବା ଘଟଣା ପ୍ରଘଟ ପରେ ସମସ୍ତଙ୍କ ପାଇଁ ବନ୍ଦ ହୋଇଯାଇଥିଲା ଆଶ୍ରମର ଫାଟକ । ଆଶ୍ରମର ଭକ୍ତ ଓ ସଦସ୍ୟ କାହାରିକୁ ଭିତରକୁ ପ୍ରବେଶ ପାଇଁ ଅନୁମତି ଦେଉନଥିଲେ । ଏହାକୁ ନେଇ ରବିବାର ତାତିଥିଲେ ସ୍ଥାନୀୟ ବାସିନ୍ଦା । ମୁହାଁମୁହିଁ ହୋଇଥିଲେ ଆଶ୍ରମ ଭକ୍ତ ଓ ସ୍ଥାନୀୟ ଲୋକ । ଶତାଧିକ ବାସିନ୍ଦା ଏକାଠି ହୋଇ ଆଶ୍ରମର ଫାଟକକୁ ଭାଙ୍ଗି ଭିତରକୁ ଧସେଇ ପଶିଥିଲେ । ଆଶ୍ରମରେ ପଣ୍ଡିତ କାଶୀନାଥ କିମ୍ବା ତାଙ୍କ ଏମବିଏ ପଢ଼ୁଆ ପୁଅର ଦେଖା ଦର୍ଶନ ମିଳିନଥିଲା । କାର୍ ଡିକିରେ ଲୁଚି କଳ୍କୀ ଭଗବାନ ଚମ୍ପଟ୍ ମାରିଥିବା ଅଭିଯୋଗ କରିଥିଲେ ସ୍ଥାନୀୟ ଲୋକେ । ଭକ୍ତମାନେ ଅଶ୍ରାବ୍ୟ ଭାଷାରେ ସ୍ଥାନୀୟ ଲୋକ ଓ ଗଣମାଧ୍ୟମ ପ୍ରତିନିଧିଙ୍କୁ ଗାଳି କରିଥିଲେ । ଏହାକୁ ନେଇ ପ୍ରକାଶ ପାଇଥିଲା ଉତ୍ତେଜନା । ଭରତପୁର ଥାନା ପୁଲିସ ଘଟଣାସ୍ଥଳରେ ପହଞ୍ଚି ସ୍ଥିତି ସମ୍ଭାଳିଥିଲା ।
