ଭୁବନେଶ୍ବର,୨୪/୦୬: କେନ୍ଦୁଝର ଜିଲ୍ଲା ଆନନ୍ଦପୁର ଉପଖଣ୍ଡ ଘଷିପୁରା ତହସିଲଦାରଙ୍କ ମନମୁଖୀ କାର୍ଯ୍ୟ। ଅଫିସ ଭିତରକୁ ଜୋତା ଖୋଲି ପ୍ରବେଶ କରୁଛନ୍ତି ଲୋକେ । ଆପତ୍ତି ଅଭିଯୋଗ ପାଇଁ ବାବୁଙ୍କ ନିକଟକୁ ଆସୁଥିବା ଲୋକଙ୍କ ପାଇଁ ଚୌକି ମଧ୍ୟ କାଢି ଦେଇଛନ୍ତି ତହସିଲଦାର । ହେଲେ ବାବୁ ଚୌକିରେ ବସି ନିଜ ବାବୁଗିରି ଦେଖାଇ ଶୁଣିବେ ଅଭିଯୋଗ। ତେବେ ସାଧାରଣ ଲେକଙ୍କ ପାଇଁ ତହସିଲଦାରଙ୍କ ଏଭଳି ହିନମାନ୍ୟତାକୁ ନେଇ ଏବେ ସ୍ଥାନୀୟ ଅଞ୍ଚଳରେ ଅସନ୍ତୋଷ ଦେଖାଦେଇଛି ।
ଘଷିପୁରା ତହସିଲଦାର ଅଭୟ କୁମାର ସ୍ବାଇଁ କାର୍ଯ୍ଯାଳୟଠାରେ ଥିବା ନିଜ ଚ୍ୟାମ୍ବର କାନ୍ଥରେ ପୋଷ୍ଟର ମାରିଛନ୍ତି ,ସେଥିରେ ନିଜ ଦସ୍ତଖତ ମଧ୍ୟ କରିଛନ୍ତି । ଯେଉଁଥିରେ ସାଧାରଣ ଲୋକଙ୍କ ପାଇଁ ଚ୍ୟାମ୍ବର ଭିତରକୁ ଜୋତା ପିନ୍ଧି ଯିବା ମନା ବୋଲି ଏଥିରେ ଉଲ୍ଲେଖ ରହିଛି । ହେଲେ କର୍ମଚାରୀମାନେ ଜୋତା ପିନ୍ଧି ଅବାଧ ପ୍ରବେଶ କରୁଛନ୍ତି। ସେପଟେ ଏହି ବାବୁ ଜଣକ ଏଠାରେ ଯୋଗଦେବା ପରଠାରୁ ଲୋକଙ୍କ ପାଇଁ ଥିବା ଚୌକି କୁ ହଟାଇଛନ୍ତି। ହେଲେ ବଡବଡିଆ ଆସିଲେ ଚୌକି ମଗାଇ ସେମାନଙ୍କୁ ବସା ଯାଉଥିବା ଅଭିଯୋଗ ହୋଇଛି । ସେପଟେ ଏନେଇ ସାଧାରଣ ଲୋକେ ତହସିଲଦାରଙ୍କୁ ପ୍ରଶ୍ନ କରିବାରୁ ସେ କହିଛନ୍ତି ଯେ ,ଚ୍ଯାମ୍ବରରେ ଠାକୁର ଥିବାରୁ ଜୋତା ଚପଲ ମନା କରାଯାଇଛି। ଚେୟାର ପକାଇଲେ ଲୋକେ ବସି ଖଟି କରିବେ , କାମ ହେବ ନାହିଁ ବୋଲି କହିଛନ୍ତି । ତେବେ ଏଠି ପ୍ରଶ୍ନ ଉଠୁଛି , କର୍ମଚାରୀମାନଙ୍କ ପାଇଁ କଣ ଠାକୁର ନାହାଁନ୍ତି ନା ଯେଉଁ ଅଧିକାରୀମାନେ ସାଧାରଣଲୋକଙ୍କ ପାଇଁ ଚୌକିଟିଏ ରଖିଛନ୍ତି ସେଠାରେ କଣ କାମ ହେଉନାହିଁ ।
