ନୂଆଦିଲ୍ଲୀ: ମୁମ୍ବାଇ ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ତହବୁର୍ ରାଣାକୁ NIA ଲଗାତାର ଭାବେ ପଚରାଉଚରା ଜାରି ରଖିଛି। ଏହି ସମୟରେ,ଏକ ଜାତୀୟ ଗଣମାଧ୍ୟମ ରିପୋର୍ଟ କରିଛି ଯେ, ତହବୁର୍ ରାଣା ତାଙ୍କ ପରିବାର ବିଷୟରେ ଚିନ୍ତିତ। ୨୬/୧୧ ଆତଙ୍କବାଦୀ ଆକ୍ରମଣର ଷଡ଼ଯନ୍ତ୍ରକାରୀ ଏବେ ତାଙ୍କ ପରିବାର ସହିତ କଥା ହେବାକୁ ଚାହୁଁଛନ୍ତି ।
ନିକଟରେ ସୂଚନା ମିଳିଛି ଯେ, ତହବୁର ରାଣା NIA ଅଧିକାରୀଙ୍କ ଠାରୁ କଲମ, କାଗଜ ଏବଂ କୁରାନ ଦାବି କରିଥିଲେ। ଆଉ ତାଙ୍କର ଏହି ଦାବି ମଧ୍ୟ ପୂରଣ ହୋଇଥିଲା। ଏବେ, ରାଣା ତାଙ୍କ ଭାଇଙ୍କ ସହ କଥା ହେବା ପାଇଁ ଦାବି କରୁଛନ୍ତି । ଆଉ ଏଥିପାଇଁ ଅନୁମତି ଦେବାର ପ୍ରକ୍ରିୟା ବିଷୟରେ ତଦନ୍ତକାରୀ ସଂସ୍ଥାକୁ ପଚାରୁଛନ୍ତି।
କେବଳ ଏତିକି ନୁହେଁ ତହବୁର ରାଣା ତଦନ୍ତକାରୀ ସଂସ୍ଥା ଠାରୁ ଆମିଷ ଖାଦ୍ୟ ମଧ୍ୟ ଦାବି କରିଛନ୍ତି। ତେବେ ନିର୍ଦ୍ଧାରିତ ନିୟମ ଅନୁଯାୟୀ ରାଣାଙ୍କୁ ଖାଦ୍ୟ ଦିଆଯାଉଛି। ଏନଆଇଏ ପକ୍ଷରୁ କୁହାଯାଇଛି ଯେ ହେପାଜତରେ ପଚରାଉଚରା ସମୟରେ, ତହବୁର ରାଣା ତଦନ୍ତକାରୀ ସଂସ୍ଥାକୁ ସହଯୋଗ କରୁନାହାଁନ୍ତି। କେବଳ ଏତିକି ନୁହେଁ, ତହବୁର ରାଣା ୨୬/୧୧ ଆତଙ୍କବାଦୀ ଆକ୍ରମଣରେ ତାଙ୍କର ଭୂମିକାକୁ ମଧ୍ୟ ଅସ୍ୱୀକାର କରୁଛନ୍ତି।
ତହବୁର ରାଣା ତଦନ୍ତକାରୀ ସଂସ୍ଥାକୁ କହିଛନ୍ତି ଯେ, ମୁମ୍ବାଇ ଆତଙ୍କବାଦୀ ଆକ୍ରମଣରେ ତାଙ୍କର କୌଣସି ଭୂମିକା ନାହିଁ। ରାଣାଙ୍କର ସମୟ ସମୟରେ NIA ଦ୍ୱାରା ଡାକ୍ତରୀ ପରୀକ୍ଷା କରାଯାଉଛି ଏବଂ ତାଙ୍କ ସ୍ୱାସ୍ଥ୍ୟାବସ୍ଥା ଠିକ୍ ରହିଛି। ତଦନ୍ତକାରୀ ସଂସ୍ଥା ରାଣାଙ୍କୁ ୨୬/୧୧ ଆତଙ୍କବାଦୀ ଆକ୍ରମଣରେ ମିଳିଥିବା ପ୍ରମାଣ ଦେଖାଇ ପଚରାଉଚରା କରୁଛି। ତଥାପି, ସେ ତଦନ୍ତକାରୀ ସଂସ୍ଥାକୁ ସହଯୋଗ କରୁନାହାଁନ୍ତି।
୨୬ ନଭେମ୍ବର ୨୦୦୮ରେ ୧୦ ଜଣ ଆତଙ୍କବାଦୀ ମୁମ୍ବାଇର ତାଜ ହୋଟେଲ, ଓବେରୟ ଟ୍ରାଇଡେଣ୍ଟ, ଛତ୍ରପତି ଶିବାଜୀ ଟର୍ମିନସ୍ ଏବଂ ନରିମାନ ହାଉସ୍ ସମେତ ଅନେକ ସ୍ଥାନରେ ଆକ୍ରମଣ କରିଥିଲେ। ଏହି ଆକ୍ରମଣ ସମଗ୍ର ଦେଶକୁ ଥରାଇ ଦେଇଥିଲା।
