ଚେନ୍ନାଇ,୧୩/୧୨: ତାମିଲନାଡୁର ଡିଣ୍ଡିଗୁଲ୍ସ୍ଥିତ ଏକ ଘରୋଇ ଅର୍ଥୋପେଡିକ୍ ହସ୍ପିଟାଲରେ ଗୁରୁବାର ରାତିରେ ଭୟଙ୍କର ଅଗ୍ନିକାଣ୍ଡ ଘଟିଛି। ଏଥିରେ ୭ ଜଣ ପ୍ରାଣ ହରାଇଥିବା ବେଳେ ୨୮ ଜଣ ଆହତ ହୋଇଛନ୍ତି । ମୃତକଙ୍କ ମଧ୍ୟରେ ଦୁଇ ମହିଳା ଓ ଜଣେ ଶିଶୁ ଥିବା ଜଣାପଡ଼ିଛି ।
ସୂଚନା ମୁତାବକ, ସର୍ଟ ସର୍କିଟ୍ ଯୋଗୁ ହସ୍ପିଟାଲର ଗ୍ରାଉଣ୍ଡ ଫ୍ଲୋର୍ରେ ଥିବା ରିସେପସନ୍ରୁ ପ୍ରଥମେ ନିଆଁ ଲାଗିଥିଲା । ଆଖି ପିଛୁଳାକେ ଭୟଙ୍କର ରୂପ ଧାରଣ କରି ନିଆଁ ସବୁ ଫ୍ଲୋର୍କୁ ବ୍ୟାପିଯାଇଥିଲା । ପରେ ସମ୍ପୂର୍ଣ୍ଣ ହସ୍ପିଟାଲ କୋଠା ଜଳିବାକୁ ଲାଗିଥିଲା । ଖବର ପାଇ ଅଗ୍ନିଶମ କର୍ମଚାରୀ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ । ପ୍ରାୟ ୫୦ଟି ଆମ୍ବୁଲାନ୍ସ ପହଞ୍ଚି ରୋଗୀମାନଙ୍କୁ ଉଦ୍ଧାର କରି ଅନ୍ୟ ହସ୍ପିଟାଲରେ ପହଞ୍ଚାଇଥିଲା । ଡିଣ୍ଡିଗୁଲ୍ ସରକାରୀ ହସ୍ପିଟାଲରେ ଅତିକମ୍ରେ ୩୦ ରୋଗୀଙ୍କୁ ଚିକିତ୍ସା ପାଇଁ ଭର୍ତ୍ତି କରାଯାଇଛି । ଅଗ୍ନିଶମ କର୍ମଚାରୀମାନେ ପ୍ରାୟ ୧ ଘଣ୍ଟା ଧରି ଅକ୍ଳାନ୍ତ ପରିଶ୍ରମ କରି ନିଆଁକୁ ଲିଭାଇଥିଲେ । ଅଗ୍ନିକାଣ୍ଡ ପରେ ୪ ମହଲାବିଶିଷ୍ଟ ହସ୍ପିଟାଲରେ ଶତାଧିକ ରୋଗୀ ଫସି ରହିଥିଲେ । ତ୍ରିଚି ରୋଡ୍ସ୍ଥିତ ସିଟି ହସ୍ପିଟାଲରେ ଏହି ଅଗ୍ନିକାଣ୍ଡ ଘଟିଛି । କିଛି ରୋଗୀ ଗୁରୁତର ଥିବାରୁ ମୃତ୍ୟୁ ସଂଖ୍ୟା ବଢ଼ିବା ଆଶଙ୍କା କରାଯାଉଛି ।
