ନୂଆଦିଲ୍ଲୀ: ଚେନ୍ନାଇ ଥର୍ମାଲ ପାୱାର ଷ୍ଟେସନରେ ନିର୍ମାଣାଧୀନ ଏକ କୋଠା ଭୁଶୁଡ଼ି ୯ ଜଣ ଶ୍ରମିକଙ୍କ ମୃତ୍ୟୁ ଘଟିଛି । କୁହାଯାଉଛି କି, ୩୦ ଫୁଟ ଉଚ୍ଚ ଏକ କାନ୍ଥ ଅନେକ ଶ୍ରମିକଙ୍କ ଉପରେ ପଡ଼ିଯିବାରୁ ଏହି ଦୁର୍ଘଟଣା ଘଟିଛି । ଅନେକ ଶ୍ରମିକ ଏବେ ବି ଭଗ୍ନାବଶେଷ ତଳେ ଚାପି ହୋଇ ରହିଛନ୍ତି । ସେମାନଙ୍କୁ ଉଦ୍ଧାର କରିବା କାର୍ଯ୍ୟ ଜାରି ରହିଛି ।
ନ୍ୟୁଜ୍ ଏଜେନ୍ସି IANS ଅନୁଯାୟୀ, ସମସ୍ତ ମୃତକଙ୍କୁ ପୋଷ୍ଟମର୍ଟମ ପାଇଁ ଷ୍ଟାନଲି ହସ୍ପିଟାଲକୁ ନିଆଯାଇଛି, ଯେତେବେଳେକି ଆଉ କିଛି ଜଣଙ୍କ ଅବସ୍ଥା ଗୁରୁତର ରହିଛି। ପୋଲିସ କମିଶନରେଟ୍ କହିଛି, "ଭୁଶୁଡ଼ିବାର ସଠିକ୍ କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଉଦ୍ଧାର କାର୍ଯ୍ୟ ଚାଲିଛି, ଏବଂ ତଦନ୍ତ ଆରମ୍ଭ ହୋଇଛି। ୧୦ ରୁ ଅଧିକ ଲୋକ ଗୁରୁତର ଆହତ ହୋଇଛନ୍ତି।"
ତାମିଲନାଡୁ ବିଦ୍ୟୁତ୍ ବୋର୍ଡ (TNEB) ସଚିବ ଡକ୍ଟର ଜେ. ରାଧାକୃଷ୍ଣନ କହିଛନ୍ତି, "ସେଠାରେ ମୋଟ ୩୭୦୦ ଶ୍ରମିକ କାମ କରୁଥିଲେ। ସୁରକ୍ଷା ଅଧିକାରୀ ଏବଂ କର୍ମଚାରୀ ମାନେ ବିଭିନ୍ନ ଦଳ ସହିତ ଘଟଣାସ୍ଥଳ ଯାଞ୍ଚ କରୁଛନ୍ତି। ଆମେ ନିଶ୍ଚିତ କରୁଛୁ ଯେ ଆଉ କୌଣସି ସମସ୍ୟା ନାହିଁ।" ସେ ଆହୁରି କହିଛନ୍ତି ଯେ ସମସ୍ତ ପୀଡିତ ଆସାମର ବାସିନ୍ଦା।
ହସ୍ପିଟାଲ ଅଧିକାରୀ କହିଛନ୍ତି ଯେ, ଅନେକ ଶ୍ରମିକ ଗୁରୁତର ଆହତ ହୋଇଛନ୍ତି ଏବଂ ସେମାନଙ୍କୁ ଇଣ୍ଟେନସିଭ୍ କେୟାର ୟୁନିଟରେ ଚିକିତ୍ସା କରାଯାଉଛି। ଜରୁରୀକାଳୀନ ସେବା ଏବଂ ଉଦ୍ଧାର ଦଳ ଗୁଡ଼ିକୁ ତୁରନ୍ତ ଘଟଣାସ୍ଥଳକୁ ମୁତୟନ କରାଯାଇଛି ।
