ଭୁବନେଶ୍ୱର,୧୧/୧୧: ଉତ୍ସାହିତ ହୋଇ କରିପକାଉଛନ୍ତି ଟାଟୁ । ତେବେ କିଏ କଳା କରୁଛନ୍ତି ତ ଆଉ କିଏ ରଙ୍ଗିନ୍ । କିନ୍ତୁ ପରେ ଚିନ୍ତା ଘାରୁଛି କେମିତି ଲିଭାଇବେ । ଏଥିପାଇଁ ରହୁଛି ବିଭିନ୍ନ କାରଣ । କାହାକୁ ଟାଟୁ ପସନ୍ଦ ଆସୁନି ତ ଆଉ କିଏ ଟାଟୁକୁ ଲୁଚାଇବାକୁ ଚାହୁଁଛି । ହେଲେ ମନ୍ଦିରଠୁ ମୁଖଶାଳା ବଳିପଡ଼ିଲା ଭଳି ଟାଟୁ କରିବାରେ ଯେତିକି ଖର୍ଚ୍ଚ ହେଉଛି ଲିଭାଇବାରେ ତାହାର ୧୦ ଗୁଣା ଖର୍ଚ୍ଚ ହେଉଛି ।
ଲିଭାଇଲେ ବି ସଂପୂର୍ଣ୍ଣ ଲିଭୁନି । ଚର୍ମ ଖରାପ ହେବାର ବି ଭୟ ରହୁଛି । ଯୁବପିଢି ନିଜକୁ ଫ୍ୟାସନ୍ବେଲ୍ କରିବା ପାଇଁ ବିଭିନ୍ନ ପଦ୍ଧତି ଆପଣାଉଛନ୍ତି । ସେଥିରେ ଯୋଡ଼ିହୋଇଯାଇଛି ଟାଟୁ । ସାଧାରଣତଃ ୨ ପ୍ରକାର ଟାଟୁ ଦେଖାଯାଉଛି ଯଥା- କଳା ଏବଂ ରଙ୍ଗିନ୍ । କଳା ଟାଟୁର ମୂଲ୍ୟ ହଜାରେ ଟଙ୍କାରୁ ଆରମ୍ଭ ହେଉଥିବାବେଳେ ରଙ୍ଗିନ୍ ଟାଟୁ କରିବା ପାଇଁ ଟିକେ ଅଧିକ ଖର୍ଚ୍ଚ ହେଉଛି ।
ସେହିଭଳି କଳା ଟାଟୁକୁ ଲିଭାଇବା ଠାରୁ ରଙ୍ଗିନ୍ ଟାଟୁକୁ ଲିଭାଇବାରେ ଅଧିକ ସମୟ ତଥା ଟଙ୍କା ମଧ୍ୟ ଖର୍ଚ୍ଚ ହୋଇଥାଏ । ଏହାକୁ ଲିଭାଇବାକୁ ହେଲେ ଲେଜର୍ ଲାଇଟ୍ ବ୍ୟବହାର କରାଯାଏ । ଏଥିପାଇଁ ୩ରୁ ୪ଟି ପର୍ଯ୍ୟାୟରେ କାମ କରିବାକୁ ପଡ଼ିଥାଏ । ଏଥିପାଇଁ ପାଖାପାଖି ବର୍ଷେରୁ ଅଧିକ ସମୟ ଲାଗିଥାଏ । ଗୋଟିଏ ପର୍ଯ୍ୟାୟର ୩ରୁ ୪ ମାସ ପରେ ଆଉ ଏକ ପର୍ଯ୍ୟାୟ ଆରମ୍ଭ ହୋଇଥାଏ । ପ୍ରତି ପର୍ଯ୍ୟାୟରେ ୪ରୁ ୫ ହଜାର ଟଙ୍କା ଖର୍ଚ୍ଚ ହୋଇଥାଏ । ତେବେ ଚର୍ମ ସଂକ୍ରମଣର ଆଶଙ୍କା ଥିବାରୁ ଟାଟୁକୁ ଚର୍ମ ବିଶେଷଜ୍ଞଙ୍କ ନିକଟରେ ଲିଭାଇବ ଉଚିତ ବୋଲି ଡାକ୍ତରମାନେ ପରାମର୍ଶ ଦେଇଥାନ୍ତି।
