କଟକ ୨୮/୦୮: କିଛି ଦିନର ବ୍ୟବଧାନ ପରେ ଜାଲ୍ ପ୍ରମାଣପତ୍ର ଦେଇ ଶିକ୍ଷକ ନିଯୁକ୍ତ ଘଟଣାକୁ ନେଇ ସରକାର ଖୋଳତାଡ଼ କରିଛନ୍ତି । ୨୦୧୧-୧୨ ଶିକ୍ଷା ସହାୟକ ନିଯୁକ୍ତିରେ ନିୟୋଜିତ ଅଧିକାରୀ ଆଉ ବର୍ତ୍ତି ପାରିବେ ନାହିଁ । ସେମାନଙ୍କ ବିରୋଧରେ ଆକ୍ସନ୍ ମୁଡ୍ରେ ସରକାର । କଟକ ଜିଲ୍ଲାରେ ନିଯୁକ୍ତି ପ୍ରକ୍ରିୟାରେ ସାମିଲ୍ ଥିବା ସେ ସମୟର ଅଧିକାରୀଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନେବାକୁ ପ୍ରାଥମିକ ଶିକ୍ଷା ନିର୍ଦ୍ଦେଶାଳୟ ପକ୍ଷରୁ ନିର୍ଦ୍ଦେଶ ଦିଆଯାଇଛି । ଯାହାକୁ ନେଇ ଅକଳରେ ପଡ଼ିଛନ୍ତି ଅଧିକାରୀ ।
ନକଲି ସାର୍ଟିଫିକେଟ ଦେଇ ଶିକ୍ଷକ ଚାକିରି କରିଥିବା ପାଖାପାଖି ୧୫୦ଜଣଙ୍କୁ ବହିଷ୍କାର କରାଯାଇଛି । ଏହି ମାମଲାରେ ଥାନାରେ ଏତଲା ଦାଖଲ କରାଯାଇଥିବା ଜଣାପଡ଼ିଛି । କଟକ ଜିଲ୍ଲାରେ ଟାଙ୍ଗୀ, ମାହାଙ୍ଗା, ବାଙ୍କୀ ବ୍ଲକ୍ରେ କିଛି ନକଲି ଶିକ୍ଷକ ରହିଥିବା ବେଳେ ଏମାନଙ୍କ ବିରୋଧରେ ପ୍ରଶାସନିକ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ପୂର୍ବରୁ ବଲାଙ୍ଗୀର ଜିଲ୍ଲାରେ ଏହି ଘଟଣା ସାମ୍ନାକୁ ଆସିବା ପରେ ସରକାର ଏହାକୁ ଗମ୍ଭୀରତାର ସହ ତଦନ୍ତ କରିବାକୁ ନିର୍ଦ୍ଦେଶ ଦେଇଥିଲେ । କ୍ରାଇମ୍ବ୍ରାଞ୍ଚ ଏହି ତଦନ୍ତରେ ଜଡ଼ିତ ଥିବା ବେଳେ ବ୍ଲକ ଶିକ୍ଷା ଅଧିକାରୀ (ବିଇଓ) ଓ ଜିଲ୍ଲା ଶିକ୍ଷା ଅଧିକାରୀ (ଡିଇଓ) ମାନଙ୍କୁ ୭ଦିନ ମଧ୍ୟରେ ନକଲି ସାର୍ଟିଫିକେଟ୍ଧାରୀଙ୍କ ସମ୍ପର୍କରେ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦିଆଯାଇଥିଲା । ଏଥିସହ, ଓଡ଼ିଶା ଓ ବାହାର ରାଜ୍ୟର ବିଶ୍ୱବିଦ୍ୟାଳୟ ଗୁଡ଼ିକୁ ମଧ୍ୟ ଚିଠି ପଠାଯାଇ ସାର୍ଟିଫିକେଟ୍ର ସତ୍ୟତା ଯାଞ୍ଚ୍ କରାଯାଇଛି । ନକଲି ସାର୍ଟିଫିକେଟ ସମ୍ପର୍କିତ ମାମଲା ଓଡ଼ିଶା ହାଇକୋର୍ଟରେ ମଧ୍ୟ ଉଠିଛି । ଓଡ଼ିଶା ହାଇକୋର୍ଟ ଏହି ମାମଲା ଗୁଡ଼ିକରେ ସମୟ ସମୟରେ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଜାରି କରିଛନ୍ତି । ହାଇକୋର୍ଟ ଶିକ୍ଷକ ନିଯୁକ୍ତି ସମ୍ପର୍କିତ ଅନିୟମିତତା ନେଇ ମାମଲାରେ ରାଜ୍ୟ ସରକାରଙ୍କୁ ନିୟମିତ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି ।
ଏହି କ୍ରମରେ ପ୍ରାଥମିକ ଶିକ୍ଷା ନିର୍ଦ୍ଦେଶାଳୟ ନିର୍ଦ୍ଦେଶକ ଏକ ନିର୍ଦ୍ଦେଶନାମା ଜାରି କରିଛନ୍ତି । ଯେଉଁଥିରେ ସେ ୨୦୧୧-୧୨ ବର୍ଷର ଶିକ୍ଷା ସହାୟକ ନିଯୁକ୍ତିରେ ସାମିଲ୍ ଥିବା ଅଧିକାରୀ ଓ କର୍ମଚାରୀଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନେବାକୁ ସମଗ୍ର ଶିକ୍ଷାର ଜିଲ୍ଲା ପ୍ରକଳ୍ପ ସଂଯୋଜକଙ୍କୁ ନିର୍ଦ୍ଦେଶ ଜାରି କରିଛନ୍ତି । ସେ ସମୟର ନିଯୁକ୍ତିର ପ୍ରକ୍ରିୟାରେ ସାମିଲ ଅବସରପ୍ରାପ୍ତ କର୍ମଚାରୀଙ୍କ ପଦବି ସମ୍ବନ୍ଧୀୟ ବିବରଣୀ ମଗାଯାଇଛି । ସେହିପରି ନିଯୁକ୍ତିରେ ସାମିଲ୍ ଥିବା ଅଧିକାରୀଙ୍କ ଡ୍ରାଫ୍ଟିଂ ସମ୍ବନ୍ଧୀୟ ଅଫିସ ଅର୍ଡରର କପି ସହିତ ମେରିଟ୍ ତାଲିକା ଚୂଡ଼ାନ୍ତ କରିବାରେ ଡିପିସିଙ୍କ ଭୂମିକା କ’ଣ ଥିଲା ସେ ସମ୍ବନ୍ଧରେ ରିପୋର୍ଟ ତଲବ କରାଯାଇଛି ।
