କଟକ, ୩୧।୭ : ସାଂସଦ ଏବଂ ବିଧାୟକମାନେ ୧୫ ଜଣ ଲେଖାଏଁ ଶିକ୍ଷକଙ୍କ ବଦଳି ପାଇଁ ସୁପାରିଶ କରି ପାରିବା ଭଳି ପ୍ରସଙ୍ଗରେ ରାଜ୍ୟ ସରକାରଙ୍କ ଠାରୁ ଜବାବ ଲୋଡିଛନ୍ତି ହାଇକୋର୍ଟ। ତେବେ ଆବେଦନକାରୀ ୨ ଜଣ ଶିକ୍ଷକଙ୍କ ବଦଳି ନିର୍ଦେଶ ଉପରେ ଅନ୍ତରୀଣ ରହିତାଦେଶ ଜାରୀ କରିଛନ୍ତି ହାଇକୋର୍ଟ। ଗତ ମେ ମାସ ୧୩ ତାରିଖରେ ସ୍କୁଲ ଓ ଗଣ ଶିକ୍ଷା ବିଭାଗ ଦ୍ୱାରା ପ୍ରକାଶିତ ବିଜ୍ଞପ୍ତିର ବୈଧତା ଉପରେ ମଧ୍ୟ କୋର୍ଟ ପ୍ରଶ୍ନ ଉଠାଇଛନ୍ତି।
ନର୍ଲା ଅଞ୍ଚଳର ରଞ୍ଜନ କୁମାର ତ୍ରିପାଠୀଙ୍କ ସହ ଆଉ ଜଣେ ଶିକ୍ଷକ ଜନ ପ୍ରତିନିଧିଙ୍କ ସୁପାରିଶ କ୍ରମେ ଅନ୍ୟ ସ୍କୁଲକୁ ବଦଳି ହୋଇଥିଲେ। କିନ୍ତୁ ରାଜନୈତିକ ଉଦ୍ୟେଶ୍ୟ ରଖି ସେମାନଙ୍କୁ ବଦଳି କରାଯାଇଥିବାର ଅଭିଯୋଗ ଆଣି ଉଭୟ ଶିକ୍ଷକ ହାଇକୋର୍ଟଙ୍କ ଦ୍ବାରସ୍ଥ ହୋଇଛନ୍ତି। କୋର୍ଟ ସେମାନଙ୍କ ବଦଳି ଉପରେ ଅନ୍ତରୀଣ ରହିତାଦେଶ ଜାରୀ କରିଛନ୍ତି। ଏଥିସହ ରାଜ୍ୟ ସରକାରଙ୍କ ଦ୍ୱାରା ମେ ମାସ ୧୩ ତାରିଖରେ ପ୍ରକାଶ କରାଯାଇଥିବା ବିଜ୍ଞପ୍ତି ଉପରେ ମଧ୍ୟ ପ୍ରଶ୍ନ ଉଠାଇଛନ୍ତି।
