ଦୁବାଇ/ନୂଆଦିଲ୍ଲୀ: ଭାରତ ୟୁଏଇକୁ ୯ ୱିକେଟରେ ପରାସ୍ତ କରିଛି । ଟି-୨୦ ଏସିଆ କପ୍ ଇତିହାସରେ ଦ୍ୱିତୀୟ ଥର ପାଇଁ ଟିମ୍ ଇଣ୍ଡିଆ ୯ ୱିକେଟରେ ଜିତିଛି । ଏହି ମ୍ୟାଚ୍ରେ ୟୁଏଇ ଦଳ ପ୍ରଥମେ ଖେଳି ମାତ୍ର ୫୭ ରନ୍ରେ ଅଲ୍ଆଉଟ୍ ହୋଇଥିଲା । ଏହାର ଜବାବରେ ଶୁଭମନ ଗିଲ୍, ଅଭିଷେକ ଶର୍ମା ଓ ସୂର୍ଯ୍ୟକୁମାର ଯାଦବ ମାତ୍ର ୨୭ ବଲ୍ରେ ମ୍ୟାଚ୍ ଶେଷ କରିଛନ୍ତି । ଟିମ୍ ଇଣ୍ଡିଆ ପାଇଁ କୁଲଦୀପ ଯାଦବ ସର୍ବାଧିକ ୪ ୱିକେଟ୍ ନେଇଥିଲେ । ଟି-୨୦ ଏସିଆ କପ୍ରେ ଭାରତ ପାଇଁ ଏହା ସବୁଠାରୁ ବଡ଼ ବିଜୟ । ଭାରତୀୟ ଦଳ ପୂର୍ବରୁ ୨୦୧୬ରେ ୟୁଏଇକୁ ୯ ୱିକେଟ୍ରେ ପରାସ୍ତ କରିଥିଲା । ସେହି ମ୍ୟାଚ୍ରେ ଟିମ୍ ଇଣ୍ଡିଆ ୬୧ ବଲ୍ରେ ୮୨ ରନ୍ର ଟାର୍ଗେଟ ହାସଲ କରିଥିଲା । ଏବେ ଭାରତୀୟ ଦଳ ମାତ୍ର ୨୭ ବଲ୍ରେ ମାତ୍ର ଗୋଟିଏ ୱିକେଟ୍ ହରାଇ ୫୮ ରନ୍ର ଟାର୍ଗେଟ ହାସଲ କରିଛି ।
UAE ଦଳ ଟସ ହାରିବା ପରେ ପ୍ରଥମେ ବ୍ୟାଟିଂ କରିଥିଲା । ଅଧିନାୟକ ମହମ୍ମଦ ୱାସିମ ଏବଂ ଆଲିଶାନ ଶରାଫୁ ଦଳର ସ୍କୋରକୁ ୨୬ ରନରେ ପହଞ୍ଚାଇବା ପରେ ଦଳ ଭଲ ଆରମ୍ଭ କରିଥିଲା। ଏହା ପରେ ଭାରତୀୟ ବୋଲରମାନେ ଏପରି ବିପର୍ଯ୍ୟୟ ସୃଷ୍ଟି କରିଥିଲେ ଯେ, ପରବର୍ତ୍ତୀ ୩୧ ରନ ମଧ୍ୟରେ ୟୁଏଇର ସମସ୍ତ ୧୦ ୱିକେଟ ପାଭିଲିୟନ ଫେରିଥିଲେ । ଫଳରେ ଦଳ କେବଳ ୫୭ ରନ କରିପାରିଥିଲା। କୁଲଦୀପ ଯାଦବ ୪ ୱିକେଟ ନେଇଥିଲେ । ଶିବମ ଦୁବେ ତିନୋଟି ୱିକେଟ ନେଇଥିବା ବେଳେ ଅକ୍ଷର ପଟେଲ, ଜସପ୍ରୀତ ବୁମରା ଏବଂ ବରୁଣ ଚକ୍ରବର୍ତ୍ତୀ ଗୋଟିଏ ଲେଖାଏଁ ୱିକେଟ ନେଇଥିଲେ।
ଭାରତୀୟ ଦଳ ୫୮ ରନର ଛୋଟ ଟାର୍ଗେଟକୁ ପିଛା କରିବାକୁ ଆସିଥିଲା । ଅଭିଷେକ ଶର୍ମା ଏବଂ ଶୁଭମନ ଗିଲ ଟିମ୍ ଇଣ୍ଡିଆକୁ ଏକ ଦମଦାର ଆରମ୍ଭ ଦେଇଥିଲେ । ଅଭିଷେକ ୧୬ ବଲରେ ୩୦ ରନ କରିଥିଲେ । ଗିଲ ୯ ବଲରେ ୨୦ ରନ କରି ଅପରାଜିତ ଫେରିଥିଲେ। ଅଧିନାୟକ ସୂର୍ଯ୍ୟକୁମାର ଯାଦବ କେବଳ ୨ ବଲ୍ ଖେଳିଥିଲେ ଏବଂ ଗୋଟିଏ ଛକା ମାରିଥିଲେ । ଏହି ଦମଦାର ବ୍ୟାଟିଂ ବଳରେ ଟିମ୍ ଇଣ୍ଡିଆ ମାତ୍ର ୨୭ ବଲରେ ମ୍ୟାଚ୍ ଶେଷ କରିଥିଲା ।
