ନୂଆଦିଲ୍ଲୀ: ପାକିସ୍ତାନ ସେନା ପୁଣି ଥରେ ନିୟନ୍ତ୍ରଣ ରେଖା (LoC) ନିକଟରେ ଅସ୍ତ୍ରବିରତି ଉଲ୍ଲଂଘନ କରି ଜମ୍ମୁ-କାଶ୍ମୀରର ପୁଞ୍ଚ ଜିଲ୍ଲାର ମେନ୍ଧର ଏବଂ ବାଲାକୋଟ ସେକ୍ଟରରେ ଗୁଳିବର୍ଷଣ କରିଛି। ଏହି ଘଟଣାରେ ମଙ୍କୋଟ ଅଞ୍ଚଳରେ ଜଣେ ମହିଳାଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ଦୁଇଜଣ ନାଗରିକଙ୍କର ମୃତ୍ୟୁ ହୋଇଥିବା ରିପୋର୍ଟ ମିଳିଛି।

ସୂଚନା ଅନୁଯାୟୀ, ପାକିସ୍ତାନ ସେନା ମଙ୍କୋଟ ସେକ୍ଟରରେ ଥିବା ଭାରତୀୟ ସୈନ୍ୟ ଚୌକି ଏବଂ ନାଗରିକ ଅଞ୍ଚଳକୁ ଟାର୍ଗେଟ କରି ଗୁଳିବର୍ଷଣ କରିଥିଲା। ଏହି ଆକ୍ରମଣରେ ମଙ୍କୋଟର ସର୍ଦାରାନ ମହଲ୍ଲାର ରୁବି କୌର ନାମକ ଜଣେ ମହିଳାଙ୍କର ମୃତ୍ୟୁ ହୋଇଛି। ଏହା ବ୍ୟତୀତ, ମେନ୍ଧରର ସାଗରା ଅଞ୍ଚଳରେ ମହମ୍ମଦ ଆଦିଲ ଏବଂ ବାଲାକୋଟରେ ସଲିମ ହୁସେନଙ୍କର ମୃତ୍ୟୁ ହୋଇଥିବା ସୂଚନା ମିଳିଛି।

ଏହି ଗୁଳିବର୍ଷଣ ଭାରତର 'ଅପରେସନ ସିନ୍ଦୁର'ର ପ୍ରତିଶୋଧ ସ୍ୱରୂପ ହୋଇଥିବା ଆଶଙ୍କା କରାଯାଉଛି। ଯେଉଁଥିରେ ଭାରତୀୟ ସେନା ପାକିସ୍ତାନ ଓ ପାକିସ୍ତାନ ଅଧିକୃତ କାଶ୍ମୀରରେ ଥିବା ଆତଙ୍କବାଦୀ ଶିବିର ଉପରେ ମିସାଇଲ ଆକ୍ରମଣ କରିଥିଲା। ଏହା ପୂର୍ବରୁ ଏପ୍ରିଲ ୨୨ ତାରିଖରେ ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣର ଜବାବ ସ୍ୱରୂପ ଥିଲା ବୋଲି ସେନା ଘୋଷଣା କରିଛି। 

ଭାରତୀୟ ସେନା ପାକିସ୍ତାନର ଏହି ଆକ୍ରମଣର ମୁକାବିଲା କରି ମୁହଁତୋଡ଼ ଜବାବ ଦେଉଛି। ସେନା ସୂତ୍ରରୁ ଜଣାପଡ଼ିଛି ଯେ, ପାକିସ୍ତାନର ଗୁଳିବର୍ଷଣ ଯୋଗୁଁ ସୀମାନ୍ତ ଅଞ୍ଚଳରେ ଆତଙ୍କ ସୃଷ୍ଟି ହୋଇଛି। ଏହି ଘଟଣା ପରେ ଉଭୟ ଦେଶ ମଧ୍ୟରେ ଉତ୍ତେଜନା ଆହୁରି ବୃଦ୍ଧି ପାଇଛି।

ପାକିସ୍ତାନର ଏହି କାର୍ଯ୍ୟକୁ ନେଇ ସ୍ଥାନୀୟ ଅଞ୍ଚଳରେ ଉଦବେଗ ଦେଖାଦେଇଛି। ଭାରତ ସରକାର ଏହି ଆକ୍ରମଣର ନିନ୍ଦା କରିଛନ୍ତି ଏବଂ ଆନ୍ତର୍ଜାତୀୟ ସମୁଦାୟକୁ ପାକିସ୍ତାନର ଆତଙ୍କବାଦୀ କାର୍ଯ୍ୟକଳାପ ବିରୁଦ୍ଧରେ କଠୋର ପଦକ୍ଷେପ ଗ୍ରହଣ କରିବାକୁ ଆହ୍ୱାନ ଦେଇଛନ୍ତି।