ନୂଆଦିଲ୍ଲୀ: ବୁଧବାର ମଧ୍ୟ ଥାଇଲାଣ୍ଡର ଏକ ବାଣ କାରଖାନାରେ ଭୟଙ୍କର ବିସ୍ଫୋରଣ ହୋଇଛି। ଏହି ବିସ୍ଫୋରଣରେ ଅତି କମ୍ରେ ୯ ଜଣଙ୍କ ମୃତ୍ୟୁ ହୋଇଛି। ସ୍ଥାନୀୟ ଅଧିକାରୀ ଏହି ଘଟଣାକୁ ନେଇ ସୂଚନା ଦେଇଛନ୍ତି । ଏହି ବିସ୍ଫୋରଣ ବ୍ୟାଙ୍କକ୍ ଠାରୁ ପାଖାପାଖି ୯୫ କିଲୋମିଟର ଉତ୍ତର-ପଶ୍ଚିମରେ ଥିବା ସୁଫାନ ବୁରୀ ପ୍ରଦେଶରେ ହୋଇଛି। ବିସ୍ଫୋରଣର କାରଣ ଏବେ ବି ଅସ୍ପଷ୍ଟ ରହିଛି ।
ବାଣ କାରଖାନାରେ ବିସ୍ଫୋରଣକୁ ନେଇ 'ସମରକୁନ୍ ସୁଫାନ୍ ବୁରି ରେସ୍କ୍ୟୁ ଫାଉଣ୍ଡେସନ୍' ୯ ଜଣଙ୍କ ମୃତ୍ୟୁ ଖବର ଦେଇଛି ଏବଂ କହିଛି ଯେ ୨ଜଣଙ୍କୁ ଗୁରୁତର ଅବସ୍ଥାରେ ହସ୍ପିଟାଲକୁ ନିଆଯାଇଛି। ପ୍ରଦେଶ ସରକାରଙ୍କ ଜନସମ୍ପର୍କ ବିଭାଗ କହିଛି ଯେ ଏହି ଘଟଣାରେ ଜଣେ ଆହତ ହୋଇଛନ୍ତି। ନିଖୋଜ ଲୋକଙ୍କ ସଂଖ୍ୟା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।
ପୋଲିସର ବରିଷ୍ଠ ସାର୍ଜେଣ୍ଟ ମେଜର ପିନ୍ୟୋ ଚାନମାନି କହିଛନ୍ତି ଯେ, ବିସ୍ଫୋରଣ ଏକ ବାଣ ତିଆରି କୋଠାରେ ହୋଇଥିଲା। କାରଖାନାର ବାଣ ତିଆରି ପାଇଁ ଲାଇସେନ୍ସ ଥିଲା କି ନାହିଁ ତାହା ସ୍ପଷ୍ଟ ନୁହେଁ। ଘଟଣାସ୍ଥଳରୁ ମିଳିଥିବା ଭିଡିଓ ଏବଂ ଫଟୋଗ୍ରାଫରେ କ୍ଷତିଗ୍ରସ୍ତ କାଠ ଦେଖିବାକୁ ମିଳିଛି । ଜାନୁଆରୀ ୨୦୨୪ରେ ସମାନ ଅଞ୍ଚଳରେ ସମାନ ଘଟଣାରେ ପ୍ରାୟ ୨୦ ଜଣଙ୍କର ମୃତ୍ୟୁ ହୋଇଥିଲା। ଅଧିକାରୀଙ୍କ ଅନୁଯାୟୀ, ଜୁଲାଇ ୨୦୨୩ରେ ଦକ୍ଷିଣ ଥାଇଲାଣ୍ଡର ଏକ ବାଣ ଗୋଦାମରେ ଏକ ବଡ଼ ବିସ୍ଫୋରଣରେ ଅତି କମରେ ୧୦ ଜଣଙ୍କର ମୃତ୍ୟୁ ହୋଇଥିଲା ଏବଂ ୧୦୦ ରୁ ଅଧିକ ଆହତ ହୋଇଥିଲେ।
