ନୂଆଦିଲ୍ଲୀ,୧୯/୦୫: ହନିଟ୍ରାପ୍...ଆପଣ ପ୍ରାୟତଃ ଏ ବିଷୟରେ ଶୁଣିଥିବେ। ଭାରତ-ପାକିସ୍ତାନ ବିବାଦ ପରେ ହନିଟ୍ରାପ୍ ପୁଣି ଥରେ ଖବରରେ ଆସିଛି। ଏହାର କାରଣ ହେଉଛି ନିକଟରେ ପାକିସ୍ତାନ ପାଇଁ ଗୁଇନ୍ଦାଗିରି ଅଭିଯୋଗରେ ବର୍ତ୍ତମାନ ହୋଇଥିବା ଗିରଫଦାରୀ। ହନିଟ୍ରାପ୍ ହେଉଛି ଏକ ଏମିତି ଫାଶ, ଯେଉଁଥିରେ ଜଣେ ବ୍ୟକ୍ତିଙ୍କୁ ପ୍ରେମ ସମ୍ପର୍କ କିମ୍ବା ଅନ୍ୟ କୌଣସି ପ୍ରକାରର ପ୍ରଲୋଭନରେ ଫସାଇ ସେମାନଙ୍କଠାରୁ ଗୁପ୍ତ ସୂଚନା ବାହାର କରାଯାଏ କିମ୍ବା ସେମାନଙ୍କୁ କିଛି କାମ କରିବାକୁ ବାଧ୍ୟ କରାଯାଏ। ଏହା ପ୍ରାୟତଃ ଗୁଇନ୍ଦା ଏବଂ ଗୁପ୍ତ କାର୍ଯ୍ୟରେ ବ୍ୟବହୃତ ହୁଏ। ଯେତେବେଳେ ସାରା ଦେଶରେ ହନିଟ୍ରାପ୍ ବିଷୟରେ ଆଲୋଚନା ହେଉଛି, ସେତେବେଳେ ଇତିହାସର ସେହି ପୁରୁଣା ଘଟଣା ମନେ ପଡ଼ିଯାଏ ଯେତେବେଳେ ପୂର୍ବତନ ପ୍ରଧାନମନ୍ତ୍ରୀ ନେହେରୁ ଗୋଟିଏ ହନିଟ୍ରାପ୍ ଘଟଣାକୁ ହସିପକାଇଥିଲେ...
ହନିଟ୍ରାପ୍ର ଏକ କାହାଣୀ ଶୁଣି ହସିପକାଇଥିଲେ ନେହେରୁ:
ଭାରତୀୟ ଗୁଇନ୍ଦା ଇତିହାସରେ ଗୁପ୍ତଚର ଏବଂ ହନିଟ୍ରାପ୍ ମାମଲା ଅନେକ ଥର ସାମ୍ନାକୁ ଆସିଛି, କିନ୍ତୁ ଏପରି ଏକ ଘଟଣା ଘଟିଛି ଯାହା ଶୁଣି ଭାରତର ପ୍ରଥମ ପ୍ରଧାନମନ୍ତ୍ରୀ ଜବାହରଲାଲ ନେହେରୁ ହସି ଦେଇଥିଲେ। ଏହା ଜଣେ ଭାରତୀୟ କୂଟନୀତିଜ୍ଞଙ୍କ କାହାଣୀ ଯିଏ ମସ୍କୋରେ ରୁଷ ଗୁପ୍ତଚରଙ୍କ ହନିଟ୍ରାପରେ ପଡ଼ିଥିଲେ। ଆସନ୍ତୁ, ଏହି ଆକର୍ଷଣୀୟ କାହାଣୀ ବିଷୟରେ ଜାଣିବା। ଯେତେବେଳେ ଜବାହରଲାଲ ନେହେରୁ ଭାରତର ପ୍ରଧାନମନ୍ତ୍ରୀ ଥିଲେ, ସେତେବେଳେ ଜଣେ ଯୁବ ଭାରତୀୟ କୂଟନୀତିଜ୍ଞଙ୍କୁ ମସ୍କୋରେ ନିଯୁକ୍ତି ଦିଆଯାଇଥିଲା। ଏହି କୂଟନୀତିଜ୍ଞଙ୍କର ପରିଚୟ ଜଣେ ରୁଷୀୟ ଝିଅ ସହିତ ହୋଇଥିଲା, ଯିଏ ପ୍ରକୃତରେ ସୋଭିଏତ୍ ୟୁନିଅନର ଗୁଇନ୍ଦା ସଂସ୍ଥା, କେଜିବିର ଜଣେ ଏଜେଣ୍ଟ ଥିଲେ। ଏହା ପରେ, ଉଭୟଙ୍କ ମଧ୍ୟରେ ଘନିଷ୍ଠତା ବୃଦ୍ଧି ପାଇଲା ଏବଂ କେଜିବି ଏହି ସମ୍ପର୍କର ଫାଇଦା ନେବାକୁ ଯୋଜନା କଲା।
ବ୍ଳାକ୍ମେଲ୍ କରିଥିଲେ ଋଷୀୟ ସୁନ୍ଦରୀ:
କେଜିବି କୂଟନୀତିଜ୍ଞଙ୍କ ବ୍ୟକ୍ତିଗତ ମୁହୂର୍ତ୍ତଗୁଡ଼ିକର ଫଟୋ ଉଠାଇ ତାଙ୍କୁ ବ୍ଲାକମେଲ୍ କରିବାକୁ ଚେଷ୍ଟା କରିଥିଲା। ଫଟୋଗ୍ରାଫ୍ ଦେଖାଇ ତାଙ୍କ ଠାରୁ ଗୋପନୀୟ ସୂଚନା ମଗାଯାଇଥିଲା ଯାହାଦ୍ୱାରା ଭାରତର ରଣନୈତିକ ଯୋଜନା ଜଣାପଡ଼ିଯିବ। କିନ୍ତୁ କୂଟନୀତିଜ୍ଞ ସାହସ ଦେଖାଇଲେ ଏବଂ ତୁରନ୍ତ ତାଙ୍କ ଦୂତାବାସର ବରିଷ୍ଠ ଅଧିକାରୀମାନଙ୍କୁ ଘଟଣା ବିଷୟରେ ଜଣାଇଥିଲେ। ଯେତେବେଳେ ଏହି କଥା ଭାରତୀୟ ଦୂତାବାସର ରାଷ୍ଟ୍ରଦୂତଙ୍କ ପାଖରେ ପହଞ୍ଚିଲା, ସେ ନେହେରୁଙ୍କୁ ଏକଥା ଜଣାଇଲେ। ନେହେରୁ ସମଗ୍ର କାହାଣୀ ଶୁଣି ଜୋରରେ ହସିବାକୁ ଲାଗିଥିଲେ। ଏହି ଘଟଣାକୁ ଗମ୍ଭୀରତାର ସହ ନେବା ପରିବର୍ତ୍ତେ ସେ ଏହାକୁ ହାଲୁକା ଭାବରେ ନେଇଥିଲେ। ନେହେରୁ କୂଟନୀତିଜ୍ଞଙ୍କୁ ଚେତାବନୀ ଦେଇଥିଲେ ଯେ ଭବିଷ୍ୟତରେ ଯେପରି ସେ ଏଥିପ୍ରତି ସତର୍କ ରୁହନ୍ତି। ଅବଶ୍ୟ କୁଟନୀତିଜ୍ଞଙ୍କ ପ୍ରତି କୌଣସି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନଥିଲା। ଏହି ଘଟଣାଟି ଭାରତୀୟ ଗୁଇନ୍ଦା ଇତିହାସରେ ଏକ ମଜାଦାର କାହାଣୀ ଭାବରେ ଲିପିବଦ୍ଧ ହୋଇଛି।
