ଭୁବନେଶ୍ୱର,୨୫/୦୪: ରାଜ୍ୟରେ କ୍ଷୁଦ୍ର, ମଧ୍ୟମ ଓ ବଡ ଚାଷୀଙ୍କ ସଂଖ୍ୟା ଉଦ୍ବେଗଜନକ ଭାବେ କମି ଚାଲିଛି । ଫଳରେ ବଢ଼ିଚାଲିଛି ନାମମାତ୍ର ଚାଷୀଙ୍କ ସଂଖ୍ୟା । ଗତ ଦୁଇଟି କୃଷି ଗଣନା ହିସାବ ମୁତାବକ, ଓଡ଼ିଶାରେ ଚାଷୀଙ୍କ ସଂଖ୍ୟା ୪୬ଲକ୍ଷ ୬୭ହଜାରରୁ ୪୮ଲକ୍ଷ ୬୫ ହଜାରକୁ ବୃଦ୍ଧି ପାଇଛି । ହେଲେ ବଡ଼ ଚାଷୀଙ୍କ ସଂଖ୍ୟା ୫୫୭୪ରୁ ୩୯୭୫କୁ ହ୍ରାସ ପାଇଥିବାବେଳେ ମଧ୍ୟମ କିସମ ଚାଷୀଙ୍କ ସଂଖ୍ୟା ୩ ଲକ୍ଷ ୭୫ ହଜାରରୁ ୩ ଲକ୍ଷ ୩୮ ହଜାରକୁ କମିଛି । ସେହିଭଳି କ୍ଷୁଦ୍ର ଚାଷୀଙ୍କ ସଂଖ୍ୟା ମଧ୍ୟ ଗତ ଦୁଇ କୃଷି ଗଣନା ଭିତରେ ୯ ଲକ୍ଷ ୧୮ ହଜାରରୁ ୮ଲକ୍ଷ ୮୭ ହଜାରକୁ କମିଛି ।
କୃଷି ବିଶେଷଜ୍ଞଙ୍କ ସୂଚନା ଅନୁସାରେ, ବିଭିନ୍ନ କାରଣରୁ ବହୁ ପାରମ୍ପରିକ ଚାଷୀ ଚାଷରୁ ମୁହଁ ଫେରାଇ ନେଉଛନ୍ତି । ସେଥିପାଇଁ ବହୁ ଚାଷ ଜମି ପଡ଼ିଆ ପଡୁଛି । ଏ କ୍ଷେତ୍ରରେ ବଡ଼, ମଧ୍ୟମ, କ୍ଷୁଦ୍ର ଚାଷୀମାନଙ୍କଠାରୁ ନାମମାତ୍ର ଚାଷୀମାନେ କିଛି ଜମି ନେଇ ଚାଷ କରୁଛନ୍ତି । ସରକାରୀ ତଥ୍ୟ ମୁତାବକ, ଓଡ଼ିଶାରେ ଏବେ ଖରିଫ ଋତୁରେ ପ୍ରାୟ ୫ଲକ୍ଷ ୮୮ହଜାର ହେକ୍ଟର ଓ ରବି ଋତୁରେ ପାଖପାଖି ୩୪ଲକ୍ଷ ହେକ୍ଟର ଜମି ପଡ଼ିଆ ରହୁଛି । ଚାଷ ହେଉଥିବା ଜମିର ପରିମାଣ କିଛି ପରିମାଣରେ ବୃଦ୍ଧି ପାଉଛି । ତେବେ ରାଜ୍ୟରେ ଯେତେ ଜମିରେ ଚାଷ ହେଉଛି, ସେଥିରୁ ଅଧିକାଂଶରେ ଧାନ ଚାଷ କରାଯାଉଛି । ଡାଲି, ତୈଳବୀଜ, କପା, ପନିପରିବା ଓ ଆଖୁ ଭଳି ଅର୍ଥକାରୀ ଫସଲ ଚାଷ କମ୍ ହେଉଥିବାରୁ ରାଜ୍ୟର ଚାହିଦା ମେଣ୍ଟି ପାରୁନି । ଚାହିଦା ମେଣ୍ଟାଇବା ପାଇଁ ଓଡ଼ିଶାକୁ ଅନ୍ୟ ରାଜ୍ୟ ପାଖରେ ହାତ ପତାଇବାକୁ ପଡ଼ୁଛି । ଯେତିକି ଜମିରେ ଅର୍ଥକାରୀ ଫସଲ କରାଯାଉଛି, ତାହାର ପ୍ରକ୍ରିୟାକରଣ ଓ ସଂରକ୍ଷଣ ପାଇଁ ପର୍ଯ୍ୟାପ୍ତ ବ୍ୟବସ୍ଥା ନ ଥିବାରୁ ଅନ୍ୟ ରାଜ୍ୟର ବ୍ୟବସାୟୀମାନେ ଓଡ଼ିଶା ଚାଷୀଙ୍କ ଉତ୍ପାଦିତ ସାମଗ୍ରୀକୁ ନାମ ମାତ୍ର ମୂଲ୍ୟରେ କିଣି ନେଉଛନ୍ତି ।
ରାଜ୍ୟର ଚାଷୀମାନେ ବ୍ୟାପକ କ୍ଷତିଗ୍ରସ୍ତ ହେଉଥିବାରୁ ଅନେକ ପାରମ୍ପରିକ ଚାଷୀ ଚାଷକୁ ଆଉ ଲାଭକାରୀ ପନ୍ଥା ଭାବେ ଗ୍ରହଣ କରିପାରୁ ନାହାନ୍ତି । ଜାତୀୟ ନମୁନା ସର୍ବେକ୍ଷଣ ସଂସ୍ଥା ପକ୍ଷରୁ ୨୦୧୯ରେ ୭୭ ତମ ସର୍ଭେ କରାଯାଇଥିଲା । ଏଥିରେ କୃଷକ ପରିବାରର ହାରାହାରି ଆୟ ଯାହା ଦର୍ଶାଯାଉଥିଲା ଜାତୀୟ ଅଭିବୃଦ୍ଧି ତୁଳନାରେ ଓଡ଼ିଶାରେ ତାହା ଅତି ନଗଣ୍ୟ ଥିଲା । ସର୍ବଭାରତୀୟ ସ୍ତରରେ କୃଷକ ପରିବାରର ମାସିକ ହାରାହାରି ଆୟ ୧୦ ହଜାର ୨୧୮ ଟଙ୍କା ଥିବାବେଳେ ଓଡ଼ିଶାରେ ତାହା ୫୧୧୨ ଟଙ୍କା ରହିଛି ।
