ଭୁବନେଶ୍ୱର,୨୯/୦୮: ସ୍କୁଲ ଛାଡ଼ିବା (ଡ୍ରପ୍ ଆଉଟ୍) ହାର କମାଇବା ପାଇଁ ସରକାର ବିଭିନ୍ନ ଯୋଜନା କରୁଛନ୍ତି । ଜାତୀୟସ୍ତରରେ ଡ୍ରପ୍ଆଉଟ ଉଲ୍ଲେଖନୀୟ ହାରରେ ହ୍ରାସ ପାଉଛି, ହେଲେ ଓଡ଼ିଶାରେ ବଢ଼ୁଛି । ଅର୍ଥାତ୍ ଅଧିକ ପିଲା ଅଧାରୁ ସ୍କୁଲ ଛାଡ଼ି ଦେଉଛନ୍ତି । ୨୦୨୩-୨୪ ଶିକ୍ଷାବର୍ଷରେ ମାଧ୍ୟମିକ ସ୍ତରରେ ଡ୍ରପ୍ଆଉଟ ହାର ୯.୧ % ଥିବା ବେଳେ ଏବେ ୯.୮%କୁ ବୃଦ୍ଧି ପାଇଛି । ଏହାର ଅର୍ଥ ହେଉଛି ପ୍ରତି ଶହେ ଜଣରେ ପାଖାପାଖି ୧୦ ଜଣ ପାଠ ଛାଡ଼ି ଦେଉଛନ୍ତି । କେନ୍ଦ୍ର ଶିକ୍ଷା ମନ୍ତ୍ରଣାଳୟ ପକ୍ଷରୁ ପ୍ରକାଶିତ ୟୁନିଫାଇଏଡ୍ ଡିଷ୍ଟ୍ରିକ୍ ଇନ୍ଫରମେସନ୍ ସିଷ୍ଟମ ଫର ଏଜୁକେସନ (ୟୁଡିଆଇଏସ୍ଇ) ରିପୋର୍ଟ ୨୦୨୪- ୨୫ରେ ଏହି ତଥ୍ୟ ପ୍ରକାଶ ପାଇଛି । ରିପୋର୍ଟ ଜାତୀୟ ଶିକ୍ଷା ନୀତି (ଏନ୍ଇପି) ଢାଞ୍ଚାରେ ପ୍ରସ୍ତୁତ କରାଯାଇଛି ।
ରିପୋର୍ଟ ଅନୁଯାୟୀ, ଜାତୀୟସ୍ତରରେ ଗତବର୍ଷ ଅପେକ୍ଷା ଚଳିତବର୍ଷ ଡ୍ରପ୍ଆଉଟ ହାର କମିଛି । ୨୦୨୩-୨୪ରେ ମାଧ୍ୟମିକ ସ୍ତରରେ ଡ୍ରପ୍ଆଉଟ୍ ହାର ୧୦.୯% ଥିଲା । ଏହା ୨୦୨୪-୨୫ରେ ୮.୨%ରେ ପହଞ୍ଚିଛି । ସେହିପରି ଉଚ୍ଚପ୍ରାଥମିକ ସ୍ତରରେ ୫.୨% ଥିବା ବେଳେ ୨୦୨୪-୨୫ରେ ୩.୫%, ଗତବର୍ଷ ମାଧ୍ୟମିକରେ ୩.୭% ଥିବା ବେଳେ ଚଳିତ ରିପୋର୍ଟ ୨.୩%ରେ ରହିଛି ।
ଓଡ଼ିଶାରେ ୨୦୨୩-୨୪ ଶିକ୍ଷାବର୍ଷରେ ପ୍ରାଥମିକ ଶିକ୍ଷା ସ୍ତରରେ ଡ୍ରପ୍ଆଉଟ୍ ହାର ୦.୫%, ଉଚ୍ଚ ପ୍ରାଥମିକରେ ୧.୭%, ହାଇସ୍କୁଲରେ ୯.୧% ଥିଲା । ଏହା ବୃଦ୍ଧି ପାଇ ୨୦୨୪-୨୫ରେ ପ୍ରାଥମିକ ସ୍ତରରେ ୧.୪%, ଉଚ୍ଚ ପ୍ରାଥମିକରେ ୩.୨% ଓ ମାଧ୍ୟମିକରେ ୯.୮% ହୋଇଛି ।
ପଡ଼ୋଶୀ ରାଜ୍ୟ ଝାଡ଼ଖଣ୍ଡ ଓ ଛତିଶଗଡ଼ରେ ଡ୍ରପ୍ଆଉଟ୍ ହାର ୨୦୨୩-୨୪ ବର୍ଷ ଅପେକ୍ଷା କମିଛି । କେବଳ ଏଇ ଦୁଇଟି ରାଜ୍ୟ ନୁହେଁ ଉତ୍ତରାଖଣ୍ଡ, ଉତ୍ତରପ୍ରଦେଶ, ଆସାମ ଭଳି ଅନେକ ରାଜ୍ୟରେ ଡ୍ରପ୍ ଆଉଟ୍ ହାର କମିଛି ।
କେବଳ ଡ୍ରପ୍ ଆଉଟ୍ ନୁହେଁ, ରିପୋର୍ଟ କହୁଛି ରାଜ୍ୟରେ ୬୧ ହଜାର ୫୬୫ ସ୍କୁଲ ଥିଲା ବେଳେ ୭୬ ଲକ୍ଷ ୪୪ ହଜାର ୦୫୨ ପିଲା ପଢୁଛନ୍ତି । ପାଠ ପଢ଼ାଇବାକୁ ୩, ୪୪, ୧୧୬ ଶିକ୍ଷକ ଅଛନ୍ତି । ହାରାହାରି ପ୍ରତି ୨୨ ଜଣ ପିଲାଙ୍କୁ ପଢ଼ାଇବାକୁ ଜଣେ ଶିକ୍ଷକ ଅଛନ୍ତି । ଜାତୀୟସ୍ତରରେ ଆନୁପାତିକ ହାର ୨୪ ଥିଲା ବେଳେ ପଡ଼ୋଶୀ ରାଜ୍ୟଗୁଡ଼ିକ ଠାରୁ ଓଡ଼ିଶା ଉନ୍ନତ ସ୍ଥିତିରେ ଅଛି । ୧୦୮୯ ଏମିତି ସ୍କୁଲ ଅଛି ଯେଉଁଠି ମାତ୍ର ଜଣେ ଶିକ୍ଷକ ଅଛନ୍ତି । ଏହି ସ୍କୁଲଗୁଡ଼ିକରେ ପଢୁଛନ୍ତି ୪୭ ହଜାର ୯୪୦ ପିଲା । ଅର୍ଥାତ ୪୪ ପିଲାଙ୍କୁ ଜଣେ ମାତ୍ର ଶିକ୍ଷକ ପାଠ ପଢ଼ାଉଛନ୍ତି ।
ନୂଆ ନାମଲେଖା ସରକାରୀ ସ୍କୁଲରେ ବୃଦ୍ଧି ପାଇଛି । ୪ଲକ୍ଷ ୨୭ ହଜାର ୨୭୧ ଜଣ ପିଲା ପ୍ରଥମ ଶ୍ରେଣୀ ପାଇଁ ସରକାରୀ ସ୍କୁଲରେ ନାମ ଲେଖାଇଥିବା ବେଳେ ଘରୋଇ ସ୍କୁଲରେ ମାତ୍ର ୧ ଲକ୍ଷ ୬୨ ହଜାର ୭୩୭ ଜଣ ଲେଖାଇଛନ୍ତି।
